Nyɛkasea Gbalɔi Lɛ—Amos
1. Mɛni hewɔ Amos nɔkwɛmɔnɔ lɛ baanyɛ awo wɔ hewalɛ?
1 Ani onu he pɛŋ akɛ onyɛŋ oshiɛ akɛni oskulyaa shɛɛɛ shɔŋŋ loo owekumɛi bɛ nɔ ko tsɔ lɛ hewɔ? Kɛ́ nakai ji oshihilɛ lɛ, no lɛ, Amos nɔkwɛmɔnɔ lɛ baanyɛ awo bo hewalɛ. Amos ji tooi akwɛlɔ kɛ mɔ ko ni yeɔ apaa bei pɔtɛ̃i komɛi yɛ afi lɛ mli, kɛlɛ Yehowa wo lɛ hewalɛ ni ejaje sane ko ni he hiaa waa. (Amos 1:1; 7:14, 15) Ŋmɛnɛ lɛ, nakai nɔŋŋ Yehowa kɛ mɛi ni baa amɛhe shi lɛ tsuɔ nii. (1 Kor. 1:27-29) Mɛɛ nibii krokomɛi ni kɔɔ wɔshiɛmɔ nitsumɔ lɛ he wɔbaanyɛ wɔkase kɛjɛ gbalɔ Amos dɛŋ?
2. Mɛni hewɔ wɔbaanyɛ wɔfĩ shi shiŋŋ kɛ́ ate shi awo wɔ yɛ shiɛmɔ nitsumɔ lɛ mli lɛ?
2 Fĩ Shi Shiŋŋ yɛ Shiteekɛwoo Fɛɛ Sɛɛ: Beni Amazia ni ji osɔfo ni jaa tsinabi yɛ Israel kooyigbɛ akutsei nyɔŋma maŋtsɛyeli lɛ mli lɛ nu Amos gbalɛ lɛ he lɛ, efee enii tamɔ nɔ ni eekɛɛ akɛ: ‘Jeee biɛ ni oya! Kaagba wɔnaa! Wɔyɛ wɔ diɛŋtsɛ wɔjamɔ!’ (Amos 7:12, 13) Amazia tsɔ Amos wiemɔ lɛ hiɛ ebu shi beni eyabi ni Maŋtsɛ Yerobeam agu gbalɔ lɛ nitsumɔ lɛ. (Amos 7:7-11) Shi Amos haaa no awo ehe gbeyei. Ŋmɛnɛ lɛ, osɔfoi komɛi kɛ maŋkwralɔi yafĩɔ bɔni afee ni awa Yehowa webii lɛ ayi. Shi Yehowa ewo wɔ shi akɛ, tawuu nii ni asɔ̃ɔ ashiɔ wɔ lɛ eko eko nyɛŋ aye wɔ awui kɛya naanɔ.—Yes. 54:17.
3. Mɛɛ sane ni hiɛ fãi enyɔ wɔshiɛɔ ŋmɛnɛ?
3 Jajemɔ Nyɔŋmɔ Kojomɔ kɛ Wɔsɛɛ Jɔɔmɔi: Eyɛ mli akɛ Amos gba fɔbuu kojomɔ ni baaba Israel akutsei nyɔŋma maŋtsɛyeli lɛ nɔ moŋ, shi ekɛ shiwoo ni Yehowa kɛha akɛ ekɛ amɛ baaku sɛɛ kɛba amɛshikpɔŋ lɛ nɔ ni ejɔɔ amɛ babaoo lɛ mu Biblia mli wolo ni egbɛ́i kã nɔ lɛ naa. (Amos 9:13-15) Wɔ hu wɔwieɔ Nyɔŋmɔ ‘kojomɔ gbi’ ni baa lɛ he sane wɔtsɔɔ mɛi, shi enɛ ji “maŋtsɛyeli lɛ he sane kpakpa” ni esa akɛ wɔshiɛ lɛ fã ko pɛ kɛkɛ. (2 Pet. 3:7; Mat. 24:14) Mɛi fɔji lɛ ahiɛ ni Yehowa baakpãta yɛ Harmagedon lɛ baasaa gbɛ koni shikpɔŋ lɛ atsɔ paradeiso.—Lala 37:34.
4. Mɛni haa wɔnáa nɔmimaa akɛ wɔbaanyɛ wɔfee Yehowa suɔmɔnaa nii?
4 Eka shi faŋŋ akɛ, Maŋtsɛyeli lɛ he sane lɛ ni wɔshiɛɔ yɛ jeŋ ko ni mɛi babaoo teɔ shi woɔ wɔ lɛ mli lɛ, kaa wɔfai shi ni wɔtswa akɛ wɔbaahi shi yɛ wɔhenɔjɔɔmɔ lɛ naa, ni wɔfee Yehowa suɔmɔnaa nii lɛ. (Yoh. 15:19) Kɛlɛ, wɔyɛ nɔmimaa akɛ, Yehowa baaya nɔ eha wɔ nɔ ni he hiaa wɔ bɔni afee ni wɔnyɛ wɔfee esuɔmɔnaa nii, taakɛ efee eha Amos lɛ.—2 Kor. 3:5.