Nyɛkasea Gbalɔi Lɛ—Hoshea
1. Mɛɛ sane ekolɛ obi ohe pɛŋ?
1 ‘Mɛni misumɔɔ ni mikɛshã afɔle maha Yehowa?’ Ekolɛ obi ohe nakai sane lɛ pɛŋ beni ojwɛŋɔ enijuji fɛɛ ni efeɔ kɛ emɔbɔnalɛ lɛ nɔ lɛ. (Lala 103:2-4; 116:12) Hoshea jɛ esuɔmɔ mli efee nɔ ni Yehowa fã lɛ akɛ efee lɛ, eyɛ mli akɛ no baabi ni ekɛ nibii komɛi ashã afɔle. Mɛɛ gbɛ nɔ wɔɔtsɔ wɔkase Hoshea?
2. Mɛɛ nɔkwɛmɔnɔ kpakpa Hoshea fee yɛ shiɛmɔ nitsumɔ lɛ mli, ni te wɔɔfee tɛŋŋ wɔkase lɛ?
2 Shiɛmɔ yɛ Be ni Ehiii Mli: Mɛi titri ni Hoshea sane lɛ kɔɔ amɛhe ji Israel akutsei nyɔŋma maŋtsɛyeli lɛ, he ni shwɛ fioo ni kulɛ afã anɔkwa jamɔ shishi yɛ lɛ. Maŋtsɛ Yerobeam II fee efɔŋ yɛ Yehowa hiɛ ni ewo mɛi hewalɛ ni amɛkɛ amɛhe awo tsinabi jamɔ ni Yerobeam I lɛ to shishi lɛ mli. (2 Maŋ. 14:23, 24) Maŋtsɛmɛi ni ye nɔ yɛ sɛɛ mli lɛ ha akutsei nyɔŋma maŋtsɛyeli lɛ tee nɔ egbee shi kwraa yɛ mumɔŋ kɛyashi akpata nakai maŋtsɛyeli lɛ hiɛ yɛ afi 740 D.Ŋ.B. Yɛ apasa jamɔ ni ehe shi lɛ fɛɛ sɛɛ lɛ, kɛ́ hooo kwraa lɛ Hoshea kɛ anɔkwayeli sɔmɔ aaafee afii 59 akɛ gbalɔ. Ani wɔ hu wɔtswa wɔfai shi akɛ wɔbaashiɛ be fɛɛ be, kɛ́ wɔkɛ nijiaŋwujee loo shiteekɛwoo po miikpe?—2 Tim. 4:2.
3. Mɛɛ gbɛ nɔ Hoshea shihilɛ lɛ fee Yehowa mɔbɔnalɛ lɛ he mfoniri?
3 Okɛ Ojwɛŋmɔ Ama Yehowa Mɔbɔnalɛ lɛ Nɔ: Yehowa fã Hoshea ni eyaŋɔ ‘yoo ajwamaŋ ni ekɛ lɛ afee eŋa.’ (Hosh. 1:2) Eyɛ mli akɛ Gomer ni ji eŋa lɛ kɛ lɛ fɔ bi kome moŋ, shi sɛɛ mli lɛ eje esɛɛ ni ekɛ nuu kroko hu yafɔ bii enyɔ. Bɔ ni Hoshea jɛ esuɔmɔ mli ekɛ eŋa lɛ he eshai fa lɛ lɛ fee bɔ ni Yehowa jie mɔbɔnalɛ kple kpo etsɔɔ Israelbii toigbolɔi lɛ beni amɛtsake amɛtsui lɛ he mfoniri. (Hosh. 3:1; Rom. 9:22-26) Ani wɔfee klalo akɛ wɔkɛ nibii komɛi ni wɔsumɔɔ lɛ baashã afɔle bɔni afee ni wɔgba mɛi srɔtoi fɛɛ Yehowa mɔbɔnalɛ lɛ he sane?—1 Kor. 9:19-23.
4. Mɛɛ nibii komɛi wɔbaanyɛ wɔkɛshã afɔle wɔha Yehowa?
4 Yehowa tsuji komɛi kɛ nitsumɔ ni amɛnáa shika babaoo yɛ mli lɛ eshã afɔle bɔni afee ni amɛná be babaoo kɛshiɛ. Amɛteŋ mɛi komɛi hu ehi shi akɛ oshijafoi loo mɛi ni fɔɔɔ bɔni afee ni amɛtiu Maŋtsɛyeli lɛ he nibii lɛ asɛɛ. Kɛ́ wɔjwɛŋ Hoshea shihilɛ he lɛ, ekolɛ wɔbaakɛɛ wɔhe akɛ, ‘Minyɛŋ mafee nɔ ni efee lɛ kɔkɔɔkɔ.’ Kɛlɛ, kɛ́ wɔtee nɔ wɔná hiɛsɔɔ wɔha Yehowa duromɔ lɛ, ní wɔkɛ wɔhe fɔ̃ emumɔ krɔŋkrɔŋ lɛ nɔ kɛha hewalɛ lɛ, ekɛ wɔ baatsu nii yɛ gbɛ ni wɔsusuko he dã lɛ nɔ tamɔ ekɛ Hoshea tsu lɛ pɛpɛɛpɛ.—Mat. 19:26; Fil. 2:13.