Te Yehowa Naa Mi Tɛŋŋ?
1. Mɛni hewɔ akɛ Biblia lɛ toɔ ashwishwɛ he lɛ?
1 Shii enyiɛ okwɛɔ ashwishwɛ mli? Wɔteŋ mɛi babaoo feɔ nakai daa gbi, ejaakɛ eyeɔ ebuaa wɔ ni wɔnaa bɔ ni wɔhesaamɔ ji kɛ hei ni esa akɛ wɔjaje. Akɛ Biblia lɛ toɔ ashwishwɛ he. Kɛ́ wɔkane Nyɔŋmɔ Wiemɔ lɛ, eyeɔ ebuaa wɔ ni wɔnaa bɔ ni wɔji yɛ mligbɛ, ni ji bɔ ni Yehowa naa wɔ ehãa. (1 Sam. 16:7; Yak. 1:22-24) Nyɔŋmɔ Wiemɔ lɛ ji “tsuiiaŋ susumɔi kɛ jwɛŋmɔi lɛ akojolɔ.” (Heb. 4:12) Kɛ́ wɔkane Biblia lɛ ni wɔjwɛŋ nɔ daa gbi lɛ, mɛɛ gbɛ nɔ ebaaye ebua wɔ ni wɔna tsakemɔi ni esa akɛ wɔfee koni wɔnyɛ wɔya wɔhiɛ akɛ sane kpakpa shiɛlɔi?—Lala 1:1-3.
2. Mɛɛ gbɛ nɔ Biblia lɛ baanyɛ aye abua wɔ koni wɔna tsakemɔi ni esa akɛ wɔfee?
2 Okɛ Biblia lɛ Atsu Nii Tamɔ Ashwishwɛ: Yehowa tsuji anɔkwafoi ahe saji ni yɔɔ Biblia lɛ mli lɛ hãa wɔleɔ sui ni Yehowa náa he miishɛɛ. Akɛ nɔkwɛmɔnɔ lɛ, David kɛ ekãa fã Nyɔŋmɔ gbɛ́i lɛ he. (1 Sam. 17:45, 46) Ekãa ni Yesaia yɔɔ lɛ tsirɛ lɛ ni ekɛ ehe hã akɛ ebaashiɛ yɛ hei ni mɛi booo sane lɛ toi yɛ. (Yes. 6:8, 9) Suɔmɔ ni mli wa ni Yesu yɔɔ kɛhã eŋwɛi Tsɛ lɛ hãaa ebu eshiɛmɔ nitsumɔ lɛ akɛ jatsu, no najiaŋ lɛ ebu lɛ nɔ ko ni hãa etsui nyɔɔ emli ni hãa enáa miishɛɛ. (Yoh. 4:34) Kristofoi ni hi shi yɛ klɛŋklɛŋ afii 100 lɛ mli lɛ kɛ ekãa shiɛ, amɛkɛ amɛhiɛ fɔ̃ Yehowa nɔ, ni amɛtswa amɛfai shi akɛ amɛbaaya nɔ amɛshiɛ yɛ shiteekɛwoo fɛɛ sɛɛ. (Bɔf. 5:41, 42; 2 Kor. 4:1; 2 Tim. 4:17) Kɛ́ wɔjwɛŋ nɔkwɛmɔnii ni tamɔ enɛɛmɛi anɔ lɛ, ehãa wɔnaa tsakemɔi ni esa akɛ wɔfee koni wɔnyɛ wɔya wɔhiɛ yɛ wɔsɔɔmɔ krɔŋŋ lɛ mli.
3. Mɛni hewɔ esa akɛ wɔfee tsakemɔi ni he hiaa lɛ amrɔ nɔŋŋ lɛ?
3 Feemɔ Tsakemɔi ni He Hiaa Lɛ: Kɛ́ wɔkwɛ ashwishwɛ mli ni wɔfeee tsakemɔi ni he hiaa lɛ, no lɛ wɔnaŋ he sɛɛ. Wɔbaanyɛ wɔsɔle wɔbi Yehowa ni eye ebua wɔ ni wɔna bɔ ni wɔji diɛŋtsɛ, ni eye ebua wɔ ni wɔfee tsakemɔi ni he hiaa lɛ. (Lala 139:23, 24; Luka 11:13) Akɛni be ni eshwɛ lɛ faaa dɔŋŋ, ni mɛi awala yɛ oshara mli hewɔ lɛ, esa akɛ wɔfee tsakemɔi ni he hiaa lɛ amrɔ nɔŋŋ.—1 Kor. 7:29; 1 Tim. 4:16.
4. Kɛ́ mɔ ko kwɛ Nyɔŋmɔ Wiemɔ lɛ mli ni efee tsakemɔi ni he hiaa lɛ, te enáa he sɛɛ tɛŋŋ?
4 Bɔ ni mɔ ko ji yɛ mligbɛ, ni ji bɔ ni Yehowa naa lɛ ehãa lɛ, he miihia kwraa fe bɔ ni eji yɛ kponɔgbɛ. (1 Pet. 3:3, 4) Kɛ́ mɔ ko kwɛ Nyɔŋmɔ Wiemɔ lɛ mli, ni efee tsakemɔi ni he hiaa lɛ, te enáa he sɛɛ tɛŋŋ? Biblia lɛ kɛɔ akɛ, “Ejeee mɔ ni nuɔ ni ehiɛ kpaa nɔ, shi moŋ eji nɔyelɔ ni tsuɔ he nii,” ni “nakai mɔ lɛ aaajɔɔ lɛ yɛ enɔyeli lɛ mli.” (Yak. 1:25) Hɛɛ, abaajɔɔ wɔ ni wɔbaatsɔmɔ shiɛlɔi ni he esa waa, ejaakɛ “wɔjieɔ Yehowa anunyam lɛ kpo tamɔ ashwishwɛ.”—2 Kor. 3:18, NW.