Nyɛkasea Gbalɔi Lɛ—Nahum
1. Mɛni wɔkaseɔ kɛjɛɔ Nahum wolo lɛ mli?
1 Ninive maŋ ni etsɔ amaŋfɔ̃ lɛ ji odaseyeli ni tsɔɔ akɛ Yehowa tɔɔ ehe owele yɛ ehenyɛlɔi lɛ anɔ, taakɛ Nahum gba lɛ, ni akɛ ehenyɛlɔi ni he wa fe fɛɛ lɛ po nyɛŋ ehiɛ adamɔ. (Nah. 1:2, 6) Kɛ́ wɔpɛi Nahum gbalɛ lɛ mli lɛ, wɔbaakase nibii komɛi ni wɔbaanyɛ wɔkɛtsu nii yɛ shiɛmɔ nitsumɔ lɛ mli.
2. Mɛni baahã sane ni wɔshiɛɔ lɛ afee nɔ ni shɛjeɔ mɔ mii ni hãa hiɛnɔkamɔ?
2 Shɛjemɔ Mɛi Amii ni Ohã Amɛná Hiɛnɔkamɔ: Kɛ́ okane Nahum wolo lɛ klɛŋklɛŋ kwraa lɛ, etamɔ nɔ Ninive, ni ji blema Ashurbii lɛ amaŋtiase ni amɛkɛshiɔ amɛtsitsi lɛ he fɔbuu kojomɔi sɔŋŋ ji nɔ ni yɔɔ mli. (Nah. 1:1; 3:7) Kɛ̃lɛ, Yehowa webii lɛ ná fɔbuu kojomɔi nɛɛ ahe miishɛɛ waa. Nahum, ni egbɛ́i lɛ shishi ji “Miishɛjelɔ” lɛ, hã enanemɛi Yudafoi lɛ ná nɔmimaa akɛ etsɛŋ, abaakpata amɛhenyɛlɔi lɛ ahiɛ! Kɛfata he lɛ, Nahum ma nɔ mi akɛ Yehowa lɛ, “mɔɔ ni wa ji lɛ yɛ fimɔ gbi nɔ.” (Nah. 1:7) Be ni wɔshiɛɔ lɛ, wɔ hu wɔjajeɔ sane kpakpa, ni wɔwoɔ mɛi hewalɛ ni amɛba Yehowa abo.—Nah. 2:1.
3. Mɛɛ gbɛ nɔ Nahum kɛ nɔkwɛmɔnii tsu nii, ni te wɔɔfee tɛŋŋ wɔkase lɛ?
3 Okɛ Nɔkwɛmɔnii Atsu Nii: Yehowa kɛ emumɔ lɛ tsirɛ Nahum ni ekɛ bɔ ni Ninive maŋtiase lɛ naagbee baafee lɛ to bɔ ni Thebes (No-amon), ni ji Mizraim maŋtiase ko ni Ashurbii lɛ diɛŋtsɛ kpata hiɛ lɛ naagbee fee lɛ he. (Nah. 3:8-10) Be ni wɔwieɔ jeŋ fɔŋ nɛɛ naagbee lɛ he wɔtsɔɔ mɛi lɛ, wɔbaanyɛ wɔtsɔɔ amɛ Biblia mli gbalɛi ni hãa anaa akɛ Yehowa hãa ewiemɔi fɛɛ baa mli pɛpɛɛpɛ. Akɛ nɔkwɛmɔnɔ lɛ, be ni Babilonbii lɛ kɛ Mediabii lɛ yatutua Ninive maŋtiase lɛ yɛ afi 632 D.Ŋ.B. lɛ, nugbɔ ko ni nɛ waa lɛ hã Tigris Faa lɛ je ŋa, ni enɛ hã maŋ lɛ gbogboi ni kwɔlɔ waa lɛ fã ko wule eshwie shi. Eyeee be ko ni abutu Ninive maŋtiase lɛ, taakɛ Yehowa egba lɛ pɛpɛɛpɛ.—Nah. 1:8; 2:7.
4. Yɛ shiɛmɔ nitsumɔ lɛ mli lɛ, mɛni wɔbaanyɛ wɔfee kɛtsɔɔ akɛ wɔkɛ wiemɔi ni yɔɔ faŋŋ ni shishinumɔ waaa miitsu nii?
4 Okɛ Wiemɔi ni Yɔɔ Faŋŋ ni Shishinumɔ Waaa Atsu Nii: Bɔ ni Nahum ŋma ewolo lɛ ehã lɛ hewɔ lɛ, ewaaa akɛ obaafee nibii srɔtoi ni ewie he lɛ ahe mfoniri yɛ ojwɛŋmɔŋ ni okɛ ohe awo shihilɛi ni ewie he lɛ amli. Otii ni ewie he lɛ hu yɛ faŋŋ. (Nah. 1:14; 3:1) Wɔ hu wɔmiisumɔ ni wɔkɛ wiemɔi ni shishinumɔ waaa atsu nii. (1 Kor. 14:9) Kɛ́ otee mɔ ko ŋɔɔ klɛŋklɛŋ kwraa lɛ, esa akɛ ogbala nɔ hewɔ ni oba eŋɔɔ lɛ mli faŋŋ ohã lɛ. Kɛ́ okɛ mɛi miikase Biblia lɛ, ye obua amɛ ni amɛná hemɔkɛyeli yɛ Yehowa kɛ e-Wiemɔ lɛ mli, ni ohã amɛna bɔ ni amɛbaafee amɛkɛ nibii ni amɛkaseɔ lɛ atsu nii yɛ amɛshihilɛ mli.—Rom. 10:14.
5. Mɛɛ nɔmimaa Nahum gbalɛ lɛ hãa wɔnáa?
5 Nahum wolo lɛ hãa wɔnaa akɛ, ená hemɔkɛyeli akɛ bɔ fɛɛ bɔ ni fee lɛ, nibii ni Yehowa ewie lɛ fɛɛ baaba mli. Be ni Satan jeŋ fɔŋ nɛɛ naagbee bɛŋkɛɔ lɛ, sane ni ajɛ mumɔŋ aŋma nɛɛ shɛjeɔ wɔmii, akɛ: “Fimɔ eteŋ shi nɔ ni ji shii enyɔ.”—Nah. 1:9.