Ná Hesai Pii yɛ Shiɛmɔ Nitsumɔ lɛ Mli—Fó Mɛi Krokomɛi Anɔ Mli

Nɔ Hewɔ ni Ehe Hiaa: Yesu kɛ mɛi ye akɛ aŋkroaŋkro, ni ejɛ suɔmɔ mli esusu amɛhe. Akɛ nɔkwɛmɔnɔ lɛ, be ko be ni Yesu baatsa toimulɔ ko lɛ, eeenyɛ efee akɛ ena akɛ nuu lɛ hiɛ miigbo, no hewɔ lɛ ekɛ lɛ je asafo lɛ teŋ kɛtee afã ni etsa lɛ. (Mar. 7:31-35) Akɛni Yesu susu ekaselɔi lɛ ahe hewɔ lɛ, enyɛ eyɔse he ni amɛnyɛmɔi yawaa, no hewɔ lɛ ekɛ saji babaoo gbaaa amɛnaa. (Yoh. 16:12) Be ni eyɔɔ ŋwɛi po lɛ, efó mɛi krokomɛi anɔ mli. (2 Tim. 4:17) Akɛ Kristo sɛɛnyiɛlɔi lɛ, wɔmiisumɔ ni wɔkase lɛ. (1 Pet. 2:21; 1 Yoh. 3:16, 18) Kɛfata he lɛ, kɛ́ wɔsusu shiatsɛ lɛ he, ni wɔyɔse shihilɛ mli ni eyɔɔ, nibii ni enyaa he kɛ nibii ni gbaa enaa lɛ, wɔshiɛmɔ nitsumɔ lɛ baamɔ shi jogbaŋŋ. Kɛ́ shiatsɛ lɛ yɔse akɛ wɔbaaa ni wɔkɛ sane ko abahã lɛ loo ni wɔshi wolo ko wɔhã lɛ kɛkɛ, shi moŋ wɔsusuɔ ehe diɛŋtsɛ lɛ, ekã shi faŋŋ akɛ ebaabo wɔ toi.

Bɔ ni Obaafee lɛ Ohã:

Saamɔ ohe jogbaŋŋ. Kaafee kpɛŋŋ, feemɔ ohiɛ ŋmɔlɔŋmɔlɔ, ni ojie naanyobɔɔ su kpo.
Okɛ ohiɛ afɔ̃ shi. Ani nɔ ko yɛ ni tsɔɔ akɛ mɔ lɛ yɛ bii? enyaa ŋmɔfeemɔ he aloo eyɛ shĩa kooloi? ni akɛ, eyɛ jamɔ pɔtɛɛ ko mli? Obaanyɛ otsake ohiɛkpamɔ wiemɔ lɛ mli ni ekɔ eshihilɛ lɛ he.
Bi esusumɔ, ni obo lɛ toi jogbaŋŋ be ni ewieɔ lɛ, ni kaafolɔ mli bɔ ni esaaa. Kwɛmɔ ehiɛ be ni ewieɔ lɛ, koni ena akɛ oobo lɛ toi. Kpɛlɛmɔ nɔ ni ebaakɛɛ lɛ nɔ, ni ojɛ otsuiŋ ojie eyi kɛ́ ebaahi. Okɛ lɛ akataa saji anaa.
Tsakemɔ owiemɔ lɛ mli. Kɛ́ ebaahi lɛ, tsakemɔ oshiɛmɔ wiemɔ lɛ mli koni ekɔ eshihilɛ lɛ he. Ekolɛ obaasusu akɛ efeemɔ wa, shi ewaaa kwraa, ejaakɛ wɔdɛhiɛmɔ woji lɛ, woji bibii lɛ, kɛ woji tɛtrɛbii lɛ wieɔ saji srɔtoi babaoo ahe. Kɛ́ be ni otee jɛmɛ lɛ jeee be ni sa, tamɔ ekolɛ ebɛ dekã, ni oyɔse nakai lɛ hã osane lɛ afee kuku.

Kaa Enɛ Okwɛ yɛ Nyɔɔŋ Nɛɛ Mli:

Nyɛfea nɔkwɛmɔnɔ ni tsɔɔ bɔ ni esa akɛ shiɛlɔ lɛ atsake eshiɛmɔ wiemɔ lɛ mli koni ekɔ nɔ ko ni shiatsɛ lɛ wie lɛ he yɛ nyɛweku jamɔ lɛ mli, loo ekolɛ be ni nyɛnyiɛ shiɛmɔ nɔ.
Kɛ́ aafee kpee kɛhã shiɛmɔyaa lɛ, bei komɛi lɛ, nyɛminuu ni kwɛɔ nɔ lɛ baanyɛ atsɔɔ gbɛi ni abaanyɛ atsɔ afó mɛi krokomɛi anɔ mli loo ehã afee nɔkwɛmɔnɔ ni tsɔɔ nakai.