Afi 2015 Teokrase Sɔɔmɔ Skul lɛ Baaye Abua Wɔ ni Wɔya Wɔhiɛ yɛ Wɔnitsɔɔmɔ Mli

¹ Lalatsɛ David ŋma akɛ: “Hã midaaŋ wiemɔi kɛ mitsui mli jwɛŋmɔi asa ohiɛ, Yehowa, mitɛsaa kɛ mikpɔ̃lɔ!” (Lala 19:15) Wɔ hu wɔmiisumɔ ni wɔwiemɔi asa Yehowa hiɛ, ejaakɛ wɔbuɔ hegbɛ ni wɔná akɛ wɔɔwie anɔkwale lɛ he yɛ asafo lɛ kɛ shiɛmɔ nitsumɔ lɛ mli lɛ akɛ hegbɛ kpele. Teokrase Sɔɔmɔ Skul ji gbɛ kome ni Yehowa tsɔɔ nɔ etsɔseɔ wɔ koni wɔhe asa yɛ shiɛmɔ nitsumɔ lɛ mli. Tsɔsemɔ nɛɛ yaa nɔ daa otsi yɛ asafoi ni fa fe 111,000 mli yɛ jeŋ fɛɛ. Eye ebua nyɛmimɛi hii kɛ yei ni yɔɔ je lɛŋ fɛɛ, ni jɛ shihilɛi srɔtoi amli lɛ koni amɛhe asa jogbaŋŋ akɛ sane kpakpa shiɛlɔi ni nyɛɔ amɛkɛ yiŋtsɔmɔ, hiɛshikamɔ, kɛ ekãa tsɔɔ nii.​—Bɔf. 19:8; Kol. 4:6.

² Woji ni akɛbaatsu nii yɛ skul he gbɛjianɔtoo kɛhã afi 2015 lɛ mli lɛ ekomɛi ji, Nyɔŋmɔ Wiemɔ lɛ Mlibotemɔ wolo bibioo lɛ, Sanekpakpa ni Jɛ Nyɔŋmɔ Ŋɔɔ! wolo bibioo lɛ, kɛ saji ni ajie kɛjɛ Mi-Wolo ni Gbaa Biblia Mli Saji wolo lɛ mli lɛ. Kɛfata he lɛ, afee tsakemɔi yɛ be ni akɛfeɔ Biblia kanemɔ mli saji otii lɛ kɛ Nifeemɔ ni Ji 1 lɛ mli. Abaasusu tsakemɔi nɛɛ kɛ bɔ ni abaatsu skul nifeemɔi lɛ ahe nii ahã lɛ he yɛ kukuji ni nyiɛ sɛɛ lɛ amli.

³ Biblia Kanemɔ Mli Saji Otii: Nyɛmimɛi hii ni baatsu fã nɛɛ he nii lɛ kɛ minitii enyɔ baawie oti kome ni sa ni abaanyɛ akase nɔ ko kɛjɛ mli ni ená kɛjɛ Biblia kanemɔ kɛhã otsi lɛ mli lɛ he. Kɛ́ nifeemɔ lɛ baanyɛ amɔ shi ni ayeee be lɛ, ebaabi ni mɔ ni baatsu he nii lɛ asaa ehe jogbaŋŋ. No sɛɛ lɛ, asafo lɛ baana minitii ekpaa kɛtsɔɔ nɔ ni amɛkase yɛ otsi lɛ Biblia kanemɔ lɛ mli, ni mɔ fɛɛ mɔ baawie sɛkɛnsii 30 loo nɔ ni shɛɛɛ nakai. Ja wɔsaa wɔhe jogbaŋŋ ni wɔtsɔse wɔhe dani wɔbaanyɛ wɔkɛ sɛkɛnsii 30 ahã sane hetoo ni mɔɔ shi, shi nakai feemɔ hu ji tsɔsemɔ. Ehãa mɛi krokomɛi hu náa be kɛwieɔ nɔ ni amɛkase be ni amɛfeɔ niiamlitaomɔ lɛ.

⁴ Nifeemɔ ni Ji 1: Atse be ni akɛfeɔ Biblia kanemɔ lɛ nɔ kɛba minitii etɛ loo nɔ ni shɛɛɛ nakai, ni nɔ ni amɛbaakane lɛ faŋ tsɔ. Esa akɛ mɛi ni baakane ŋmalɛ lɛ akane mli shii abɔ kɛsaa amɛhe, ni amɛkane ni eje kpo ni amɛkwɛ bɔ ni atsɛɔ wiemɔi lɛ jogbaŋŋ ni etsara nɔ hu, bɔ ni afee ni shishinumɔ ni yɔɔ sɛɛ lɛ afee faŋŋ. Akɛni nikanemɔ tsuɔ gbɛfaŋnɔ ko ni he hiaa waa yɛ wɔjamɔ lɛ mli hewɔ lɛ, esa akɛ Yehowa webii fɛɛ abɔ mɔdɛŋ ni amɛkane nii jogbaŋŋ. Eŋɔɔ wɔnaa waa akɛ wɔbii bibii lɛ ateŋ mɛi babaoo kaneɔ nii jogbaŋŋ! Fɔlɔi sa yijiemɔ waa yɛ mɔdɛŋ ni amɛbɔɔ kɛyeɔ amɛbuaa amɛbii lɛ koni amɛkane nii jogbaŋŋ lɛ hewɔ.

⁵ Nifeemɔ ni Ji 2: Nyɛmiyoo ko kɛ minitii enumɔ baatsu he nii. Esa akɛ ekɛ saneyitso ni akɛhã lɛ lɛ atsu nii. Kɛ́ ajie nifeemɔ lɛ kɛjɛ Nyɔŋmɔ Wiemɔ lɛ Mlibotemɔ wolo bibioo lɛ loo Sanekpakpa ni Jɛ Nyɔŋmɔ Ŋɔɔ! wolo bibioo lɛ mli lɛ, esa akɛ ehã ekɔ shihilɛ ko ni abaanyɛ akɛkpe yɛ nyɛsafo lɛ shikpɔŋkuku lɛ mli yɛ shiɛmɔ nitsumɔ lɛ mli lɛ he. Kɛ́ nifeemɔ lɛ damɔ saji ni yɔɔ Mi-Wolo ni Gbaa Biblia Mli Saji wolo lɛ mli lɛ nɔ lɛ, esa akɛ skulnyo lɛ akase sane ni yɔɔ jɛmɛ lɛ, ehala ŋmalɛi ni sa ni ekɛbaatsu nii, ni etsɔɔ nɔ ni abaanyɛ akase kɛjɛ Biblia mli sane lɛ mli. Abaanyɛ akɛ ŋmalɛi krokomɛi ni wieɔ saneyitso lɛ he lɛ afata he. Skul nɔkwɛlɔ lɛ ji mɔ ni baahã lɛ shianyɛ.

⁶ Nifeemɔ ni Ji 3: Nyɛmi nuu loo nyɛmi yoo ko kɛ minitii enumɔ baatsu he nii. Kɛ́ akɛ nifeemɔ nɛɛ hã nyɛmi yoo lɛ, esa akɛ etsu he nii tamɔ Nifeemɔ ni Ji 2 lɛ nɔŋŋ. Kɛ́ akɛ nifeemɔ nɛɛ hã nyɛmi nuu, ni edamɔ Mi-Wolo ni Gbaa Biblia Mli Saji wolo lɛ nɔ lɛ, esa akɛ etsu he nii akɛ wiemɔ ni ahãa, ni ehã ekɔ toibolɔi lɛ ahe. Esa akɛ skulnyo lɛ ato nifeemɔ ni akɛhã lɛ he gbɛjianɔ, ni ehala ŋmalɛi ni sa ni ekɛbaatsu nii, ni etsɔɔ nɔ ni abaanyɛ akase kɛjɛ Biblia mli sane lɛ mli.

⁷ Nɔ ko Hee ni Nyɛmimɛi Hii Baatsu He Nii yɛ Nifeemɔ ni Ji 3 lɛ Mli: Kɛ́ nifeemɔ lɛ damɔ sane ni yɔɔ Nyɔŋmɔ Wiemɔ lɛ Mlibotemɔ wolo bibioo lɛ loo Sanekpakpa ni Jɛ Nyɔŋmɔ Ŋɔɔ! wolo bibioo lɛ mli lɛ nɔ lɛ, esa akɛ atsu he nii tamɔ weku jamɔ loo shiɛmɔ nitsumɔ lɛ he nɔkwɛmɔnɔ. Bei pii lɛ skul nɔkwɛlɔ lɛ baatsɔɔ mɔ ni ekɛbaafee, kɛ shihilɛ mli ni abaafee yɛ. Esa akɛ mɔ ni ekɛbaafee lɛ afee skulnyo lɛ weku lɛ mli nyo aloo nyɛmi nuu kroko ni yɔɔ asafo lɛ mli. Abaanyɛ akɛ ŋmalɛi krokomɛi ni wieɔ Biblia mli shishitoo mlai ahe ni kɔɔ saneyitso lɛ he lɛ afata he. Yɛ be kɛ beaŋ lɛ, abaanyɛ akɛ nifeemɔ nɛɛ ahã asafoŋ onukpa ko ni etsu he nii. Asafoŋ onukpai lɛ baanyɛ ahala mɛi ni amɛkɛbaafee kɛ shihilɛ mli ni amɛbaafee yɛ. Ŋwanejee ko bɛ he akɛ kɛ́ asafoŋbii lɛ na bɔ ni asafoŋ onukpa ko tsɔɔ eweku lɛ mli nyo ko loo nyɛmi nuu kroko nii jogbaŋŋ lɛ, ebaawo amɛ hewalɛ waa.

⁸ Ŋaawoo: Kɛ́ skulbii lɛ eko fɛɛ eko gbe enifeemɔ lɛ naa lɛ, skul nɔkwɛlɔ lɛ kɛ minitii enyɔ baajie mɔ lɛ yi ni ekɛ ŋaawoo ni sa jogbaŋŋ hu ni damɔ Ná Teokrase Sɔɔmɔ Skul Tsɔsemɔ lɛ He Sɛɛ wolo lɛ nɔ lɛ baahã lɛ. Kɛ́ skul nɔkwɛlɔ lɛ tsɛ skulnyo ko ni ebatsu efã lɛ he nii lɛ, etsiŋ wiemɔ su ni skulnyo lɛ baatsu he nii lɛ tã. Kɛ́ skulnyo fɛɛ skulnyo gbe enifeemɔ lɛ naa lɛ, esa akɛ skul nɔkwɛlɔ lɛ ajɛ anɔkwayeli mli ejie eyi, ewie oti ni skulnyo lɛ tsu he nii lɛ he, ni etsɔɔ nɔ hewɔ ni skulnyo lɛ tsu he nii jogbaŋŋ lɛ, aloo ejɛ mlihilɛ mli etsɔɔ nɔ hewɔ ni kɛ́ skulnyo lɛ bɔ mɔdɛŋ etsu oti lɛ he nii jogbaŋŋ be kroko lɛ ebaaye ebua lɛ waa lɛ.

⁹ Skulnyo fɛɛ skulnyo baanyɛ ana eŋaawoo wolo lɛ yɛ Sɔɔmɔ Skul wolo lɛ baafa 79 kɛyashi 81. Kɛ́ skulnyo lɛ gbe enifeemɔ lɛ naa lɛ, skul nɔkwɛlɔ lɛ baaŋmala nibii ni sa lɛ yɛ skulnyo lɛ wolo lɛ mli, ni ebaabi lɛ kɛji enyɛ efee nifeemɔ ni kɔɔ wiemɔ su ni akɛhã lɛ ni etsu he nii lɛ he lɛ. Skul nɔkwɛlɔ lɛ baanyɛ ejie skulnyo lɛ yi loo ekɛ yelikɛbuamɔ krokomɛi ni sa lɛ ahã lɛ kɛ́ akpa kpee lɛ loo yɛ be kroko mli. Esa akɛ skulnyo fɛɛ skulnyo ayɔse akɛ yelikɛbuamɔ ni skul nɔkwɛlɔ lɛ kɛhãa lɛ lɛ ji hegbɛ kpele ni ená ni ekɛbaaya ehiɛ yɛ mumɔŋ.​—1 Tim. 4:15.

¹⁰ Kɛ́ skulnyo ko miiye be fe nine lɛ, skul nɔkwɛlɔ lɛ loo esɛɛkwɛlɔ lɛ atsɔ ŋaa gbɛ nɔ ekɛ okadi ko atsɔɔ akɛ ebe eshɛ, tamɔ ekolɛ ekɛ enane ashi shi loo etswa nɔ ko. Esa akɛ skulnyo lɛ ayɔse okadi ni abaafee lɛ ni emu ewiemɔ lɛ naa ni eshi wiemɔ kpoku lɛ nɔ.​—Kwɛmɔ Sɔɔmɔ Skul wolo lɛ, bf. 282, kk. 4.

¹¹ Aawo mɛi fɛɛ ni shɛɔ taomɔnii kɛhã Teokrase Sɔɔmɔ Skul lɛ hewalɛ ni amɛkɛ amɛhe awo mli. (Kwɛmɔ Sɔɔmɔ Skul wolo, bf. 282, kk. 6.) Tsɔsemɔ ni skul nɛɛ kɛhãa lɛ eye ebua Yehowa webii ni amɛkɛ nɔmimaa, bulɛ, kɛ suɔmɔ eshiɛ Maŋtsɛyeli lɛ he sane kpakpa lɛ, ni amɛtsɔɔ mɛi hu. Ŋwanejee ko bɛ he akɛ Yehowa hiɛ sɔɔ yijiemɔ ni mɛi fɛɛ ni náa teokrase skul lɛ he sɛɛ lɛ kɛhãa lɛ lɛ waa!​—Lala 148:12, 13; Yes. 50:4.