Ná Hesai Pii yɛ Shiɛmɔ Nitsumɔ lɛ Mli—Bɔ ni Esa akɛ Wɔjie Shiatsɛ ko ni Mli Efu lɛ Naa

Nɔ Hewɔ ni Ehe Hiaa: Mɛi ni wɔkɛkpeɔ yɛ shiɛmɔ nitsumɔ lɛ mli lɛ ateŋ mɛi babaoo he jɔ. Kɛ̃lɛ, Yesu gba akɛ mɛi baanyɛ wɔ. (Yoh. 17:14) No hewɔ lɛ, esaaa akɛ efeɔ wɔ naakpɛɛ kɛ́ shiatsɛ ko mli fu wɔ. Kɛ́ eba lɛ nakai lɛ, esa akɛ wɔfee wɔnii bɔ ni baatsɔɔ akɛ wɔmiisumɔ ni wɔsa mɔ ni wɔdamɔ enajiaŋ ni ji Yehowa lɛ hiɛ. (Rom. 12:17-21; 1 Pet. 3:15) Kɛ́ wɔfee nakai lɛ, ehãŋ etsɔ naataamɔ. Ebaafee odaseyeli kɛhã shiatsɛ lɛ kɛ mɔ fɛɛ mɔ ni miina nɔ ni yaa nɔ lɛ, ni ebaahã amɛná he miishɛɛ akɛ be kroko ni Yehowa Odasefonyo ko baaba amɛŋɔɔ lɛ, amɛbo lɛ toi.—2 Kor. 6:3.

Bɔ ni Obaafee lɛ Ohã:

Feemɔ kpoo, ni ojie naanyobɔɔ su kpo. Enɛ baahã mlifu lɛ naa aba shi. Kaasusu akɛ shiatsɛ lɛ kɛ bo ená. (Jaj. 7:9) Ekolɛ naagba ko hewɔ emli efu lɛ, aloo ekolɛ be ni otee eŋɔɔ lɛ ni ehiii. Kɛ́ wɔsane lɛ hewɔ po ni emli efu lɛ, esa akɛ wɔkai akɛ bei pii lɛ lakamɔ ni alaka lɛ lɛ hewɔ efeɔ enii nakai lɛ.—2 Kor. 4:4.
Okɛ naajɔlɛ kɛ wiemɔi ni sa ajie lɛ naa. (Abɛi 15:1) Ani ekolɛ otsiɛ lɛ yɛ wɔ mli, aloo eefee nɔ ko ni oyafo mli? Eyɛ mli akɛ wɔkpaaa mɛi fai yɛ wɔnitsumɔ lɛ he moŋ, shi wɔbaanyɛ wɔjɛ heshibaa mli ni wɔkpa lɛ fai akɛ wɔba eŋɔɔ yɛ be ni esaaa mli. Ani sane ko ni ejaaa ni enu yɛ wɔhe lɛ hewɔ emli efu lɛ? Kɛ́ nakai lɛ, obaanyɛ okɛɛ lɛ akɛ: “Manyɛ manu nɔ hewɔ ni sane nɛɛ gbaa onaa lɛ shishi. Shi etamɔ nɔ ni sane ni onu yɛ wɔhe lɛ ejaaa. Obaasumɔ ni magbala mli matsɔɔ bo?” Ani ekpɛlɛɛɛ wɔhemɔkɛyelii lɛ eko nɔ, tamɔ nɔ ni kɔɔ mɔ shwiemɔ loo lá he lɛ nɛkɛ? Obaanyɛ okɛɛ lɛ akɛ: “Minuɔ bo shishi. Jeee bo pɛ sane ni tamɔ nɛkɛ lɛ gbaa enaa. Ani obaasumɔ ni matsɔɔ bo kɛjɛ Biblia lɛ mli nɔ hewɔ ni wɔfeɔ nakai lɛ?”
Kɛ́ mɔ lɛ mli efu waa lɛ, ebaafee nɔ ni hi akɛ obaashi jɛmɛ kpoo, ni ojieee saji anaa. Kɛ́ ekɛɛ esumɔɔɔ ni Yehowa Odasefoi baa eŋɔɔ dɔŋŋ lɛ, obaanyɛ ohã ele akɛ wɔbaatsu enibimɔ lɛ he nii.

Kaa Enɛ Okwɛ yɛ Nyɔɔŋ nɛɛ Mli:

Nyɛfea he nɔkwɛmɔnɔ yɛ nyɛweku jamɔ mli.
Be ni nyɛshi shiatsɛ ko ni mli efu waa lɛ ŋɔɔ lɛ, okɛ mɔ ni okɛnyiɛ lɛ asusu bɔ ni kulɛ nyɛbaanyɛ nyɛjie lɛ naa jogbaŋŋ lɛ he.