Ná Hesai Pii yɛ Shiɛmɔ Nitsumɔ lɛ Mli—Ye Odase yɛ Hei ni Nitsumɔhei Yɔɔ

Nɔ Hewɔ ni Ehe Hiaa: Akɛni mɛi babaoo kɛ bei pii tsuɔ nii hewɔ lɛ, gbɛ ni hi fe fɛɛ ni wɔbaanyɛ wɔtsɔ nɔ wɔkɛ Maŋtsɛyeli sane lɛ ahã amɛ ji ni wɔɔye amɛ odase yɛ amɛnitsumɔhei. Kɛ́ wɔyaye odase yɛ hei ni nitsumɔhei yɔɔ lɛ, wɔnáa miishɛɛ ni ewoɔ yibii hu, ejaakɛ wɔnáa mɛi wɔyeɔ amɛ odase, ni akɛni nitsulɔi lɛ susuɔ akɛ wɔba ni wɔkɛ amɛ abaye jara hewɔ lɛ amɛtseɔ amɛhiɛ amɛhaã wɔ. Bɔ ni afee ni shiɛmɔ ni wɔshiɛɔ yɛ hei ni nitsumɔhei yɔɔ lɛ awo yibii kpakpai lɛ, esa akɛ shiɛlɔi kɛ hiɛshikamɔ atsu nii, amɛhiɛ amɛhe falefale, ni amɛwo atadei ni sa. (2 Kor. 6:3) No hewɔ lɛ, esa akɛ shiɛmɔ nitsumɔ nɔkwɛlɔ lɛ ato shiɛmɔ nitsumɔ lɛ fã nɛɛ he gbɛjianɔ ni etsɔɔ shii abɔ ni esa akɛ ayashiɛ yɛ hei ni nitsumɔhei yɔɔ lɛ. Kɛfata he lɛ, esa akɛ ekwɛ ni mɛi ni sa ayashiɛ yɛ hei nɛɛ.

Bɔ ni Obaafee lɛ Ohã:

Saamɔ ohe oto kɛ shiɛmɔ wiemɔ ni yɔɔ kuku. Kɛ́ wɔye nitsulɔ lɛ be fe nine lɛ, ekolɛ aŋmɛŋ wɔ gbɛ ni wɔkɛ lɛ agba sane be kroko kɛ wɔtee eŋɔɔ.
Yaa amɛŋɔɔ be ni amɛyɔɔ dekã, ekolɛ be ni kpaako amɛje nitsumɔ shishi.
Okɛ nitsumɔtsɛ lɛ awie klɛŋklɛŋ. Okɛ amɛ awie kɛ miishɛɛ ni ofee onii yɛ gbɛ ni baahã amɛtse amɛhiɛ amɛhã bo lɛ nɔ. Obaanyɛ okɛɛ akɛ, “Wɔkɛ be kukuoo miisara mɛi yɛ amɛnitsumɔhei ejaakɛ ewa akɛ abaana amɛ yɛ amɛshĩai amli.” Hã oshiɛmɔ wiemɔ lɛ afee kuku, no sɛɛ lɛ okɛ trat, woji tɛtrɛbii lɛ, loo wolo kroko ahã lɛ. Bɔ ni afee ni akasusu akɛ wɔmiihɔɔ nii lɛ, kaatsi onia ni atsuɔ kɛyeɔ abuaa shiɛmɔ nitsumɔ lɛ tã, ja abi wɔ bɔ ni feɔ wɔnáa shika kɛfiɔ wɔnitsumɔ lɛ sɛɛ dã.
Kɛ́ nitsumɔtsɛ lɛ tse ehiɛ ehã bo lɛ, bi lɛ gbɛ ni ehã okɛ nitsulɔi krokomɛi lɛ awie kuku. Yɛ nitsumɔhei lɛ ekomɛi amli lɛ, ebaahi jogbaŋŋ akɛ ooobi kɛji akɛ obaanyɛ oshi wɔwoji lɛ ekomɛi yɛ he ni nitsulɔi lɛ yayeɔ nii loo amɛyajɔɔ amɛhe yɛ lɛ.
Okɛ hiɛshikamɔ atsu nii, ni osusu nitsulɔ lɛ he. Akɛ nɔkwɛmɔnɔ lɛ, kɛji akɛ nitsulɔ ko kɛ mɔ ko ni eba nitsumɔhe lɛ miiwie loo eetsu nɔ ko he nii kɛ hiɛdɔɔ lɛ, mɛɛ kɛyashi ebaaná dekã dani oya eŋɔɔ.

Kaa Enɛ Okwɛ yɛ Nyɔɔŋ nɛɛ Mli:

Yɛ nyɛ gbɛkɛ Weku Jamɔ ni baanyiɛ sɛɛ lɛ mli lɛ, nyɛfea shiɛmɔ wiemɔ kuku ni nyɛbaanyɛ nyɛkɛtsu nii kɛ́ nyɛshiɛɔ yɛ hei ni nitsumɔhei yɔɔ lɛ he nɔkwɛmɔnɔ.