Nyɛkasea Gbalɔi Lɛ—Habakuk
1. Mɛni hewɔ wɔbaanyɛ wɔnu he tamɔ gbalɔ Habakuk nu he lɛ?
1 Be ni awuiyeli nifeemɔi yaa nɔ emli woɔ wu yɛ je lɛ mli nɛɛ, ekolɛ wɔbaanu he tamɔ Habakuk nu he lɛ; ebi Yehowa akɛ: “Mɛɛ hewɔ ni ohãa minaa nishaianii, ni okwɛɔ haomɔ nɛɛ?” (Hab. 1:3; 2 Tim. 3:1, 13) Kɛ́ wɔjwɛŋ sane ni akɛ mumɔ tsirɛ Habakuk ni eŋma lɛ kɛ anɔkwa ni eye lɛ nɔ lɛ, ebaaye ebua wɔ ni wɔkpee shihilɛi ni wɔkɛkpeɔ lɛ anaa, be ni wɔmɛɔ Yehowa kojomɔ gbi lɛ.—2 Pet. 3:7.
2. Mɛni baatsɔɔ akɛ wɔmiihi shi yɛ hemɔkɛyeli naa?
2 Hii Shi yɛ Hemɔkɛyeli Naa: Yɛ nɔ najiaŋ ni Habakuk baahã nibii gbohii ni yaa nɔ lɛ ahã enijiaŋ aje wui lɛ, ekɛ ehe wo Nyɔŋmɔjamɔ nifeemɔi amli waa. (Hab. 2:1) Yehowa ma nɔ mi ehã gbalɔ lɛ akɛ Ewiemɔ lɛ baaba mli yɛ be naa pɛpɛɛpɛ, ni akɛ, “jalɔ lɛ, ehemɔkɛyeli lɛ nɔ eeetsɔ ni eyi aaaná wala.” (Hab. 2:2-4) Mɛni no tsɔɔ kɛhã Kristofoi ni yɔɔ je ni etsɛŋ ni ebaafite nɛɛ mli lɛ? Nɔmimaa ni wɔbaaná akɛ naagbee lɛ baaba lɛ he miihia kwraa fe ni le ni wɔbaale be ni ebaaba. Hemɔkɛyeli hãa wɔhiɛ hiɔ wɔhe nɔ, ni wɔkɛ sɔɔmɔ nitsumɔ lɛ yeɔ klɛŋklɛŋ gbɛhe.—Heb. 10:38, 39.
3. Mɛni hewɔ esa akɛ wɔya nɔ wɔná miishɛɛ yɛ Yehowa sɔɔmɔ mli lɛ?
3 Nya yɛ Yehowa Mli: Kɛ́ Gog ni jɛ Magog lɛ tutua Yehowa webii lɛ, abaaka wɔhemɔkɛyeli lɛ. (Ezek. 38:2, 10-12) Ta kɛ jaramɔ shihilɛ baa, ni mɛi ni yeɔ kunim yɛ ta lɛ mli lɛ hu po náa nɔ. Ekolɛ anaŋ niyenii, nibii baanyɛ afite, ni shihilɛ mli baanyɛ awa. Kɛ́ wɔkɛ shihilɛ ni jaraa kpe lɛ, mɛni wɔbaafee? Habakuk le akɛ ebaanyɛ ekɛ shihilɛ ni jaraa akpe, no hewɔ lɛ etswa efai shi akɛ ebaaya nɔ ehiɛ miishɛɛ ni eyɔɔ yɛ Yehowa sɔɔmɔ mli lɛ mli. (Hab. 3:16-19) “Yehowa he nyamɔ lɛ” baaye abua wɔ hu ni wɔkpee kai ni wɔkɛbaakpe wɔsɛɛ lɛ naa.—Neh. 8:10; Heb. 12:2.
4. Mɛɛ nitsumɔ ni yɔɔ miishɛɛ wɔná hegbɛ akɛ wɔbaatsu bianɛ kɛ wɔsɛɛ fɛɛ?
4 Abaaya nɔ atsɔɔ mɛi ni Yehowa baabaa amɛyi kɛfo kojomɔ gbi ni baa lɛ Nyɔŋmɔ he nii. (Hab. 2:14) Mɛi ni abaatee amɛ shi lɛ hu baakase Yehowa he nii. Amrɔ nɛɛ po lɛ, esa akɛ wɔkɛ hegbɛ fɛɛ ni wɔbaaná lɛ ajaje Yehowa kɛ enitsumɔi kpelei lɛ wɔtsɔɔ mɛi!—Lala 34:2; 71:17.