Tsɔɔmɔ Anɔkwale Lɛ

Kɛjɛ September kɛyaa lɛ, akɛ shiɛmɔ wiemɔ hee ni yitso ji, “Tsɔɔmɔ Anɔkwale Lɛ” baawo Wɔshiɛmɔ kɛ Wɔshihilɛ Kpee Nifeemɔ Wolo lɛ mli. Oti ni ma wɔhiɛ ji, ni wɔtsɔ sanebimɔ ko kɛ ŋmalɛ ko nɔ wɔtsɔɔ mɛi Biblia mli anɔkwale ko ni shishinumɔ waa.

Kɛ́ wɔna akɛ mɔ ko yɛ sane lɛ he miishɛɛ lɛ, wɔbaanyɛ wɔshi wolo ko wɔhã lɛ, loo wɔjie vidio ko ni yɔɔ jw.org lɛ nɔ lɛ wɔhã lɛ kɛtee emiishɛɛ shi kɛhã sɛɛkuukɛsaramɔ. Esa akɛ wɔbɔ mɔdɛŋ wɔku wɔsɛɛ wɔyatsa sanegbaa lɛ nɔ yɛ gbii fioo komɛi asɛɛ. Shiɛmɔ wiemɔ hei lɛ kɛ skulbii lɛ anifeemɔi lɛ baadamɔ Mɛni Wɔbaanyɛ Wɔkase Kɛjɛ Biblia lɛ Mli? wolo lɛ, ni yɔɔ jw.org/gaa lɛ nɔ lɛ mli saneyitsei lɛ amli otii komɛi anɔ. Sanebimɔi kɛ ŋmalɛi krokomɛi yɛ mli ni baaye abua wɔ koni wɔfee sɛɛkuukɛsaramɔi loo ní wɔkɛ Biblia lɛ pɛ atsu nii kɛfee Biblia mli nikasemɔ.

Gbɛ kome pɛ ji nɔ ni kɛ mɔ yaa wala mli. (Mat 7:13, 14) Akɛni wɔshiɛɔ wɔhãa mɛi ni yɔɔ jamɔi srɔtoi amli kɛ mɛi ni jɛ shihilɛi srɔtoi amli hewɔ lɛ, esa akɛ Biblia mli anɔkwalei ni wɔshiɛɔ lɛ akɔ amɛhe akɛ aŋkroaŋkroi. (1Ti 2:4) Kɛ́ wɔle Biblia mli saji srɔtoi jogbaŋŋ, ni wɔtee wɔhiɛ yɛ bɔ ni ‘wɔhiɛɔ anɔkwale lɛ wiemɔ lɛ mli pɛpɛɛpɛ’ lɛ mli lɛ, wɔmii baashɛ wɔhe waa, ni wɔbaanyɛ wɔtsɔɔ mɛi krokomɛi anɔkwale lɛ jogbaŋŋ.​—2Ti 2:15.