Ani Atsake Nyɔŋmɔ Wiemɔ Lɛ Hiɛ?

Mɛi komɛi susuɔ akɛ, atsake Ŋmalɛ Krɔŋkrɔŋ lɛ hiɛ. Shi gbalɔ Yesaia wie akɛ, Nyɔŋmɔ wiemɔ lɛ “hiɔ shi kɛyaa naanɔ.” (Yesaia 40:8) Te wɔbaafee tɛŋŋ wɔná nɔmimaa akɛ, atsakeko Nyɔŋmɔ shiwoi ni yɔɔ Ŋmalɛ Krɔŋkrɔŋ lɛ mli lɛ hiɛ?

Nyɔŋmɔ baanyɛ akwɛ koni akatsake saji ni yɔɔ e-Wiemɔ lɛ mli lɛ. Akɛ nɔkwɛmɔnɔ lɛ, yɛ blema lɛ, woloŋmalɔi ni kwɛ ŋmalɛi ni yɔɔ lɛ anɔ amɛŋmala eko amɛshwie shi lɛ, kaneɔ wiemɔkulibii ni yɔɔ mli lɛ fɛɛ bɔ ni afee ni amɛná nɔmimaa akɛ, amɛkɛ wiemɔ ko fatako he, amɛtsakeko eko, loo amɛjieko eko yɛ mli. Fɛɛ sɛɛ lɛ, adesai yeee emuu, hewɔ lɛ, woloŋmalɔi lɛ ekomɛi tɔ̃ tɔmɔi bibii komɛi ni tsakeee shishinumɔ ni nɔ ni aŋma klɛŋklɛŋ kwraa lɛ hiɛ lɛ.

MƐNI TSƆƆ AKƐ ŊMALƐ KRƆŊKRƆŊ LƐ NI WƆHIƐ ŊMƐNƐ LƐ JI SANE NI NYƆŊMƆ HÃ AŊMA LƐ?

Ŋmalɛ Krɔŋkrɔŋ lɛ mli ŋmalɛi ni blema woloŋmalɔi lɛ ŋmala amɛshwie shi lɛ akpei abɔ yɛ. Kɛ́ tɔmɔ bibioo yɛ eko mli po lɛ, kɛ́ akɛto ekrokomɛi ahe lɛ, abaanyɛ ana.​—Kɛ́ ootao enɛ he saji krokomɛi lɛ, kwɛmɔ sane ni yitso ji, “Ani Atsake Biblia Lɛ Hiɛ?” ni yɔɔ jw.org/gaa lɛ nɔ lɛ.

Wɔbaanyɛ wɔkɛ Ŋshɔ Ni Egbo Wolokpoi lɛ afee enɛ he nɔkwɛmɔnɔ. Arabbii komɛi yana blema niŋmai nɛɛ yɛ tɛkploi amli yɛ he ko ni bɛŋkɛ Ŋshɔ Ni Egbo lɛ yɛ afi 1947 mli. Blema niŋmai nɛɛ eye fe afii 2,000, ni Ŋmalɛ Krɔŋkrɔŋ lɛ mli ŋmalɛi komɛi fata he. Biblia he nilelɔi kɛ blema wolokpoi nɛɛ eto Ŋmalɛ Krɔŋkrɔŋ lɛ ni wɔhiɛ ŋmɛnɛ lɛ he. Mɛni amɛna?

Amɛna akɛ, saji ni yɔɔ Nyɔŋmɔ Wiemɔ lɛ ni wɔhiɛ ŋmɛnɛ lɛ mli lɛ kɛ klɛŋklɛŋ niŋmai lɛ kpãa gbee.a Anɔkwa, kɛ́ akɛ wolokpoi ni etsɛ waa lɛ to Ŋmalɛ Krɔŋkrɔŋ lɛ ni wɔhiɛ ŋmɛnɛ lɛ he lɛ, anaa akɛ nɔ ni Nyɔŋmɔ hã aŋma lɛ wɔkaneɔ lɛ. Wɔbaanyɛ wɔná nɔmimaa akɛ, Nyɔŋmɔ ekwɛ ni abaa e-Ŋmalɛ Krɔŋkrɔŋ lɛ yi jogbaŋŋ ahã wɔ ŋmɛnɛ.

Enɛ hewɔ lɛ, wɔbaanyɛ wɔkane Nyɔŋmɔ Wiemɔ lɛ kɛ nɔmimaa akɛ, nɔ ni yɔɔ mli lɛ fɛɛ ja kɛmɔ shi. Kɛ́ nakai ji sane lɛ, agbɛnɛ, hã wɔkwɛ nɔ ni Nyɔŋmɔ gbalɔi lɛ baanyɛ atsɔɔ wɔ yɛ ehe.