Wɔ-Bɔlɔ Ni Yɔɔ Suɔmɔ Lɛ Jwɛŋɔ Wɔhe

1. WƆ-BƆLƆ LƐ HÃA HULU LƐ TEƆ SHI

Eji hulu lɛ bɛ kulɛ, ani wɔbaanyɛ wɔya nɔ wɔhi wala mli? Hulu lɛ hãa tsei hewalɛ ni amɛwoɔ bai, fɔfɔii, aduawai, kɛ wui. Agbɛnɛ hu, ehãa tsei tsɔɔ amɛshishifãi lɛ anɔ amɛgbalaa nu kɛjɛɔ sũ lɛ mli kɛkwɔɔ tsei lɛ kɛyaa amɛbai lɛ amli, ni nu nɛɛ jeɔ kpo kɛjeɔ bai lɛ amli akɛ lamɔ.

2. WƆ-BƆLƆ LƐ HÃA NUGBƆ NƐƆ

Nyɔŋmɔ edro wɔ nugbɔ, ni enɛɔ eshwieɔ shikpɔŋ lɛ nɔ koni wɔná niyenii wɔye. Nyɔŋmɔ hãa nugbɔ nɛɔ kɛjɛɔ ŋwɛi ehãa wɔ, kɛ bei ni nii baa pii hu, ni no hãa wɔnáa niyenii babaoo, ni miishɛɛ yiɔ wɔtsuiiaŋ obɔbɔ.

Loofɔlɔ ko sɔ tso nine ko nɔ, ni eekpa emli ni esɔɔ aduawa ko ni yaagbee shi.

3. WƆ-BƆLƆ LƐ HÃA WƆ NIYENII KƐ ATADE

Tsɛmɛi pii yeɔ amɛtsui yɛ niyenii kɛ atade ni fa bɔ ni sa ni amɛbaaná amɛhã amɛwekui lɛ he. Kadimɔ nɔ ni Ŋmalɛ lɛ wie: “Nyɛkwɛa ŋwɛi loofɔji lɛ; amɛduuu nii, amɛkpaaa nii, ni amɛbuaaa nii anaa amɛwooo nitoohei, shi nyɛŋwɛi Tsɛ lɛ lɛɔ amɛ kɛ̃. Ani nyɛjara waaa kwraa fe amɛ?”—Mateo 6:25, 26.

“Nyɛkasea nii kɛjɛa koo mli lili fɔfɔii lɛ adɛŋ, bɔ ni amɛdaraa . . . ; shi mi lɛ, miikɛɛ nyɛ akɛ, yɛ [Maŋtsɛ] Solomon anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome. No hewɔ lɛ, kɛji nɛkɛ Nyɔŋmɔ wulaa kwɛ̃ɛ nii ni yɔɔ koo mli [lɛ] . . . , ani ewulaŋ nyɛ babaoo?”—Mateo 6:28-30.

Akɛni Nyɔŋmɔ baanyɛ ahã wɔ niyenii kɛ atade hewɔ lɛ, ekã shi faŋŋ akɛ, ebaanyɛ eye ebua wɔ ni wɔná nibii krokomɛi ni he hiaa wɔ lɛ hu. Kɛ́ wɔbɔ mɔdɛŋ wɔfee nɔ ni Nyɔŋmɔ sumɔɔ lɛ, ebaanyɛ ejɔɔ mɔdɛŋ ni wɔbɔɔ koni wɔdu nii lɛ nɔ, loo ebaanyɛ eye ebua wɔ ni wɔná nitsumɔ koni wɔnyɛ wɔhé nibii ni he hiaa wɔ lɛ.—Mateo 6:32, 33.

Ekã shi faŋŋ akɛ, kɛ́ wɔsusu hulu lɛ, nugbɔ lɛ, loofɔji, kɛ fɔfɔii ahe lɛ, wɔbaana yiŋtoi kpakpai ahewɔ ni esa akɛ wɔsumɔ Nyɔŋmɔ. Sane ni nyiɛ sɛɛ lɛ baahã wɔna gbɛ ni wɔ-Bɔlɔ lɛ tsɔ nɔ ejie ehe shi etsɔɔ wɔ.