HII SHI AKƐ KRISTOFONYO

Okɛ Hiɛshikamɔ Ahala Nibii Ni Okɛbaajie Ohiɛtserɛ

Mɛni hewɔ esa akɛ wɔkɛ hiɛshikamɔ ahala nibii ni wɔkɛbaajie wɔhiɛtserɛ lɛ? Ejaakɛ kɛ́ wɔkpɛ wɔyiŋ akɛ wɔbaakwɛ fim ko, wɔbaabo lala ko toi, wɔbaaya wɛbsaiti ko nɔ, wɔbaakane wolo ko, loo wɔbaatswa vidio gemi ko lɛ, belɛ wɔmiihala nɔ ni wɔkɛbaawo wɔjwɛŋmɔ mli. Yiŋ ni wɔkpɛɔ lɛ náa wɔnifeemɔi anɔ hewalɛ. Dɔlɛ sane ji akɛ, ŋmɛnɛ lɛ, hiɛtserɛjiemɔ nibii lɛ pii amli eyi kɛ nibii ni Yehowa nyɛɔ. (La 11:5; Gal 5:19-21) Enɛ hewɔ lɛ, Biblia lɛ woɔ wɔ hewalɛ ni wɔya nɔ wɔsusu nibii ni woɔ Yehowa hiɛ nyam lɛ ahe.—Fip 4:8.

KWƐMƆ VIDIO NI JI, MƐNI ESA AKƐ MIKƐJIE MIHIƐTSERƐ? LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:

Mɛɛ gbɛ nɔ blema Roma yiwalɛ shwɛmɔi lɛ tamɔ nibii ni mɛi kɛjieɔ amɛhiɛtserɛ ŋmɛnɛ lɛ?
Mɛɛ gbɛ nɔ asafo lɛ mli bii lɛ baanyɛ aye abua oblahii kɛ oblayei ni amɛkɛ hiɛshikamɔ ahala nibii ni amɛkɛjieɔ amɛhiɛtserɛ lɛ?
Mɛɛ gbɛ nɔ Romabii 12:9 lɛ baanyɛ aye abua wɔ kɛ́ wɔmiihala hiɛtserɛjiemɔ ko?
Mɛɛ hiɛtserɛjiemɔi komɛi ni sa yɔɔ he ni oyɔɔ lɛ?

ANI NƆ NI MƆ KROKO KƐ ENILEE EFEE OKƐJIEƆ OHIƐTSERƐ ALOO BO DIƐŊTSƐ OFEƆ NƆ KO?

Nibii ni mɛi kɛjieɔ amɛhiɛtserɛ ŋmɛnɛ lɛ ateŋ babaoo hãa amɛtaa shi ni amɛfeee nɔ ko tsɔ. Kɛ́ ookwɛ fim loo TV, loo ookane wolo ko lɛ, belɛ nibii ni mɔ kroko kɛ enilee efee ji nɔ ni okɛjieɔ ohiɛtserɛ lɛ, jeee bo diɛŋtsɛ onɔ. Eyɛ mli akɛ tɔmɔ bɛ he akɛ wɔkɛ nibii ni tamɔ nɛkɛ baajie wɔhiɛtserɛ moŋ, shi mɛi babaoo ena akɛ, kɛ́ wɔ diɛŋtsɛ wɔfee nɔ ko kɛjie wɔhiɛtserɛ lɛ, ehi waa. Akɛ nɔkwɛmɔnɔ lɛ, mɛi komɛi tswaa gitai loo amɛtɛŋɔ mfoniri kɛjieɔ amɛhiɛtserɛ. Mɛi komɛi hu yatswaa bɔɔlu loo amɛyasharaa shi. Ekɔɔɔ he eko nɔ ni wɔbaakpɛ mli akɛ wɔkɛbaajie wɔhiɛtserɛ lɛ, nyɛhãa ‘wɔfea nibii fɛɛ kɛwoa Nyɔŋmɔ hiɛ nyam.’—1Ko 10:31.