Daamɔ Shi Shiŋŋ Be Ni Naagbee Lɛ Bɛŋkɛɔ Lɛ

NƆ HEWƆ NI EHE HIAA: Etsɛŋ, nibii ni yɔɔ gbeyei baaba, ni ebaaka ekãa ni wɔyɔɔ kɛ wɔhiɛ ni wɔkɛfɔ̃ɔ Yehowa nɔ lɛ fe bei fɛɛ ni eho. Amanehulu kpeteŋkpele lɛ baaje shishi kɛ amale jamɔ hiɛkpatamɔ. (Mat 24:21; Kpo 17:16, 17) Nakai beiaŋ lɛ, nibii gbeyeigbeyei baaya nɔ, ni eeenyɛ efee akɛ, wɔbaajaje kojomɔ sane ko ni naa wa. (Kpo 16:21) Gog ni jɛ Magog lɛ baatutua wɔ. (Eze 38:10-12, 14-16) Ni Yehowa hu baafã ewebii lɛ ahe, ni no kɛ “Nyɔŋmɔ Ofe lɛ gbi wulu lɛ nɔ ta lɛ” baaba. (Kpo 16:14, 16) Bɔ ni afee ni wɔná ekãa kɛdamɔ nibii ni baaba wɔsɛɛ nɛɛ anaa lɛ, kɛ́ wɔkɛ wɔhemɔkɛyeli lɛ he kai kpe bianɛ lɛ, esa akɛ wɔfi shi shiŋŋ.

BƆ NI OBAAFEE LƐ OHÃ:

• Feemɔ ekãa ni ofã Yehowa jeŋba he mlai ni nɔ bɛ lɛ ahe, ni ohi shi yɛ naa hu.​—Yes 5:20

• Yaa nɔ okɛ nyɛmimɛi lɛ afee ekome kɛjá Yehowa.​—Heb 10:24, 25

• Kɛ́ Yehowa asafo lɛ kɛ gbɛtsɔɔmɔ ko hã lɛ, kɛtsu nii oya nɔŋŋ.​—Heb 13:17

• Jwɛŋmɔ bɔ ni Yehowa here ewebii lɛ yɛ blema lɛ nɔ.​—2Pe 2:9

• Sɔlemɔ ohã Yehowa, ni okɛ ohiɛ ofɔ̃ enɔ.—La 112:7, 8

KWƐMƆ VIDIO NI JI, NIBII NI BAABA WƆSƐƐ NI BAABI NI WƆFEE EKÃA​—VIDIO LƐ MLI FÃI KOMƐI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• 

  Be ni ajara asafo ko mli shiɛlɔi lɛ awo asafoi krokomɛi amli lɛ, mɛɛ toiboo he kaa amɛkɛkpe?

• 

  Kɛ́ wɔboɔ gbɛtsɔɔmɔ toi lɛ, mɛɛ gbɛ nɔ ebaanyɛ ehã wɔfee ekãa?

• 

  Kɛ́ Harmagedon ta lɛ je shishi lɛ, mɛni hewɔ ehe baahia ni wɔfee ekãa lɛ?

• 

  Mɛɛ Biblia mli sane baanyɛ awa wɔ ni wɔwaje hemɔkɛyeli ni wɔyɔɔ akɛ Yehowa baahere wɔ lɛ?​—2Kr 20:1-24