HII SHI AKƐ KRISTOFONYO

Kɛ́ Wɔfĩ Yehowa Tsɔsemɔ Sɛɛ Lɛ, No Tsɔɔ Akɛ Wɔyɛ Suɔmɔ

Kɛ́ ashwie mɔ ko lɛ ebuɔ asafo lɛ he, ni etsɔseɔ efɔŋfeelɔ ni tsakeee etsui lɛ. (1Ko 5:6, 11) Kɛ́ wɔfĩ Yehowa tsɔsemɔ ni tamɔ nɛkɛ lɛ sɛɛ lɛ, no tsɔɔ akɛ wɔyɛ suɔmɔ. Shi kɛ́ ashwie mɔ ko lɛ, ehãa mɛi fɛɛ ni sane lɛ kɔɔ amɛhe lɛ—mɔ lɛ wekumɛi kpaakpa, kɛ saneyeli ajinafoi akuu lɛ fɛɛ—atsui kumɔɔ, hewɔ lɛ, mɛɛ gbɛ nɔ kɛ́ wɔfĩ shwiemɔ lɛ sɛɛ lɛ etsɔɔ akɛ wɔyɛ suɔmɔ?

Etsɔɔ akɛ wɔsumɔɔ ni atse Yehowa gbɛ́i lɛ he ni wɔsumɔɔ egbɛtsɔɔmɔi ni kɔɔ krɔŋkrɔŋfeemɔ he lɛ, ni no ji yiŋtoo titri hewɔ ni wɔfĩɔ Yehowa sɛɛ lɛ. (1Pe 1:14-16) Etsɔɔ akɛ wɔsumɔɔ mɔ ni ashwie lɛ lɛ hu. Eyɛ mli akɛ tsɔsemɔ ni mli wa lɛ dɔɔ mɔ moŋ, shi ebaanyɛ ewo “toiŋjɔlɛ yibii ni ji jalɛ” lɛ. (Heb 12:5, 6, 11) Kɛ́ ashwie mɔ ko loo mɔ ko kɛ asafo lɛ fo tako mli ni wɔkɛ lɛ bɔ lɛ, etsɔɔ akɛ wɔmiitsĩ Yehowa tsɔsemɔ lɛ naa. Kaimɔ akɛ, Yehowa tsɔseɔ ewebii lɛ “bɔ ni sa kɛkɛ.” (Yer 30:11) Wɔshweɔ ni mɔ lɛ aku esɛɛ kɛba wɔ-Tsɛ ni naa mɔbɔ lɛ ŋɔɔ ekoŋŋ. Shi kɛyashi ebaaku esɛɛ lɛ, wɔbaaya nɔ wɔfĩ Yehowa tsɔsemɔ lɛ sɛɛ, ni wɔfee nɔ fɛɛ nɔ ni esa akɛ wɔfee koni wɔ kɛ lɛ teŋ wekukpaa lɛ mli akã he awa.—Yes 1:16-18; 55:7.

KWƐMƆ VIDIO NI JI, OKƐ TSUI NI EYE EMUU AYE YEHOWA ANƆKWA LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

Vidio ni ji, ‘Okɛ Tsui ni Eye Emuu Aye Yehowa Anɔkwa’ lɛ mli mfoniri ko. Gabriella kɛ Ben miiye awerɛho be ni amɛkane lɛta ni amɛbinuu ni eshi shia lɛ ŋma amɛ lɛ.

Kɛ́ mɔ ko kpa Yehowa sɔɔmɔ lɛ, te efɔlɔi ni ji Kristofoi lɛ nuɔ he amɛhãa tɛŋŋ?
Mɛɛ gbɛ nɔ asafo lɛ mli bii lɛ baanyɛ aye abua mɔ lɛ wekumɛi ni yɔɔ asafo lɛ mli lolo lɛ?
Mɛɛ Biblia mli sane hãa wɔnaa akɛ, esa akɛ wɔye Yehowa anɔkwa moŋ fe wɔweku mli bii?
Mɛni kɛ́ wɔfee lɛ ebaatsɔɔ akɛ, wɔyeɔ Yehowa anɔkwa moŋ fe wɔweku mli bii?