HII SHI AKƐ KRISTOFONYO
Yehowa Waa Wɔ Ni Wɔnyɛ Wɔdamɔ Wɔnaagbai Anaa
Wɔkɛ shihilɛi ni mli wawai pii miikpe yɛ naagbee gbii nɛɛ amli. Bei komɛi lɛ, wɔnuɔ he akɛ naagbai nɛɛ amli wala tsɔ, ni wɔnyɛŋ wɔfi shi. Shi kɛ́ wɔhi Yehowa masɛi daa lɛ, ebaawa wɔ ni wɔfi shi yɛ shihilɛi ni kumɔɔ mɔ tsui lɛ po amli. (Yes 43:2, 4) Kɛ́ wɔkɛ naagbai miikpe lɛ, mɛni wɔbaanyɛ wɔfee koni naanyobɔɔ ni yɔɔ wɔ kɛ Yehowa teŋ lɛ mli awa fe tsutsu lɛ po?
Sɔlemɔ. Kɛ́ wɔfɔse wɔtsuiŋ wɔshwie Yehowa hiɛ lɛ, ehãa wɔtoiŋ jɔɔ wɔ, ni ehãa wɔ hewalɛ hu ni wɔnyɛ wɔfi shi.—Fip 4:6, 7; 1Te 5:17.
Asafoŋ kpeei. Yehowa eto gbɛjianɔ ni wɔkpe ni etsɔɔ wɔ nii, ni wɔkɛ wɔnyɛmimɛi lɛ abɔ hu, ni enɛ he miihia waa yɛ bei ni wɔyɔɔ mli nɛɛ amli. (Heb 10:24, 25) Kɛ́ wɔsaa wɔhe kɛhã asafoŋ kpeei, wɔtee asafoŋ kpeei, ni wɔkɛ wɔhe wo mli lɛ, wɔnáa yelikɛbuamɔ ni Yehowa mumɔ lɛ kɛhãa wɔ lɛ he sɛɛ waa.—Kpo 2:29.
Shiɛmɔ nitsumɔ. Kɛ́ wɔfee bɔ fɛɛ bɔ ni wɔbaanyɛ ni wɔkɛ wɔhe wo shiɛmɔ nitsumɔ lɛ mli waa lɛ, ewaŋ kɛhãŋ wɔ akɛ wɔkɛ wɔjwɛŋmɔ baama nibii kpakpai anɔ. Naanyobɔɔ ni yɔɔ wɔ kɛ Yehowa kɛ wɔnanemɛi nitsulɔi ateŋ lɛ mli baawa.—1Ko 3:5-10.
KWƐMƆ VIDIO NI JI, YEHOWA KƐ BO BAAFEE EBI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:
Be ni Malu kɛ naagbai kpe lɛ, mɛni wa lɛ ni ehi Yehowa masɛi?
Wiemɔi ni yɔɔ Lala 34:18 lɛ shɛje Malu mii. Mɛɛ gbɛ nɔ ebaanyɛ eshɛje wɔ hu wɔmii kɛ́ wɔkɛ naagbai miikpe?
Mɛɛ gbɛ nɔ Malu sane lɛ hãa wɔnaa akɛ, kɛ́ wɔkɛ naagbai miikpe lɛ, Yehowa hãa wɔ “hewalɛ ni fa kɛteke nɔ”?—2Ko 4:7