Mɛni Hewɔ Nyɔŋmɔ Hãaa Sɔlemɔi Fɛɛ Hetoo Lɛ?
Yehowa Nyɔŋmɔ, ni ji wɔ-Tsɛ ni yɔɔ ŋwɛi lɛ, náa sɔlemɔi ni wɔjɛɔ wɔtsuiŋ wɔsɔleɔ lɛ he miishɛɛ, ni eesumɔ ni ebo toi. Shi nibii komɛi yɛ ni kɛ́ wɔfee lɛ, ehãŋ wɔsɔlemɔi lɛ hetoo. Mɛni ji nibii nɛɛ, ni kɛ́ wɔmiisɔle lɛ, mɛni esa akɛ wɔhã ehi wɔjwɛŋmɔ mli? Naa nibii komɛi ni Biblia lɛ ewie yɛ he.
“Kɛ́ oosɔle lɛ, kaawie wiemɔ kome too lɛ nɔŋŋ shii abɔ.”—Mateo 6:7.
Yehowa sumɔɔɔ sɔlemɔi ni akpeɔ awoɔ yitsoŋ akɛɔ lɛ shii abɔ, loo nɔ ni akaneɔ kɛjɛɔ wolo ni aŋmala sɔlemɔi yɛ mli lɛ mli. Eesumɔ ni wɔjɛ wɔtsuiŋ wɔkɛ lɛ agba sane. Kɛ́ oyɛ naanyo ko ni be fɛɛ be ni ekɛ bo baagba sane lɛ wiemɔi kome too lɛ nɔŋŋ ewieɔ lɛ, te obaanu he ohã tɛŋŋ? Nanemɛi kpakpai jɛɔ amɛtsuiŋ amɛwieɔ, ni amɛkɛ nɔ ko eteee amɛhe. Kɛ́ wɔkɛ wɔ diɛŋtsɛ wɔwiemɔi sɔle lɛ, ehãa Nyɔŋmɔ naa akɛ, wɔbuɔ lɛ akɛ wɔnaanyo.
“Kɛ́ nyɛbi hu, nyɛnine shɛɛɛ nɔ ejaakɛ yiŋtoo fɔŋ hewɔ nyɛbiɔ.”—Yakobo 4:3.
Eyɛ faŋŋ akɛ, kɛ́ wɔsɔle wɔbi Nyɔŋmɔ ni ehã wɔfee nɔ ko ni wɔle akɛ esumɔŋ ni wɔfee, loo ehã wɔ nɔ ko ni wɔle akɛ esumɔŋ ni wɔná lɛ, eboŋ wɔ toi. Yehowa ewie eshi amimyeli kɛ shade kpakpa ni ataoɔ, no hewɔ lɛ, kɛ́ asɔshwɛlɔ ko sɔle koni ená shade kpakpa lɛ, ani ebaabo lɛ toi? (Yesaia 65:11; Luka 12:15) Esaaa akɛ mɔ ko kpaa gbɛ akɛ Yehowa baabo sɔlemɔi ni tamɔ nakai lɛ toi. Hewɔ lɛ, kɛ́ wɔmiitao ni ehã wɔsɔlemɔi hetoo lɛ, esa akɛ wɔkwɛ akɛ nɔ ni wɔbiɔ lɛ kɛ nɔ ni ewie yɛ Biblia lɛ mli lɛ kpãa gbee lo.
“Mɔ ni booo mla toi lɛ—esɔlemɔ po lɛ, nihiinii ni.”—Abɛi 28:9.
Yɛ Biblia beiaŋ lɛ, Nyɔŋmɔ booo mɛi ni kpoo emlai ni ja lɛ asɔlemɔi toi. (Yesaia 1:15, 16) Nyɔŋmɔ tsakeko. (Maleaki 3:6) Kɛ́ wɔmiitao ni ehã wɔsɔlemɔi hetoo lɛ, no lɛ, esa akɛ wɔbɔ mɔdɛŋ wɔhi shi yɛ emlai lɛ anaa. Shi kɛ́ be ko ni eho lɛ, wɔfee nibii gbohii komɛi hu? Ani no tsɔɔ akɛ Yehowa boŋ wɔ toi kɔkɔɔkɔ? Dabi kwraa! Kɛ́ wɔtsake wɔjeŋba, ni wɔfee bɔ fɛɛ bɔ ni wɔbaanyɛ koni wɔsa Nyɔŋmɔ hiɛ lɛ, ekɛ wɔhe baake wɔ tswaa.—Bɔfoi 3:19.