Mɛɛ Sɛɛnamɔ Yɔɔ Sɔlemɔ He?
Hela gbonyo ko mɔ yoo ko ni atsɛɔ lɛ Pamela, ni eyana datrɛfonyo. Shi esɔle hu ehã Nyɔŋmɔ koni ehã lɛ hewalɛ ni enyɛ ekɛdamɔ naa. Ani sɔlemɔ lɛ ye ebua lɛ?
Pamela wie akɛ: “Be ni atsaa mikansa lɛ, gbeyei fɔɔ mi mɔmɔ.” Ni ekɛfata he akɛ: “Shi kɛ́ misɔle mihã Yehowa Nyɔŋmɔ lɛ, mihe jɔɔ mi, ni gbeyeishemɔ lɛ laajeɔ. Miipiŋ lolo moŋ, shi sɔlemɔ yeɔ ebuaa mi ni miyeee mitsui tsɔ. Kɛ́ mɛi bi mi bɔ ni miyɔɔ lɛ, mikɛɔ amɛ akɛ, ‘Ehiko moŋ, shi miyɛ miishɛɛ!’”
Shi yɛ anɔkwale mli lɛ, ehe ehiaaa ni wɔkɛ naagba wulu ko akpe dani wɔsɔle. Wɔteŋ mɔ fɛɛ mɔ kɛ naagbai kpeɔ, naagbai bibii kɛ naagbai wuji, ni bei pii lɛ, wɔnuɔ he akɛ esa akɛ mɔ ko aye abua wɔ. Shi, ani sɔlemɔ baanyɛ aye abua?
Biblia lɛ kɛɔ akɛ: “Shɛ ojatsu lɛ ofɔ̃ Yehowa nɔ, ni ebaaye ebua bo. Ehãŋ jalɔ agbee shi kɔkɔɔkɔ.” (Lala 55:22) Sane nɛɛ woɔ mɔ hewalɛ waa! Hewɔ lɛ, mɛɛ gbɛ nɔ sɔlemɔ baanyɛ aye abua bo? Kɛ́ osɔle ohã Nyɔŋmɔ yɛ gbɛ ni sa nɔ lɛ, ebaadro bo nibii ni baahã onyɛ otsu onaagbai lɛ ahe nii.—Kwɛmɔ akrabatsa ni yitso ji, “Nɔ Ni Sɔlemɔ Baanyɛ Afee Ahã Bo.”