Bɔ Ni Obaafee Ohi Jeŋ Hee Lɛ Mli

Saji ni tsɔ hiɛ lɛ ehã wɔna akɛ, etsɛŋ, Nyɔŋmɔ baajie jeŋ fɔŋ nɛɛ kɛ emli naagbai lɛ fɛɛ kɛya. Wɔheɔ wɔyeɔ waa akɛ, enɛ baaba mli. Mɛni hewɔ? Ejaakɛ Nyɔŋmɔ Wiemɔ lɛ, ni ji Biblia lɛ, ewo shi akɛ:

“Je lɛ . . . miiho kɛmiiya.”—1 YOHANE 2:17.

Wɔyɛ nɔmimaa akɛ abaahere mɛi komɛi ayiwala kɛ̃, ejaakɛ ŋmalɛ nɛɛ ewo shi hu akɛ:

“Mɔ ni feɔ Nyɔŋmɔ suɔmɔnaa nii lɛ baahi shi kɛya naanɔ.”

No hewɔ lɛ, kɛ́ wɔmiisumɔ ni ahere wɔyiwala lɛ, esa akɛ wɔfee Nyɔŋmɔ suɔmɔnaa nii. Shi, ja wɔbale Nyɔŋmɔ dani wɔbaale nɔ ni esuɔmɔnaa nii ji.

JA ‘WƆBALE’ NYƆŊMƆ DANI ABAAHERE WƆYIWALA

Mfonirii ni ato naa: 1. Etɔ nɛɛsifonyo ko bliboo, ni esɔ shi efee basaa. 2. Etee niyelihe eyaanu nɔ ko fioo kɛwo etsui, ni ena enaanyo nitsulɔ ko miikane magazin ko kɛ miishɛɛ. 3. Enaanyo nitsulɔ lɛ miikane ŋmalɛ ko eetsɔɔ lɛ, ni eha lɛ jw.org kaadi lɛ eko.

Yesu wie akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ.” (Yohane 17:3) Ja ‘wɔbale’ Nyɔŋmɔ dani wɔyi baaná wala yɛ je lɛ naagbee lɛ mli ni wɔbaahi shi kɛya naanɔ. Enɛ biɔ babaoo fe he ni wɔbaahe wɔye akɛ Nyɔŋmɔ yɛ, loo ni wɔbaale ehe saji fioo ko. Esa akɛ wɔtsɔ enaanyo. Kɛ́ wɔmiitao wɔkɛ mɔ ko teŋ naanyobɔɔ mli awa lɛ, ebiɔ ni wɔná dekã wɔhã mɔ lɛ. Ni nakai nɔŋŋ eji yɛ naanyobɔɔ ni yɔɔ mɔ kɛ Nyɔŋmɔ teŋ lɛ gbɛfaŋ. Naa Biblia mli anɔkwalei komɛi ni baawa wɔ ni wɔtsɔ Nyɔŋmɔ naanyo, ni wɔhiɛ naanyobɔɔ nɛɛ mli.

Anɔkwalei Ni Yɔɔ Biblia Lɛ Mli

Nyɔŋmɔ to akɛ wɔhi Paradeiso mli.

Ebɔ Adam kɛ Hawa, ni ji klɛŋklɛŋ adesai lɛ, ni ekɛ amɛ wo he ko fɛfɛo ni atsɛɔ jɛmɛ Eden abɔɔ lɛ. No mli lɛ amɛye emuu, ni Nyɔŋmɔ hã amɛ nɔ fɛɛ nɔ ni baahã amɛmii ashɛ amɛhe yɛ shihilɛ mli. Kulɛ, amɛbaanyɛ amɛhi shi kɛya naanɔ. Eji amɛhiɛ naanyobɔɔ ni yɔɔ amɛ kɛ Nyɔŋmɔ teŋ lɛ mli kulɛ, amɛgboiŋ kɔkɔɔkɔ. Shi amɛje gbɛ amɛgbo famɔ ko ni waaa ni Nyɔŋmɔ kɛhã amɛ lɛ nɔ toi.

Nɔ hewɔ ni wɔnaa nɔ bianɛ.

Akɛni Adam, ni ji klɛŋklɛŋ nuu lɛ, gbo Nyɔŋmɔ nɔ toi hewɔ lɛ, hegbɛ ni lɛ kɛ adesai fɛɛ yɔɔ akɛ amɛbaahi shi kɛya naanɔ lɛ ŋmɛɛ amɛ. Biblia lɛ tsɔɔ mli akɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ.” (Romabii 5:12) Bɔ ni mɔ ko nyɛɔ enáa hela ko kɛjɛɔ efɔlɔi aŋɔɔ lɛ, nakai nɔŋŋ Adam bii fɛɛ ná emuu ni ayeee kɛjɛ eŋɔɔ. No hewɔ wɔgbɔlɔɔ ni wɔgboiɔ lɛ.

Nɔ ni Nyɔŋmɔ efee momo koni ekɛwa wɔ.

Biblia lɛ kɛɛ: “Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yohane 3:16) Nyɔŋmɔ tsu Yesu kɛba shikpɔŋ lɛ nɔ koni ekɛ ewala abafɔ̃ shi ehã wɔ. Nuu ko ni atsɛɔ lɛ Prabhakar, ni eji Indianyo ni eye afii 86 lɛ, wie nifeemɔ ni tsɔɔ suɔmɔ nɛɛ he akɛ: “Enɛ tsɔɔ akɛ Yehowaa sumɔɔ mi waa diɛŋtsɛ. Esuɔmɔ lɛ ehã miná hiɛnɔkamɔ akɛ mahi shi kɛya naanɔ.”

Nɔ ni wɔbaanyɛ wɔfee kɛtsɔɔ akɛ wɔhiɛ sɔɔ nɔ ni Nyɔŋmɔ efee ehã wɔ lɛ.

Biblia lɛ tsɔɔ akɛ, kɛji ‘wɔye Nyɔŋmɔ kitãi lɛ anɔ’ lɛ, wɔkɛ no tsɔɔ akɛ wɔhiɛ sɔɔ nɔ ni efee ehã wɔ lɛ. (1 Yohane 2:3) Yehowa Nyɔŋmɔ ejɛ suɔmɔ mli etsɔɔ wɔ nɔ ni kɛ́ wɔfee lɛ wɔbaaná miishɛɛ bianɛ. (Yesaia 48:17, 18, shishigbɛ niŋmaa) Nyɔŋmɔ sumɔɔɔ akɛ wɔna nɔ. Ewo shi akɛ, kɛ́ wɔbo lɛ toi lɛ wɔbaaná miishɛɛ bianɛ, ni wɔsɛɛ hu lɛ, wɔbaanyɛ wɔhi shi kɛya naanɔ.

KANEMƆ NYƆŊMƆ WIEMƆ LƐ DAA GBI

Nɛɛsifonyo lɛ eba shwane hejɔɔmɔ ni eta agbo lɛ naa; ekane ŋmalɛ ko ni eekwɛ ŋwɛi. — Kɛ́ osɔle obi Nyɔŋmɔ ni ewa bo, ni ofee nɔ ni esumɔɔ lɛ, ebaahere oyiwala yɛ je lɛ naagbee lɛ mli

Wɔyeɔ nii daa koni wɔkagboi. Shi Yesu kɛɛ: “Jeee niyenii pɛ naa esa akɛ gbɔmɔ ahi wala mli yɛ, shi moŋ, yɛ wiemɔ fɛɛ wiemɔ ni jɛɔ Yehowa daaŋ lɛ naa.”—Mateo 4:4.

Ŋmɛnɛ lɛ, wɔnaa Yehowa wiemɔi lɛ yɛ Biblia lɛ mli. Be ni okaseɔ nakai wolo krɔŋkrɔŋ lɛ, obaale nɔ ni Nyɔŋmɔ fee yɛ blema, nɔ ni efeɔ bianɛ, kɛ nɔ ni ebaafee wɔsɛɛ.

SƆLEMƆ OBI NYƆŊMƆ NI EWA BO

Ŋɔɔ lɛ akɛ, ootao obo Nyɔŋmɔ toi, shi ewa kɛhã bo akɛ obaakpa nibii ni ekɛɛ ehiii lɛ feemɔ, mɛni esa akɛ ofee? Kɛ́ nakai eji lɛ, no lɛ, kɛ́ obale Nyɔŋmɔ lɛ no baawa bo waa.

Susumɔ yoo ko ni wɔbaatsɛ lɛ Sakura, ni tsutsu ko lɛ ebaaa ejeŋ jogbaŋŋ lɛ sane lɛ he okwɛ. Be ni akɛ lɛ bɔi Biblia lɛ kasemɔ lɛ, ebana akɛ Nyɔŋmɔ kɛɛ ‘wɔjo ajwamaŋbɔɔ naa foi.’ (1 Korintobii 6:18) Sakura sɔle ebi Nyɔŋmɔ ni ewa lɛ, ni no hã enyɛ ekpa ajwamaŋbɔɔ. Shi loloolo lɛ, ehe bahiaa ni eye henumɔ ni enáa akɛ eyafee nakai ekoŋŋ lɛ nɔ. Ewie akɛ: “Kɛ́ ajwamaŋbɔɔ susumɔi ba mijwɛŋmɔŋ lɛ, mifɔseɔ mitsuiŋ fɛɛ mishwieɔ Yehowa hiɛ ni eye ebua mi, ejaakɛ mile akɛ mikome too minyɛŋ naa madamɔ. Sɔlemɔ ehã mitsi mibɛŋkɛ Yehowa waa.” Mɛi akpekpei abɔ miile Nyɔŋmɔ, tamɔ Sakura. Eewa amɛ ni amɛmiifee tsakemɔi yɛ amɛshihilɛ mli, koni amɛsa ehiɛ.—Filipibii 4:13.

Be ni oyaa nɔ oleɔ Nyɔŋmɔ jogbaŋŋ lɛ, Nyɔŋmɔ hu ‘baale bo’ akɛ enaanyo ni eshwɛɛɛ ehe. (Galatiabii 4:9; Lala 25:14) Kɛkɛ lɛ, Nyɔŋmɔ baahere oyiwala ni ohi ejeŋ hee lɛ mli. Shi te nakai jeŋ hee lɛ mli baatamɔ tɛŋŋ? Sane ni nyiɛ sɛɛ lɛ baatsɔɔ mli.

a Yehowa ji Nyɔŋmɔ gbɛ́i, taakɛ ejeɔ kpo yɛ Biblia lɛ mli lɛ.