Ani Ole?

Mɛɛ gbɛ nɔ sane ko ni aŋma blema tɔ̃ɔ lɛ fiɔ Biblia lɛ sɛɛ?

KƐ́ OTEE Bible Lands Museum ni yɔɔ Jerusalem lɛ, obaana tɛ ko yɛ jɛmɛ ni aŋma nɔ ko yɛ he. Etamɔ nɔ ni aŋma sane ni yɔɔ tɛ lɛ he lɛ aaafee afi 700 kɛmiimɔ afi 600 D.Ŋ.B. Ajie tɛ nɛɛ yɛ tɛkplo ko ni afuɔ mɛi yɛ mli ni bɛŋkɛ Hebron yɛ Israel lɛ. Sane ni aŋma yɛ tɛ lɛ he lɛ kaneɔ akɛ: “Yehowa Zebaot alomɔ Hagav binuu Hagaf.” Mɛɛ gbɛ nɔ sane nɛɛ fiɔ Biblia lɛ sɛɛ? Ehãa wɔnaa akɛ blema be ni aŋmaa Biblia lɛ, mɛi le Nyɔŋmɔ gbɛ́i Yehowa lɛ ni aŋmaa lɛ YHWH yɛ blema Hebri mli lɛ jogbaŋŋ, ni amɛkɛtsuɔ nii daa gbi. Anɔkwa, saji krokomɛi ni mɛi ni yakpeɔ loo amɛyateɔ yɛ tɛkploi nɛɛ amli lɛ eŋmala yɛ gbogboi lɛ ahe lɛ pii yɛ ni Nyɔŋmɔ gbɛ́i loo gbɛ́ii krokomɛi ni Nyɔŋmɔ gbɛ́i lɛ henɔ ko yɔɔ mli lɛ yɛ mli.

Nilelɔ Rachel Nabulsi ni tsuɔ nii yɛ University of Georgia lɛ wie akɛ: “Bɔ ni amɛkɛ gbɛ́i ni ji YHWH lɛ tsu nii shii abɔ lɛ sa kadimɔ waa. . . . Biblia mli saji kɛ saji krokomɛi ni aŋmala yɛ tɛkploi lɛ amli lɛ yeɔ odase akɛ, mɛi ni hi Israel kɛ Yuda lɛ nu he akɛ, mɔ ni gbɛ́i ji YHWH lɛ he miihia amɛ waa yɛ shihilɛ mli.” Enɛ hãa wɔnaa akɛ, bɔ ni Nyɔŋmɔ gbɛ́i lɛ, ni aŋmaa lɛ YHWH yɛ Hebri mli lɛ, jeɔ kpo shii akpei abɔ yɛ Biblia lɛ mli lɛ jeee nɔ ko srɔto ko. Anɔkwa, mɛi ni atsĩ amɛtã yɛ Biblia lɛ mli lɛ ateŋ mɛi pii yɛ ni Nyɔŋmɔ gbɛ́i lɛ henɔ ko jeɔ kpo yɛ amɛgbɛ́i lɛ amli.

Wiemɔ “Yehowa Zebaot,” ni aŋma yɛ tɛ lɛ he lɛ shishi ji, “Yehowa taiatsɛ.” No hewɔ lɛ, etamɔ nɔ ni mɛi ni hi shi yɛ nakai beiaŋ lɛ kɛ Nyɔŋmɔ gbɛ́i, Yehowa lɛ, kɛ wiemɔ ni ji, “Yehowa taiatsɛ” lɛ, fɛɛ fɔɔ nitsumɔ waa. Ebɛ naakpɛɛ mɔ akɛ, Biblia lɛ kɛ wiemɔ ni ji “Yehowa taiatsɛ” lɛ tsu nii fe shii 250 yɛ Hebri Ŋmalɛ lɛ mli, titri lɛ, yɛ Yesaia wolo lɛ, Yeremia wolo lɛ, kɛ Zakaria wolo lɛ mli.