Eŋmɔ Mugɛɛ Etsɔɔ Amɛ!

BE KO lɛ, oblayei enyɔ komɛi nyiɛ Baguio City, yɛ Philippines ni amɛna maŋ odaseyeli shwiili, shi amɛyaaa he. No mli lɛ, nyɛmi yoo ko ni atsɛɔ lɛ Helen lɛ damɔ shwiili lɛ he, ni eŋmɔ mugɛɛ etsɔɔ amɛ. Eyɛ mli akɛ oblayei lɛ waaa amɛdamɔɔɔ shi moŋ, shi bɔ ni Helen ŋmɔ mugɛɛ etsɔɔ amɛ lɛ fee amɛ fɛo waa.

Sɛɛ mli lɛ, oblayei lɛ ta bɔs mli amɛmiiya shĩa ni amɛna ni aŋma jw.org agboiagboi yɛ Maŋtsɛyeli Asa ko he. Amɛkai akɛ nɔ ko nakai nɔŋŋ amɛna ni aŋma yɛ maŋ odaseyeli shwiili lɛ he lɛ. No hewɔ lɛ, amɛyi shi kɛjɛ bɔs lɛ mli ni amɛyakwɛ tao ni kpɛtɛ Maŋtsɛyeli Asa lɛ geeti lɛ naa lɛ koni amɛna be ni asafoi ni kpeɔ yɛ Maŋtsɛyeli Asa lɛ nɔ lɛ baa asafoŋ kpeei.

Oblayei lɛ tee asafoi lɛ ateŋ ekome asafoŋ kpee ni nyiɛ sɛɛ lɛ shishi. Be ni amɛbote Maŋtsɛyeli Asa lɛ nɔ lɛ, ani ole mɔ ni amɛna? Amɛna Helen! Oya nɔŋŋ ni amɛyoo lɛ akɛ lɛ ji mɔ ni ŋmɔ mugɛɛ etsɔɔ amɛ lɛ. Helen wie akɛ: “Be ni mina ni amɛmiiba miŋɔɔ lɛ, mitsui fã fioo, ni mibi mihe akɛ, ‘Mɛni miyafee?’” Oblayei lɛ hã Helen le akɛ amɛna lɛ pɛŋ ni edamɔ maŋ odaseyeli shwiili lɛ he.

Oblayei lɛ nya asafoŋ kpee lɛ he waa kɛ bɔ ni ahere amɛ atuu lɛ. Amɛnuuu he po akɛ gbɔi ji amɛ. Be ni akpa asafoŋ kpee lɛ ni amɛna ni aasaa Maŋtsɛyeli Asa lɛ nɔ lɛ, amɛbi kɛji amɛbaanyɛ amɛye amɛbua lo. Oblayei lɛ ateŋ mɔ kome efã gbɛ kɛtee maŋ kroko nɔ, shi mɔ kome lɛ ni eshwɛ lɛ bɔi asafoŋ kpeei baa, ni akɛ lɛ bɔi Biblia lɛ kasemɔ. Mɛni hã oblayei nɛɛ nya anɔkwale lɛ he? Ŋmɔ ni Helen ŋmɔ mugɛɛ etsɔɔ amɛ lɛ kɛkɛ!