Hã Hiɛnɔkamɔ Ni Oyɔɔ Akɛ Kristofonyo Lɛ Mli Awa

1. Mɛɛ hiɛnɔkamɔ Yehowa ehã wɔná?

YEHOWA ehã wɔná hiɛnɔkamɔ ni nɔ bɛ akɛ wɔbaahi shi kɛya naanɔ. Wɔteŋ mɛi komɛi yɛ hiɛnɔkamɔ akɛ wɔbaahi shi yɛ ŋwɛi ni wɔgboiŋ dɔŋŋ. (1 Kor. 15:50, 53) Ni wɔteŋ mɛi babaoo yɛ hiɛnɔkamɔ akɛ wɔbaahi shikpɔŋ lɛ nɔ kɛya naanɔ ni wɔbaaná gbɔmɔtsoŋ hewalɛ kpakpa kɛ miishɛɛ babaoo. (Kpo. 21:3, 4) Kɛ́ wɔhiɛnɔkamɔ ji wɔbaahi shi kɛya naanɔ yɛ ŋwɛi jio, shikpɔŋ lɛ nɔ jio lɛ, wɔ fɛɛ wɔhiɛnɔkamɔ lɛ kã wɔtsui nɔ waa.

2. Mɛni nɔ wɔhiɛnɔkamɔ lɛ damɔ? Ni mɛni hewɔ wɔkɛɔ nakai?

² Abaanyɛ atsɔɔ wiemɔ “hiɛnɔkamɔ” ni akɛtsu nii yɛ Biblia lɛ mli lɛ shishi akɛ, “nɔ ko kpakpa ni aakpa gbɛ akɛ ebaaba.” Akɛni Yehowa ni hãa wɔnáa hiɛnɔkamɔ hewɔ lɛ, wɔle akɛ bɔ fɛɛ bɔ ni fee lɛ ebaaba mli. (Rom. 15:13) Mɛni hewɔ? Ejaakɛ Yehowa ni ewo wɔ shi lɛ, ni be fɛɛ be lɛ, eyeɔ eshiwoo nɔ. (4 Mo. 23:19) Agbɛnɛ hu, wɔheɔ wɔyeɔ akɛ, Yehowa yɛ shwelɛ lɛ akɛ ebaafee nɔ fɛɛ nɔ ni ewo shi akɛ ebaafee ehã wɔ lɛ, ni eyɛ hewalɛ hu ni ekɛbaafee nakai. Enɛ hewɔ lɛ, wɔhiɛnɔkamɔ lɛ damɔɔɔ nibii ni wɔ wɔsusuɔ akɛ amɛbaaba mli lɛ anɔ shi moŋ, amɛdamɔ odaseyelii ni wɔyɔɔ lɛ anɔ.

3. Mɛni he wɔbaasusu yɛ nikasemɔ nɛɛ mli? (Lala 27:14)

³ Yehowa, wɔ-Tsɛ ni yɔɔ ŋwɛi lɛ sumɔɔ wɔ ni eesumɔ ni wɔkɛ wɔhiɛ afɔ̃ enɔ. (Kanemɔ Lala 27:14.) Kɛ́ wɔkɛ wɔhiɛ fɔ̃ Yehowa nɔ waa lɛ, wɔbaanyɛ wɔdamɔ shihilɛi ni mli wawai anaa, ni ekɔɔɔ he eko nɔ ni baaba wɔsɛɛ lɛ, wɔsheŋ gbeyei ni wɔmiishɛɛ hu etãŋ. Yɛ nikasemɔ nɛɛ mli lɛ, wɔbaasusu bɔ ni wɔhiɛnɔkamɔ lɛ yeɔ ebuaa wɔ ni wɔyaa nɔ wɔsɔmɔɔ Yehowa lɛ he. Klɛŋklɛŋ lɛ, wɔbaakwɛ nɔ hewɔ ni akɛ hiɛnɔkamɔ toɔ sɛ́kɛ kɛ agbɛnɛ hu dade fai he. Kɛkɛ lɛ no sɛɛ lɛ, wɔkwɛ nibii ni kɛ́ wɔfee lɛ wɔhiɛnɔkamɔ lɛ mli baawa.

WƆHIƐNƆKAMƆ LƐ TAMƆ SƐ́KƐ

4. Mɛɛ gbɛ nɔ wɔhiɛnɔkamɔ lɛ tamɔ sɛ́kɛ? (Hebribii 6:19)

⁴ Yɛ wolo ni bɔfo Paulo ŋma eyahã Hebribii lɛ mli lɛ, ekɛ wɔhiɛnɔkamɔ lɛ to sɛ́kɛ he. (Kanemɔ Hebribii 6:19.) Paulo kɛ meelei fã gbɛ shii abɔ. No hewɔ lɛ, ele akɛ aŋmɛɔ meelei sɛ́kɛ koni amɛkakplaŋŋ. Akɛ nɔkwɛmɔnɔ lɛ, be ko lɛ eta meele mli ni ahum ko ni naa wa bɔi tswaa. Be ni ahum lɛ tswaa lɛ, ena akɛ amlakui lɛ ŋmɛ meele lɛ sɛ́kɛ koni ekayashi tɛi ni ejwara. (Bɔf. 27:29, 39-41) Bɔ ni sɛ́kɛ hãaa meelei akplaŋŋ lɛ, nakai nɔŋŋ wɔhiɛnɔkamɔ lɛ yeɔ ebuaa wɔ ni wɔkpaaa Yehowa sɔɔmɔ kɛ́ wɔkɛ naagbai ni mli wawai kpe po. Wɔhiɛnɔkamɔ lɛ hewɔ lɛ, kɛ́ wɔkɛ naagbai ni mli wawai kpe lɛ, wɔyeee wɔtsui fe nine ejaakɛ wɔle akɛ etsɛŋ fɛɛ sɛɛ baafo. Kaimɔ akɛ, Yesu kɛɛ abaawa wɔ yi. (Yoh. 15:20) No hewɔ lɛ, esa akɛ wɔjwɛŋ nibii ni Yehowa ewo shi akɛ ebaafee ehã wɔ wɔsɛɛ lɛ ahe, ejaakɛ no baaye abua wɔ ni wɔfi shi ni wɔya nɔ wɔsɔmɔ lɛ.

5. Eyɛ mli akɛ Yesu le akɛ abaagbe lɛ moŋ, shi mɛɛ gbɛ nɔ ehiɛnɔkamɔ lɛ waje lɛ?

⁵ Yesu le akɛ abaapiŋ lɛ ni ebaagbo. Shi fɛɛ sɛɛ lɛ, ehiɛnɔkamɔ lɛ hewɔ lɛ, eye Yehowa anɔkwa kɛtee gbele mli. Yɛ afi 33 Ŋ.B. Pentekoste gbi lɛ nɔ lɛ, bɔfo Petro tsɛ gbalɛ ko ni yɔɔ Lalai awolo lɛ mli lɛ yisɛɛ. Nakai gbalɛ lɛ hãa wɔnaa akɛ, Yesu kɛ ehiɛ fɔ̃ Yehowa nɔ, ni no hewɔ lɛ esheee nɔ ni baaba enɔ lɛ gbeyei. Ekɛɔ akɛ: “Mahi shi yɛ hiɛnɔkamɔ mli; ejaakɛ oshiŋ mi yɛ Gbonyobu lɛ mli, ni ohãŋ onɔkwafo lɛ ana fitemɔ. . . . Obaahã miishɛɛ ayi mimli obɔ yɛ ohiɛ.” (Bɔf. 2:25-28; Lala 16:8-11) Yesu le akɛ abaagbe lɛ, shi ená hiɛnɔkamɔ ni mli wa akɛ e-Tsɛ Yehowa baatee lɛ shi, ni ebaayafata ehe ekoŋŋ yɛ ŋwɛi ni ebaaná miishɛɛ.​—Heb. 12:2, 3.

6. Mɛni nyɛmi nuu ko wie yɛ hiɛnɔkamɔ he?

⁶ Hiɛnɔkamɔ ni wɔyɔɔ akɛ Kristofoi lɛ eye ebua wɔnyɛmimɛi babaoo ni awaa amɛ yi lɛ ni amɛfi shi. Nyɛmimɛi nɛɛ ateŋ mɔ kome ji nyɛmi nuu anɔkwafo ko ni hi England ni atsɛɔ lɛ Leonard Chinn lɛ. Be ni awuɔ Jeŋ Ta I lɛ, awo lɛ tsuŋ ejaakɛ ekɛɛ ekɛ ehe wooo asraafoi anitsumɔ lɛ mli. Ahã ehi tsuŋwoohe lɛ ekome too nyɔji enyɔ sɔŋŋ, kɛkɛ ni no sɛɛ lɛ, ahã etsu nitsumɔ ni wa waa. Sɛɛ mli lɛ, ewie akɛ: “Nɔ ni mli ni mitsɔ lɛ hã mina akɛ, hiɛnɔkamɔ yeɔ ebuaa wɔ waa ni wɔnyɛɔ wɔfiɔ shi. Yesu, bɔfoi lɛ, gbalɔi lɛ anɔkwɛmɔnɔ lɛ, kɛ agbɛnɛ hu, shiwoi ni nɔ bɛ ni yɔɔ Biblia lɛ mli lɛ fɛɛ hãa wɔhiɛnɔkamɔ lɛ mli waa ni ewajeɔ wɔ ni wɔnyɛɔ wɔfiɔ shi.” Hiɛnɔkamɔ tsɔ tamɔ sɛ́kɛ kɛhã Leonard ni ebaanyɛ etsɔ sɛ́kɛ ehã wɔ hu.

7. Mɛɛ gbɛ nɔ shihilɛi ni mli wawai ni wɔkɛkpeɔ lɛ hãa wɔhiɛnɔkamɔ mli waa? (Romabii 5:3-5; Yakobo 1:12)

⁷ Kɛ́ wɔkɛ shihilɛ ko ni mli wa kpe ni wɔna bɔ ni Yehowa ye ebua wɔ ni wɔnyɛ wɔdamɔ naa lɛ, ehãa wɔnaa akɛ eyɛ wɔhe miishɛɛ ni no hãa wɔhiɛnɔkamɔ lɛ mli waa fe tsutsu lɛ po. (Kanemɔ Romabii 5:3-5; Yakobo 1:12.) Wɔbaanyɛ wɔkɛɛ akɛ, hiɛnɔkamɔ nɛɛ mli wa fe hiɛnɔkamɔ ni wɔyɔɔ be ni wɔnu sane kpakpa lɛ klɛŋklɛŋ kwraa lɛ. Satan miisumɔ ni shihilɛi ni mli wawai ni wɔkɛkpeɔ lɛ ahã wɔkpa Yehowa sɔɔmɔ. Shi Yehowa yelikɛbuamɔ naa lɛ, wɔbaanyɛ wɔdamɔ eko fɛɛ eko naa.

WƆHIƐNƆKAMƆ LƐ TAMƆ DADE FAI

8. Mɛɛ gbɛ nɔ wɔhiɛnɔkamɔ lɛ tamɔ dade fai? (1 Tesalonikabii 5:8)

⁸ Biblia lɛ kɛ wɔhiɛnɔkamɔ lɛ toɔ dade fai hu he. (Kanemɔ 1 Tesalonikabii 5:8.) Asraafonyo buɔ dade fai koni kɛ́ henyɛlɔi tswa eyitso nɔ lɛ, ekapila. Yɛ ta ni wɔkɛ Satan wuɔ lɛ mli lɛ, esa akɛ wɔbu wɔjwɛŋmɔ he. Satan Abonsam kɛ nibii pii kaa wɔ koni ekɛfite wɔjwɛŋmɔ. Bɔ ni dade fai buɔ asraafonyo yitso he lɛ, nakai nɔŋŋ wɔhiɛnɔkamɔ lɛ buɔ wɔjwɛŋmɔ he koni wɔye Yehowa anɔkwa.

9. Te mɛi ni bɛ hiɛnɔkamɔ lɛ feɔ amɛnii amɛhãa tɛŋŋ?

⁹ Kɛ́ hiɛnɔkamɔ ni wɔyɔɔ akɛ wɔbaaná naanɔ wala lɛ mli wa lɛ, ebaahã wɔkpɛ yiŋ kpakpai. Shi kɛ́ wɔhiɛnɔkamɔ mli waaa lɛ, wɔkɛ wɔjwɛŋmɔ baama nibii ni wɔ diɛŋtsɛ wɔshweɔ lɛ anɔ ni wɔhiɛ baakpa nɔ akɛ naanɔ wala ko po yɛ ni wɔbaanyɛ wɔná. Nakai eba lɛ yɛ Kristofoi komɛi ni yɔɔ blema Korinto lɛ agbɛfaŋ. Hemɔkɛyeli ni amɛyɔɔ akɛ Nyɔŋmɔ baatee gbohii lɛ ashi lɛ tã kwraa. (1 Kor. 15:12) Paulo kɛɛ amɛ akɛ, mɛi ni bɛ hiɛnɔkamɔ lɛ jwɛŋŋ amɛwɔsɛɛ he ni amɛfeɔ nɔ fɛɛ nɔ ni amɛtsui sumɔɔ. (1 Kor. 15:32) Ŋmɛnɛ lɛ, mɛi pii bɛ hiɛnɔkamɔ ejaakɛ amɛheee amɛyeee akɛ nibii ni Nyɔŋmɔ ewo shi akɛ ebaafee wɔsɛɛ lɛ baaba mli. Enɛ hewɔ lɛ, amɛfeɔ nɔ fɛɛ nɔ ni amɛsusuɔ akɛ no baahã amɛná miishɛɛ. Shi wɔ lɛ, wɔyɛ hiɛnɔkamɔ ejaakɛ wɔheɔ wɔyeɔ akɛ nibii ni Nyɔŋmɔ ewo shi akɛ ebaafee wɔsɛɛ lɛ baaba mli. Hiɛnɔkamɔ nɛɛ buɔ wɔjwɛŋmɔ he tamɔ dade fai, ni no hewɔ lɛ, wɔkɛ wɔjwɛŋmɔ emaaa nibii ni wɔheloo lɛ shweɔ lɛ anɔ ejaakɛ wɔle akɛ ebaanyɛ efite wɔ kɛ Yehowa teŋ.​—1 Kor. 15:33, 34.

10. Mɛɛ gbɛ nɔ wɔhiɛnɔkamɔ lɛ baanyɛ aye abua wɔ ni wɔkahe Satan amalei lɛ wɔye?

¹⁰ Agbɛnɛ hu, wɔhiɛnɔkamɔ lɛ baaye abua wɔ ni wɔkanu he akɛ sɛɛnamɔ bɛ he akɛ wɔbaamia wɔhiɛ wɔfee nɔ ni sa Yehowa hiɛ. Akɛ nɔkwɛmɔnɔ lɛ, ekolɛ mɔ ko baasusu akɛ, ‘Mináŋ naanɔ wala kɔkɔɔkɔ ejaakɛ bɔ fɛɛ bɔ ni mafee lɛ, minyɛŋ mahi shi yɛ Yehowa shishitoo mlai lɛ anaa.’ Kɛ́ obaakai lɛ, hii lɛ ni ba akɛ amɛmiiba amɛbashɛje Hiob mii lɛ ateŋ mɔ kome ni atsɛɔ lɛ Elifaz lɛ wie nɔ ko ni tamɔ nakai be ni ekɛ Hiob wieɔ lɛ. Ewie akɛ: “Mɛni ji gbɔmɔ adesa ní ehe aaatse?” Kɛkɛ ni ewie yɛ Nyɔŋmɔ he akɛ: “Naa! Emɛi krɔŋkrɔŋi lɛ, eheee amɛ eyeee, ni ŋwɛi po he tseee yɛ ehiɛ.” (Hiob 15:14, 15) Nɔ ni ewie nɛɛ ji amale agbo diɛŋtsɛ! Esa akɛ wɔhã ehi wɔjwɛŋmɔ mli akɛ, Satan ji mɔ ni miisumɔ ni wɔná susumɔi ni tamɔ nɛkɛ. Ele akɛ kɛ́ wɔnu he nakai lɛ, fiofio lɛ wɔhiɛnɔkamɔ lɛ baatã. No hewɔ lɛ, kɛ́ susumɔ ni tamɔ nɛkɛ ba wɔjwɛŋmɔ mli lɛ, esa akɛ wɔjie amrɔ nɔŋŋ ni wɔkɛ wɔjwɛŋmɔ ama nibii ni Yehowa ewo shi akɛ ebaafee lɛ anɔ. Kaahã oyiŋ fee bo kɔshikɔshi kɔkɔɔkɔ akɛ Yehowa miisumɔ ni ohi shi kɛya naanɔ, ni akɛ ebaaye ebua bo ni onyɛ oshɛ nakai oti lɛ he.​—1 Tim. 2:3, 4.

FEEMƆ NIBII NI BAAHÃ OHIƐNƆKAMƆ LƐ MLI AWA DAA

11. Mɛni hewɔ esa akɛ wɔto wɔtsui shi wɔmɛ Yehowa?

¹¹ Nibii komɛi baanyɛ ahã ewa kɛhã wɔ akɛ wɔkɛ wɔhiɛ baafɔ̃ Yehowa nɔ. Ekolɛ, wɔmiinu he akɛ Yehowa shiwoi lɛ asɛɛ miigbala shi ejaakɛ wɔmɛ aahu shi amɛbako mli. Shi esa akɛ wɔkai akɛ, Yehowa bɛ shishijee, ni ebɛ naagbee. No hewɔ lɛ, nɔ ni wɔnaa lɛ akɛ esɛɛ etsɛ lɛ, yɛ ehiɛ lɛ, esɛɛ etsɛko kwraa. (2 Pet. 3:8, 9) Yehowa baatsɔ gbɛ ni hi fe fɛɛ nɔ ehã nibii ni ewie lɛ aba mli. Shi ekolɛ ebaŋ mli be ni wɔ wɔkpaa gbɛ akɛ ebaaba mli lɛ. No hewɔ lɛ, mɛni baaye abua wɔ ni wɔhiɛ wɔhiɛnɔkamɔ lɛ mli kpɛŋŋ be ni wɔmɛɔ ni Yehowa shiwoi lɛ aba mli lɛ?​—Yak. 5:7, 8.

12. Yɛ nɔ ni aŋma yɛ Hebribii 11:1, 6 lɛ naa lɛ, mɛɛ tsakpaa yɔɔ hiɛnɔkamɔ kɛ hemɔkɛyeli teŋ?

¹² Kɛ́ wɔfee nibii ni baahã wɔ kɛ Yehowa teŋ naanyobɔɔ lɛ mli awa lɛ, wɔhiɛnɔkamɔ lɛ hu mli baawa ejaakɛ Yehowa ji mɔ ni baahã wɔhiɛnɔkamɔ lɛ aba mli. Biblia lɛ hãa wɔleɔ akɛ, kɛ́ wɔyɛ hemɔkɛyeli akɛ Yehowa yɛ ni “eji mɛi ni kɛ hiɛdɔɔ taoɔ esɛɛ gbɛ lɛ ajwerelɔ” lɛ, wɔbaaná hiɛnɔkamɔ. (Kanemɔ Hebribii 11:1, 6.) No hewɔ lɛ, kɛ́ hemɔkɛyeli ni wɔyɔɔ akɛ Yehowa yɛ lɛ mli wa lɛ, wɔhiɛnɔkamɔ lɛ mli baawa ni wɔbaahe wɔye akɛ nibii fɛɛ ni ewo shi lɛ baaba mli. Agbɛnɛ, nyɛhãa wɔkwɛa nibii komɛi ni kɛ́ wɔfee lɛ wekukpaa ni yɔɔ wɔ kɛ Yehowa teŋ lɛ mli baawa ejaakɛ no nɔŋŋ baahã wɔhiɛnɔkamɔ lɛ hu mli awa.

13. Kɛ́ wɔmiitao wɔkɛ Nyɔŋmɔ abɔ naanyo lɛ, mɛni esa akɛ wɔfee?

¹³ Sɔlemɔ ohã Yehowa ni okane e-Wiemɔ lɛ. Eyɛ mli akɛ wɔnaaa Yehowa moŋ, shi wɔbaanyɛ wɔkɛ lɛ abɔ naanyo. Wɔbaanyɛ wɔkɛ lɛ awie kɛtsɔ sɔlemɔ nɔ ejaakɛ wɔle akɛ ebaabo wɔ toi. (Yer. 29:11, 12) Wɔbaanyɛ wɔbo Nyɔŋmɔ toi kɛtsɔ e-Wiemɔ lɛ ni wɔbaakane ni wɔjwɛŋ nɔ lɛ nɔ. Kɛ́ wɔkane Nyɔŋmɔ Wiemɔ lɛ ni wɔna bɔ ni eye ebua etsuji anɔkwafoi ni hi shi yɛ blema lɛ, wɔhiɛnɔkamɔ lɛ mli baawa waa. Nibii fɛɛ ni yɔɔ Nyɔŋmɔ Wiemɔ lɛ mli lɛ, “aŋma koni etsɔɔ wɔ nii, koni kɛtsɔ wɔshifimɔ kɛ agbɛnɛ hu, kɛtsɔ Ŋmalɛ lɛ mli miishɛjemɔ lɛ nɔ lɛ, wɔná hiɛnɔkamɔ.”​—Rom. 15:4.

14. Mɛni hewɔ esa akɛ wɔjwɛŋ bɔ ni Yehowa ye shi ni ewo etsuji ni hi shi yɛ blema lɛ anɔ lɛ he?

¹⁴ Hemɔ be kɛjwɛŋ bɔ ni Yehowa eye eshiwoi anɔ ehã lɛ he. Akɛ nɔkwɛmɔnɔ lɛ, susumɔ nɔ ni Yehowa fee ehã Abraham kɛ Sara lɛ he okwɛ. Eyɛ mli akɛ no mli lɛ, amɛfo fɔmɔ afii lɛ moŋ, shi Yehowa wo amɛ shi akɛ amɛbaafɔ. (1 Mo. 18:10) Te Abraham fee enii ehã tɛŋŋ be ni Nyɔŋmɔ wo amɛ shi lɛ? Biblia lɛ kɛɛ: “Ená hiɛnɔkamɔ ni ehe eye hu akɛ ebaatsɔ jeŋmaji pii atsɛ.” (Rom. 4:18) Eyɛ mli akɛ yɛ adesai ahiɛ lɛ, etamɔ nɔ ni shiwoo nɛɛ nyɛŋ aba mli kɔkɔɔkɔ. Shi Abraham he eye akɛ ebaaba mli, ni eba mli nakai hu. (Rom. 4:19-21) Saji ni tamɔ nɛkɛ hãa wɔnaa akɛ, Yehowa shiwoi baa mli be fɛɛ be kɛ́ wɔna lɛ akɛ enyɛŋ eba mli po.

15. Mɛni hewɔ esa akɛ wɔsusu nibii ni Yehowa efee ehã wɔ lɛ ahe lɛ?

¹⁵ Susumɔ nibii ni Yehowa efee ehã bo lɛ ahe. Susumɔ bɔ ni oná Yehowa shiwoi ni yɔɔ e-Wiemɔ lɛ mli ni eba mli lɛ ahe sɛɛ ohã bianɛ lɛ he okwɛ. Akɛ nɔkwɛmɔnɔ lɛ, Yesu wo shi akɛ e-Tsɛ lɛ baahã wɔ nibii fɛɛ ni he hiaa wɔ lɛ. (Mat. 6:32, 33) Agbɛnɛ hu, Yesu kɛɛ kɛ́ wɔbi Yehowa ni edro wɔ mumɔ krɔŋkrɔŋ lɛ, ekɛbaahã wɔ. (Luka 11:13) Yehowa eye shiwoi nɛɛ anɔ. Ekolɛ obaanyɛ osusu nibii komɛi ni Yehowa ewo shi akɛ ebaafee ehã bo, ni efee hu lɛ ahe. Akɛ nɔkwɛmɔnɔ lɛ, ewo shi akɛ ekɛ ohe eshai baake bo, ebaashɛje omii, ni ebaadro bo nibii ni baahã okɛ lɛ teŋ wekukpaa lɛ mli awa. (Mat. 6:14; 24:45; 2 Kor. 1:3) Kɛ́ ojwɛŋ nibii ni Yehowa efee ehã bo lɛ ahe lɛ, hiɛnɔkamɔ ni oyɔɔ akɛ nibii ni ewo shi akɛ ebaafee ehã bo wɔsɛɛ lɛ baaba mli lɛ hu mli baawa.

NYA YƐ HIƐNƆKAMƆ LƐ HEWƆ

16. Mɛni hewɔ hiɛnɔkamɔ ni Yehowa kɛdro wɔ lɛ ji nikeenii ni nɔ bɛ lɛ?

¹⁶ Hiɛnɔkamɔ ni wɔyɔɔ akɛ wɔbaaná naanɔ wala wɔsɛɛ lɛ ji nikeenii ni nɔ bɛ ni Yehowa kɛdro wɔ. Wɔmiikpa enɛ gbɛ waa ejaakɛ wɔheɔ wɔyeɔ akɛ ebaaba. Hiɛnɔkamɔ nɛɛ tamɔ sɛ́kɛ kɛhã wɔ, ejaakɛ kɛ́ wɔkɛ naagbai miikpe jio, aawa wɔ yi jio, akɛɛ abaagbe wɔ jio lɛ, ehãaa wɔkpa Yehowa sɔɔmɔ. Agbɛnɛ hu, etamɔ dade fai ejaakɛ ebuɔ wɔjwɛŋmɔ he ni ehãa wɔjieɔ nibii gbohii kɛjeɔ wɔjwɛŋmɔ mli ni wɔsusuɔ nibii kpakpai ahe. Hiɛnɔkamɔ ni Biblia lɛ ehã wɔná nɛɛ yeɔ ebuaa wɔ ni wɔleɔ Nyɔŋmɔ jogbaŋŋ ni ehãa wɔnaa akɛ esumɔɔ wɔ waa diɛŋtsɛ. Kɛ́ wɔhã wɔhiɛnɔkamɔ lɛ mli wa be fɛɛ be lɛ, wɔbaaná he sɛɛ waa.

17. Mɛni hewɔ wɔnyaa yɛ wɔhiɛnɔkamɔ lɛ hewɔ lɛ?

¹⁷ Be ni bɔfo Paulo ŋma wolo emaje Romabii lɛ, ewie akɛ: “Nyɛnyaa yɛ hiɛnɔkamɔ lɛ hewɔ.” (Rom. 12:12) Paulo le akɛ, kɛ́ etee nɔ eye anɔkwa lɛ, ebaaná naanɔ wala yɛ ŋwɛi. No hewɔ lɛ, enya yɛ nakai hiɛnɔkamɔ lɛ hewɔ. Wɔ hu wɔbaanyɛ wɔnya yɛ wɔhiɛnɔkamɔ lɛ hewɔ ejaakɛ wɔle akɛ bɔ fɛɛ bɔ ni fee lɛ, Yehowa baaye eshiwoi lɛ anɔ. Lalatsɛ lɛ ŋma akɛ, ‘mɔ ni hiɛ kã Yehowa, e-Nyɔŋmɔ lɛ, mɔ ni yeɔ anɔkwa be fɛɛ be lɛ nɔ lɛ, yɛ miishɛɛ.’​—Lala 146:5, 6.