1 | Sɔlemɔ ‘Nyɛshɛrɛa Nibii Ni Hãa Nyɛyeɔ Nyɛtsui Lɛ Fɛɛ Nyɛshwiea Enɔ’

BIBLIA LƐ KƐƐ: ‘Nyɛshɛrɛa nibii ni hãa nyɛyeɔ nyɛtsui lɛ fɛɛ nyɛshwiea [Nyɔŋmɔ nɔ], ejaakɛ ejwɛŋɔ nyɛhe.’—1 PETRO 5:7.

Nɔ Ni Etsɔɔ

Yehowa Nyɔŋmɔ ekɛɛ wɔ akɛ, wɔkɛɛ lɛ nɔ fɛɛ nɔ ni gbaa wɔnaa. (Lala 55:22) Wɔbaanyɛ wɔsɔle yɛ nɔ fɛɛ nɔ he—nɔ ko wulu jio, nɔ ko bibioo jio. Kɛ́ eji nɔ ko ni kã wɔtsui nɔ lɛ, belɛ, ekã Yehowa hu tsui nɔ, ejaakɛ ejwɛŋɔ wɔhe ni enuɔ he ehãa wɔ. Sɔlemɔ ji nɔ ko ni he hiaa waa ni baanyɛ ahã wɔhe ajɔ wɔ.—Filipibii 4:6, 7.

Bɔ Ni Obaanyɛ Oná He Sɛɛ

Kɛ́ wɔkɛ jwɛŋmɔŋ naagba ko miikpe lɛ, ekolɛ wɔbaanu he akɛ mɔ ko mɔ ko nuuu wɔ shishi. Jeee be fɛɛ be mɛi baanyɛ anu bɔ ni onuɔ he ohãa lɛ shishi jogbaŋŋ. (Abɛi 14:10) Kɛ́ wɔjɛ wɔtsuiŋ wɔkɛɛ Nyɔŋmɔ bɔ ni wɔnuɔ he wɔhãa lɛ, ebaabo wɔ toi jogbaŋŋ, ni ebaanu wɔ shishi hu. Yehowa naa wɔ, ele nɔ fɛɛ nɔ ni suɔ wɔtsui, ni eesumɔ ni wɔsɔle wɔkɛɛ lɛ nɔ fɛɛ nɔ ni gbaa wɔnaa.—2 Kronika 6:29, 30.

Kɛ́ wɔkɛ Yehowa gba sane yɛ sɔlemɔ mli lɛ, hemɔkɛyeli ni wɔyɔɔ akɛ ejwɛŋɔ wɔhe lɛ mli waa. Wɔbaanyɛ wɔnu he tamɔ lalatsɛ lɛ nu he lɛ nɔŋŋ, mɔ ni sɔle akɛ: “Ona mimanehulu lɛ; ole nɔ ni haoɔ mi waa lɛ.” (Lala 31:7) Kɛ́ wɔkɛ shihilɛi ni mli wawai miikpe lɛ, le ni wɔle akɛ Yehowa nuɔ bɔ ni wɔnuɔ he wɔhãa lɛ shishi lɛ pɛ po baanyɛ awa wɔ ni wɔkpee naa. Jeee na kɛkɛ enaa shihilɛ ni wɔtsɔɔ mli lɛ, enuɔ shishi hu. Anɔkwa, enuɔ shishi fe mɔ fɛɛ mɔ. Ele nɔ ni wɔtsɔɔ mli lɛ, ni etsɔɔ Biblia lɛ nɔ eshɛjeɔ wɔmii ni ewoɔ wɔ hewalɛ.

Bɔ Ni Biblia Lɛ Waa Mɛi Julian

Nɔ Ni Tsuiyeli Feɔ Mi

“Miyeɔ mitsui waa, ni miyɛ jwɛŋmɔŋ naagba ko ni hãa mɔ feɔ nɔ kome too lɛ nɔŋŋ shii abɔ. (obsessive-compulsive disorder, loo OCD). Oona kɛ onaaa nɔŋŋ lɛ, miiye mitsui. Manyɛ manu he akɛ miyɛ jogbaŋŋ, shi nɔŋŋ kɛkɛ lɛ mibɔi mitsuiyeli ni jeee yɛ yiŋtoo pɔtɛɛ ko hewɔ. Ni kɛ́ miyɛ mɛi ateŋ ji be ni miyeɔ mitsui waa. Misusuɔ bɔ ni ekolɛ amɛnaa mi amɛhãa lɛ he fe nine.

“Mɛi ni le naagba ni mikɛkpeɔ lɛ waa mi waa. Eji anɔkwale akɛ, bei komɛi lɛ, nɔ ni amɛwieɔ lɛ jeee nɔ ni misumɔɔ ni manu. Shi mihiɛ sɔɔ bɔ ni amɛmiaa amɛhiɛ ni amɛwa mi lɛ waa.

“Bei komɛi lɛ, mitsui ni miyeɔ kɛ OCD lɛ hãa ewaa kɛhãa mi akɛ masɔle. Ebiɔ ni mamia mihiɛ waa dani mihiɛ ahi mihe nɔ ni manyɛ mikɛ Yehowa agba sane yɛ sɔlemɔ mli. Bei pii lɛ, susumɔi pii baa mijwɛŋmɔŋ, hewɔ lɛ, minyɛɛɛ mikɛ mijwɛŋmɔ ama nɔ kome nɔ. Kɛ́ eba lɛ nakai lɛ, ewaa kɛhãa mi akɛ mahã Yehowa ale bɔ ni minuɔ he mihãa.”

Bɔ Ni Biblia Lɛ Waa Mi

“Biblia lɛ ni mikaseɔ lɛ ehã mibana akɛ, jeee ja misɔle kakadaŋŋ loo miwie kɛ naatselɛ dani Nyɔŋmɔ baabo mi toi. Bei komɛi kɛ́ ewa kɛhã mi akɛ makɛɛ Yehowa bɔ ni minuɔ he mihãa lɛ, misɔleɔ kɛkɛ akɛ: ‘Yehowa, ofainɛ wa mi.’ Kɛ́ misɔle nakai po lɛ, minuɔ he akɛ Yehowa nuɔ mi shishi, ni ehãa mi nɔ ni he hiaa mi yɛ nakai ŋmɛlɛtswaa lɛ nɔ. Yɛ sɔlemɔ sɛɛ lɛ, miyanaa dɔkitafoi hu. Miishɛɛ sane ji akɛ, nibii enyɔ nɛɛ fɛɛ ewa mi ni mishihilɛ lɛ ehi saŋŋ. Eyɛ mli akɛ mimiaa mihiɛ waa dani minyɛɔ mibiɔ mi-Tsɛ ni yɔɔ ŋwɛi lɛ ni ewa mi moŋ, shi mifeɔ nakai, ejaakɛ mile akɛ esumɔɔ mi ni eesumɔ ni ewa mi.”