NIKASEMƆ 6
Nɔ Ni Biblia Lɛ Tsɔɔ Wɔ Yɛ Mɔ Ni Hã Aŋma Lɛ He
“Ŋmaa wiemɔi ni mikɛɔ bo lɛ fɛɛ owo wolo mli.”—YER. 30:2.
LALA 96 Nyɔŋmɔ Wolo Lɛ—Eji Jwetri
NƆ NI ABAASUSU HEa
1. Mɛni hewɔ eŋɔɔ onaa waa akɛ Yehowa ehã wɔ Biblia lɛ?
EŊƆƆ wɔnaa waa akɛ Yehowa Nyɔŋmɔ ehã wɔ Biblia lɛ! Yehowa ehã wɔ ŋaawoi kpakpai yɛ Biblia lɛ mli ni baanyɛ aye abua wɔ ni wɔtsu wɔnaagbai lɛ ahe nii. Agbɛnɛ hu, ehã wɔ hiɛnɔkamɔ ni nɔ bɛ. Nɔ ni fe fɛɛ lɛ, Yehowa tsɔɔ Biblia lɛ nɔ ehãa wɔleɔ lɛ jogbaŋŋ. Kɛ́ wɔjwɛŋ sui kpakpai ni eyɔɔ lɛ anɔ lɛ, etaa wɔtsuiŋ ni etsirɛɔ wɔ ni wɔkɛ lɛ abɔ naanyo.—Lala 25:14.
2. Mɛɛ gbɛi srɔtoi anɔ Yehowa etsɔ ekɛ adesai ewie?
2 Yehowa miisumɔ ni mɛi ale lɛ. Yɛ blema lɛ, etsɔ lamɔi, ninai, kɛ ŋwɛibɔfoi anɔ ekɛ mɛi wie. (4 Mo. 12:6; Bɔf. 10:3, 4) Shi akɛni Yehowa miisumɔ ni wɔle saji nɛɛ ni wɔkase hewɔ lɛ, ehã aŋmala fɛɛ ‘awo wolo ko mli.’ (Yer. 30:2) “Anɔkwa Nyɔŋmɔ lɛ gbɛ lɛ ja kɛmɔ shi.” (Lala 18:30) No hewɔ lɛ, wɔbaanyɛ wɔhe wɔye kɛ wɔtsui fɛɛ akɛ, ŋma ni ehã aŋma ehe sane afɔ̃ shi lɛ ji gbɛ ni hi fe fɛɛ ni ebaanyɛ etsɔ nɔ ehã wɔle lɛ.
3. Mɛni Yehowa fee ni ehã anyɛ abaa e-Wiemɔ lɛ yi kɛbashi ŋmɛnɛ? (Yesaia 40:8)
3 Kanemɔ Yesaia 40:8. Hii kɛ yei anɔkwafoi ená ŋaawoi kpakpai ni yɔɔ Nyɔŋmɔ Wiemɔ lɛ mli lɛ ahe sɛɛ afii akpei abɔ nɛ. Shi wɔle akɛ, aŋmala Nyɔŋmɔ Wiemɔ lɛ yɛ nibii ni etsɛɛɛ fitemɔ anɔ, ni klɛŋklɛŋ nɔ ni aŋmala lɛ eko eko kwraa bɛ shihilɛ mli ŋmɛnɛ. No hewɔ lɛ, te fee tɛŋŋ ni mɛi anine shɛ nɔ lɛ? Yehowa hã akwɛ wolokpoi ni aŋmala klɛŋklɛŋ lɛ anɔ aŋmala pii ashwie shi. Eyɛ mli akɛ mɛi ni ŋmala lɛ yeee emuu moŋ, shi amɛtse amɛhe amɛtsu amɛnitsumɔ lɛ jogbaŋŋ diɛŋtsɛ. Biblia he nilelɔ ko wie yɛ Hebri Ŋmalɛ lɛ he akɛ: “Abaanyɛ awie kɛ nɔmimaa akɛ blema wolo ko kwraa bɛ ni abaa yi jogbaŋŋ tamɔ no.” No hewɔ lɛ, eyɛ mli akɛ aŋma Biblia lɛ etsɛ, ni aŋmala yɛ nibii ni etsɛɛɛ fitemɔ anɔ, ni mɛi ni kwɛ klɛŋklɛŋ wolokpoi lɛ anɔ amɛŋmala eko amɛshwie shi lɛ yeee emuu moŋ, shi wɔbaanyɛ wɔwie kɛ nɔmimaa akɛ, saji ni Yehowa hã aŋmala ashwie shi afii pii ni eho nɛ lɛ nɔŋŋ yɔɔ Biblia ni wɔyɔɔ ŋmɛnɛ lɛ mli.
4. Mɛni he wɔbaasusu yɛ nikasemɔ nɛɛ mli?
4 “Nikeenii kpakpai fɛɛ kɛ nikeenii ni hi kɛwula shi fɛɛ lɛ,” Yehowa ŋɔɔ ejɛɔ. (Yak. 1:17) Nikeenii ni hi waa ni Yehowa ehã wɔ lɛ ateŋ ekome ji Biblia lɛ. Kɛ́ mɔ ko ke bo nɔ ko lɛ, no tsɔɔ bo nɔ ko yɛ mɔ lɛ he. Ehãa onaa kɛji mɔ lɛ le bo jogbaŋŋ ni ele nibii ni he hiaa bo. Nakai nɔŋŋ Biblia lɛ hãa wɔleɔ nɔ ko yɛ Yehowa mɔ ni kɛhã wɔ lɛ he. Kɛ́ wɔkase Biblia lɛ jogbaŋŋ lɛ, ehãa wɔnaa akɛ Yehowa le wɔ jogbaŋŋ, ni ele nibii ni he hiaa wɔ. Yɛ nikasemɔ nɛɛ mli lɛ, wɔbaana bɔ ni Biblia lɛ hãa wɔnaa akɛ Yehowa hiɛ kã shi, eyeɔ jalɛ sane, ni esumɔɔ wɔ. Nyɛhãa wɔjea shishi kɛ bɔ ni Biblia lɛ hãa wɔnaa akɛ Yehowa hiɛ kã shi lɛ.
BIBLIA LƐ HÃA WƆNAA AKƐ YEHOWA HIƐ KÃ SHI
5. Mɛni ji nɔ kome ni wɔle yɛ Biblia lɛ he ni hãa wɔnaa akɛ Yehowa hiɛ kã shi?
5 Yehowa ŋaawoo hãa mɔ hiɛ kãa shi, ni ele akɛ eŋaawoo he miihia wɔ. Eŋaawoi ni hãa mɔ hiɛ kãa shi lɛ babaoo yɛ Biblia lɛ mli. Ŋaawoi ni yɔɔ Biblia lɛ mli lɛ yeɔ ebuaa mɛi waa, ni ehãa amɛtsakeɔ amɛshihilɛ. Be ni Mose ŋma Biblia lɛ mli klɛŋklɛŋ woji lɛ, ekɛɛ Israelbii lɛ, ni ji Nyɔŋmɔ webii lɛ akɛ: “Wiemɔ nɛɛ jeee wiemɔ folo kɛhã nyɛ, shi moŋ, no nɔ nyɛwala damɔ.” (5 Mo. 32:47) Mɛi ni kɛ Biblia lɛ mli ŋaawoi tsu nii yɛ blema lɛ ná miishɛɛ, ni nibii tee lɛ jogbaŋŋ yɛ amɛshihilɛ mli. (Lala 1:2, 3) Eyɛ mli akɛ aŋma Biblia lɛ etsɛ waa moŋ, shi eeya nɔ eetsake mɛi lolo. Akɛ nɔkwɛmɔnɔ lɛ, kɛ́ okwɛ sane ni yitso ji, “Biblia Lɛ Tsakeɔ Mɛi” ni yɔɔ jw.org lɛ nɔ lɛ, obaana mɛi fe 40 ni kɛ Biblia mli ŋaawoo tsu nii ni no ehã amɛtsake amɛsubaŋ lɛ ahe saji yɛ jɛmɛ.—1 Tes. 2:13.
6. Mɛni hewɔ wɔbaanyɛ wɔwie akɛ wolo ko kwraa bɛ ni tamɔ Biblia lɛ?
6 Wolo ko kwraa bɛ ni tamɔ Biblia lɛ! Mɛni hewɔ? Nɔ hewɔ lɛ ji, Yehowa Nyɔŋmɔ, mɔ ni hã aŋma lɛ ji Ofe lɛ, ehiɔ shi kɛyaa naanɔ, ni mɔ ko mɔ ko bɛ ni hiɛ kã shi tamɔ lɛ. Woji pii yɛ ni mɛi ni ŋmala lɛ egboi ni ŋaawoi ni yɔɔ mli lɛ abe eho, shi ŋaawoi ni yɔɔ Biblia lɛ mli lɛ abe hooo. Amɛye amɛbua mɛi yɛ blema, ni amɛmiiye amɛmiibua mɛi ŋmɛnɛ. Kɛ́ wɔkane Biblia lɛ ni wɔjwɛŋ nibii ni wɔkaseɔ yɛ mli lɛ anɔ lɛ, Yehowa, mɔ ni hã aŋma Biblia lɛ, baahã emumɔ krɔŋkrɔŋ lɛ aye abua wɔ ni wɔna bɔ ni wɔbaafee wɔkɛ emli ŋaawoi lɛ atsu nii. (Lala 119:27; Mal. 3:16; Heb. 4:12) Hɛɛ, Yehowa, mɔ ni hã aŋma Biblia lɛ gboko, ni eesumɔ ni eye ebua bo. Esa akɛ enɛ atsirɛ wɔ ni wɔkane Biblia lɛ daa gbi, aloo jeee nakai?
Mɛɛ gbɛ nɔ Biblia lɛ hã Nyɔŋmɔ webii ni hi shi yɛ blema lɛ fee ekome? Ni mɛɛ gbɛ nɔ efeɔ nakai ŋmɛnɛ? (Kwɛmɔ kuku 7-8)
7. Mɛɛ gbɛ nɔ Nyɔŋmɔ Wiemɔ lɛ ye ebua Nyɔŋmɔ webii ni hi shi yɛ blema lɛ ni amɛfee ekome?
7 Nɔ kroko ni sa kadimɔ yɛ Biblia lɛ he ni hãa wɔnaa akɛ Yehowa hiɛ kã shi ji, bɔ ni efeɔ Nyɔŋmɔ webii ekome lɛ. Be ni Israelbii lɛ yashɛ Shiwoo Shikpɔŋ lɛ nɔ lɛ, amɛhi hei srɔtoisrɔtoi ni amɛtsu nitsumɔi srɔtoisrɔtoi hu. Amɛteŋ mɛi komɛi tsɔmɔ wolɛi, mɛi komɛi kwɛ tsinai, ni mɛi komɛi hu ye okwaa. Kulɛ, ewaaa akɛ Israelbii ni yɔɔ Shiwoo Shikpɔŋ lɛ afã ko lɛ baajie amɛjwɛŋmɔ kɛje amɛnyɛmimɛi ni yɔɔ afãi krokomɛi lɛ anɔ. Shi Yehowa to gbɛjianɔ ni Israelbii lɛ fɛɛ anaa abakpe shi yɛ he kome yɛ be kɛ beiaŋ koni akane e-Wiemɔ lɛ ahã amɛ ni agbala mli atsɔɔ amɛ. (5 Mo. 31:10-13; Neh. 8:2, 8, 18) Kɛ́ okwɛ lɛ, te Israelnyo anɔkwafo ko baanu he ehã tɛŋŋ kɛ́ eyashɛ Yerusalem ni ena enyɛmimɛi akpekpei abɔ ni ejɛ maŋ lɛ hei srɔtoi kɛba jɛmɛ lɛ? Gbɛjianɔ nɛɛ ni Yehowa to ehã ewebii lɛ hã amɛfee ekome. Sɛɛ mli be ni ato Kristofoi asafo lɛ hu shishi lɛ, mɛi srɔtoisrɔtoi ni wieɔ wiemɔi srɔtoisrɔtoi batsɔmɔ Kristofoi. Hii yɛ mli, ni yei yɛ mli. Mɛi ni abuɔ amɛ yɛ mli, ni mɛi ni abuuu amɛ yɛ mli. Shikatsɛmɛi yɛ mli, ni ohiafoi hu yɛ mli. Shi akɛni amɛ fɛɛ amɛsumɔɔ Ŋmalɛ lɛ hewɔ lɛ, amɛnyɛ amɛfee ekome kɛjá anɔkwa Nyɔŋmɔ lɛ. Ehe bahia ni mɛi fɛɛ ni etsɔmɔ Kristofoi lɛ akpe, ejaakɛ no dani amɛnyɛmimɛi lɛ baanyɛ aye abua amɛ ni amɛnu Nyɔŋmɔ Wiemɔ lɛ shishi jogbaŋŋ.—Bɔf. 2:42; 8:30, 31.
8. Mɛɛ gbɛ nɔ Biblia lɛ hãa Yehowa webii ni yɔɔ ŋmɛnɛ lɛ feɔ ekome?
8 Yehowa, ni ji Nyɔŋmɔ ni hiɛ kã shi lɛ, miiya nɔ eetsɔɔ ewebii lɛ nii kɛtsɔ Biblia lɛ nɔ koni amɛfee ekome. Nibii fɛɛ ni Yehowa miitao wɔle yɛ ehe lɛ yɛ Biblia lɛ mli. Kɛ́ wɔtee asafoŋ kpeei, kpeei bibii, kɛ kpeei wuji lɛ, akaneɔ Ŋmalɛ lɛ ahãa wɔ, agbalaa mli, ni akɛ wɔ susuɔ he. Enɛ hãa wɔnaa akɛ, Biblia lɛ ji dɛŋdade ni he hiaa waa ni Yehowa kɛtsuɔ nii koni ewebii lɛ ‘afee ekome kɛsɔmɔ lɛ.’—Zef. 3:9.
9. Kɛ́ wɔmiitao wɔnu Biblia lɛ shishi lɛ, mɛɛ su esa akɛ wɔná? (Luka 10:21)
9 Hã wɔkwɛ nɔ kroko yɛ Biblia lɛ he ni hãa wɔnaa akɛ Yehowa hiɛ kã shi. Yehowa hã aŋma Biblia lɛ fãi pii bɔ ni kɛ́ mɔ ko baaa ehe shi lɛ, enyɛŋ enu shishi kɔkɔɔkɔ. (Kanemɔ Luka 10:21.) Mɛi pii kaneɔ Biblia lɛ. Biblia he nilelɔ ko po wie akɛ: “Wolo ko bɛ ni mɛi pii ekane fe Biblia lɛ, ni mɛi ni kaneɔ lɛ toɔ amɛtsui shi ni amɛkaneɔ lɛ jogbaŋŋ.” Shi mɛi ni baa amɛhe shi lɛ pɛ nuɔ nɔ ni amɛkaneɔ lɛ shishi ni amɛkɛtsuɔ nii.—2 Kor. 3:15, 16.
10. Mɛɛ nɔ kroko yɔɔ Biblia lɛ he ni hãa wɔnaa akɛ Yehowa hiɛ kã shi?
10 Nɔ kroko yɛ Biblia lɛ he ni hãa wɔnaa akɛ Yehowa hiɛ kã shi. Yehowa kɛ Ŋmalɛ lɛ tsuɔ nii kɛtsɔɔ wɔ nii akɛ kuu; shi jeee no pɛ. Ekɛtsɔɔ wɔ nii akɛ aŋkroaŋkroi hu, ni ekɛshɛjeɔ wɔmii. Kɛ́ okome too ota shi ni ookane Biblia lɛ, onaa akɛ Yehowa susuɔ ohe. (Yes. 30:21) Ani okɛ naagba ko ekpe ni okane ŋmalɛ ko ni onu he akɛ bo tuuntu ohewɔ aŋma nakai ŋmalɛ lɛ? Wɔteŋ mɛi pii ená niiashikpamɔ nɛɛ pɛŋ, ni kɛ̃lɛ jeee wɔ pɛ wɔhewɔ aŋma Biblia lɛ. Aŋma ahã mɛi fɛɛ. No hewɔ lɛ, ani ebɛ naakpɛɛ akɛ wolo ni aŋma ahã mɛi fɛɛ lɛ nyɛɔ etsuɔ bo tuuntu onaagba lɛ he nii? Lɛɛlɛŋ, Yehowa, mɔ ni hã aŋma Biblia lɛ, ji mɔ ni hiɛ kã shi fe fɛɛ yɛ jeŋ muu lɛ fɛɛ.—2 Tim. 3:16, 17.
BIBLIA LƐ HÃA WƆNAA AKƐ NYƆŊMƆ YEƆ JALƐ SANE
11. Be ni aŋmaa Biblia lɛ, mɛni Nyɔŋmɔ fee ni hãa wɔnaa akɛ ekwɛɛɛ hiɛiaŋ?
11 Yehowa su kroko ji, jalɛsaneyeli. (5 Mo. 32:4) Bei pii lɛ, mɛi ni yeɔ jalɛ sane lɛ kwɛɛɛ hiɛiaŋ, ni wɔle akɛ Yehowa kwɛɛɛ hiɛiaŋ. (Bɔf. 10:34, 35; Rom. 2:11) Wɔnaa enɛ yɛ wiemɔi ni ehã aŋma Biblia lɛ yɛ mli lɛ mli. Aŋma Biblia lɛ klɛŋklɛŋ woji 39 lɛ pii yɛ Hebri mli, ejaakɛ no mli lɛ no ji wiemɔ ni Nyɔŋmɔ webii lɛ nuɔ shishi jogbaŋŋ. Shi be ni shɛɔ blema Kristofoi lɛ abeiaŋ lɛ, Greek wiemɔ lɛ ji wiemɔ ni mɛi pii wieɔ. No hewɔ lɛ, aŋma Biblia lɛ naagbee woji 27 lɛ pii yɛ nakai wiemɔ lɛ mli. Kulɛ Yehowa baanyɛ ehã aŋma e-Wiemɔ lɛ yɛ wiemɔ kome pɛ mli, shi efeee nakai. Ŋmɛnɛ lɛ, mɛi aaafee akpekpe toi akpei kpaanyɔ (8,000,000,000) ni yɔɔ shikpɔŋ lɛ nɔ, ni amɛwieɔ wiemɔi srɔtoisrɔtoi pii. Te gbɔmɛi nɛɛ baafee tɛŋŋ amɛbale Yehowa?
12. Mɛni ji nɔ kome ni hãa wɔnaa akɛ gbalɛ ni yɔɔ Daniel 12:4 lɛ eba mli yɛ naagbee gbii nɛɛ amli?
12 Yehowa tsɔ gbalɔ Daniel nɔ egba akɛ, yɛ naagbee be lɛ mli lɛ “anɔkwa nilee,” ni ji nilee ni yɔɔ Biblia lɛ mli lɛ “baafa babaoo.” Ni tsɔɔ akɛ, mɛi pii baanu Biblia lɛ shishi. (Kanemɔ Daniel 12:4.) Nɔ kome ni ehã gbalɛ nɛɛ eba mli ji, atsɔɔ Biblia lɛ kɛ Biblia lɛ he woji ashishi, aprinti ni akɛ eko hu ewo Intanɛt lɛ nɔ, ni mɛi babaoo anine eshɛ eko nɔ. Atsɔɔ Biblia lɛ shishi kɛtee wiemɔi pii amli, ni mɛi pii anine eshɛ eko nɔ fe woji krokomɛi fɛɛ. Bibliai ni yɔɔ maŋ lɛ mli lɛ ekomɛi ajara wa waa. Shi bianɛ lɛ, Yehowa webii etsɔɔ Nyɔŋmɔ Wiemɔ lɛ fɛɛ loo efã ko shishi kɛtee wiemɔi fe 240 amli, ni mɔ fɛɛ mɔ baanyɛ aná eko, ni ahɔ̃ɔɔ. Enɛ hewɔ lɛ, mɛi ni jɛ jeŋmaji fɛɛ mli lɛ ená hegbɛ akɛ amɛbaanu “Maŋtsɛyeli lɛ he sane kpakpa” lɛ dani naagbee lɛ aba. (Mat. 24:14) Yehowa, wɔ-Nyɔŋmɔ ni yeɔ jalɛ sane lɛ, miisumɔ ni mɛi pii akane e-Wiemɔ lɛ koni amɛle lɛ, ejaakɛ esumɔɔ wɔ fɛɛ waa.
BIBLIA LƐ HÃA WƆNAA AKƐ NYƆŊMƆ SUMƆƆ WƆ
13. Mɛni hewɔ wɔbaanyɛ wɔkɛɛ akɛ Biblia lɛ hãa wɔnaa akɛ Yehowa sumɔɔ wɔ lɛ? (Yohane 21:25)
13 Biblia lɛ hãa wɔnaa akɛ, Yehowa sui lɛ ateŋ nɔ ni fe fɛɛ ji, suɔmɔ. (1 Yoh. 4:8) Wɔnaa enɛ yɛ nɔ ni Yehowa hã aŋma yɛ Biblia lɛ mli kɛ nɔ ni ehãaa aŋma yɛ mli lɛ mli. Ehã wɔle nibii ni baahã wekukpaa kpakpa ahi wɔ kɛ lɛ teŋ, wɔná miishɛɛ yɛ shihilɛ mli bianɛ, ni wɔná naanɔ wala. Saji pii yɛ ni kulɛ ebaanyɛ ekɛfata he ehã wɔ, shi ele akɛ saji nɛɛ yeŋ amɛbuaŋ wɔ yɛ esɔɔmɔ lɛ mli, ni amɛbaasu wɔtsui kɛkɛ. Enɛ hewɔ lɛ ekɛfataaa he. Enɛ hãa wɔnaa akɛ, esumɔɔ wɔ.—Kanemɔ Yohane 21:25.
14. Mɛɛ gbɛ nɔ gbɛ ni Yehowa tsɔɔ nɔ ehãa wɔleɔ nɔ ni esumɔɔ kɛ nɔ ni esumɔɔɔ yɛ Biblia lɛ mli lɛ hãa wɔnaa akɛ esumɔɔ wɔ?
14 Gbɛ ni Yehowa tsɔɔ nɔ ehãa wɔleɔ nɔ ni esumɔɔ ni wɔfee kɛ nɔ ni esumɔɔɔ ni wɔfeɔ yɛ Biblia lɛ mli lɛ hu hãa wɔnaa akɛ esumɔɔ wɔ. Nɔ najiaŋ ni ebaahã wɔ mlai lalaala yɛ nɔ fɛɛ nɔ he lɛ, eyeɔ ebuaa wɔ koni wɔ diɛŋtsɛ wɔsusu saji ahe ni wɔkpɛ yiŋ ni ja, ni enɛ hãa wɔnaa akɛ ebuɔ wɔ. Kɛ́ wɔkwɛ Biblia lɛ mli lɛ, wɔnaa mɛi ashihilɛ he saji, gbalɛi, kɛ ŋaawoi kpakpai. Yehowa tsɔɔ enɛɛmɛi anɔ eyeɔ ebuaa wɔ koni wɔjɛ wɔtsuiŋ wɔsumɔ lɛ ni wɔbo lɛ toi.
Mɛni hewɔ esa akɛ wɔjwɛŋ bɔ ni Yehowa kɛ etsuji ni hi shi yɛ blema lɛ ye ehã lɛ he? (Kwɛmɔ kuku 15)
15. (a) Mɛɛ gbɛ nɔ Biblia lɛ hãa wɔnaa akɛ Yehowa susuɔ wɔhe? (b) Yɛ mfoniri lɛ mli lɛ, mɛɛ Biblia mli gbɔmɛi gbekɛ yoo fioo lɛ, oblanyo lɛ, kɛ yoo onukpa lɛ jwɛŋɔ amɛsane lɛ he? (1 Mo. 39:1, 10-12; 2 Maŋ. 5:1-3; Luka 2:25-38)
15 Biblia lɛ hãa wɔnaa akɛ, Yehowa susuɔ wɔhe waa. Mɛni tsɔɔ nakai? Saji pii yɛ Biblia lɛ mli ni hãa wɔnaa bɔ ni mɛi ni awie amɛhe yɛ mli lɛ nu he amɛhã. Enɛ hewɔ lɛ, kɛ́ wɔkane amɛhe saji lɛ etaa wɔtsuiŋ, ejaakɛ wɔnaa akɛ amɛji ‘gbɔmɛi ni yɔɔ henumɔi tamɔ wɔ nɔŋŋ.’ (Yak. 5:17) Nɔ ni fe fɛɛ lɛ, kɛ́ wɔna bɔ ni Yehowa kɛ mɛi ni yɔɔ henumɔi tamɔ wɔ nɔŋŋ lɛ ye ehã lɛ, ehãa wɔnaa faŋŋ akɛ, “Yehowa musuŋ tsɔɔ lɛ waa, ni enaa mɔbɔ hu.”—Yak. 5:11.
16. Kɛ́ wɔkane Biblia lɛ ni wɔna bɔ ni Yehowa kɛ mɛi ni tɔ̃ enɔ lɛ ye ehã lɛ, mɛni no hãa wɔnaa yɛ ehe? (Yesaia 55:7)
16 Nɔ kroko ni yɔɔ Biblia lɛ mli ni hãa wɔnaa akɛ Yehowa sumɔɔ wɔ ji, bɔ ni ekɛ etsuji lɛ yeɔ ehãa kɛ́ amɛtɔ̃ enɔ lɛ. Biblia lɛ hãa wɔnaa akɛ, kɛ́ wɔtɔ̃ Yehowa nɔ lɛ, ekpoŋ wɔ. Israelbii lɛ tɔ̃ Yehowa nɔ shii abɔ, shi be fɛɛ be lɛ, kɛ́ amɛtsake amɛtsui lɛ ekɛkeɔ amɛ. (Kanemɔ Yesaia 55:7.) Yehowa hã blema Kristofoi lɛ hu na akɛ esumɔɔ amɛ waa. Akɛ nɔkwɛmɔnɔ lɛ, be ni nuu ko fee esha ko ni yɔɔ hiɛdɔɔ ni etsake etsui lɛ, Yehowa kɛ emumɔ lɛ tsirɛ bɔfo Paulo ni ewo enyɛmimɛi Kristofoi lɛ hewalɛ ni ‘amɛkɛ ehe ake lɛ ni amɛshɛje emii.’ (2 Kor. 2:6, 7; 1 Kor. 5:1-5) Yehowa shɛɛɛ etsuji nɛɛ efɔ̃ɔɔ be ni amɛtɔ̃ enɔ lɛ, ni enɛ sa kadimɔ waa. Nɔ moŋ ni efee ji, eye ebua amɛ, ejaje amɛ, ni ehã amɛku amɛsɛɛ kɛba eŋɔɔ ekoŋŋ. Nakai ewo shi akɛ ebaafee ehã wɔ hu kɛ́ wɔtɔ̃ enɔ ni wɔtsake wɔtsui.—Yak. 4:8-10.
OHIƐ ASƆ NYƆŊMƆ WIEMƆ LƐ, EJAAKƐ EJI “NIKEENII NI HI KƐWULA SHI”
17. Mɛni hewɔ Biblia lɛ ji nikeenii ni nɔ bɛ?
17 Biblia lɛ ni Yehowa kɛdro wɔ lɛ ji nikeenii ni nɔ bɛ diɛŋtsɛ. Mɛni hewɔ wɔkɛɔ nakai? Tamɔ bɔ ni wɔbana yɛ nikasemɔ nɛɛ mli lɛ, Biblia lɛ hãa wɔnaa akɛ Nyɔŋmɔ hiɛ kã shi, eyeɔ jalɛ sane, ni esumɔɔ wɔ. Agbɛnɛ hu, ehãa wɔnaa akɛ Yehowa miisumɔ ni wɔle lɛ ni wɔbatsɔmɔ enanemɛi.
18. Mɛni wɔbaanyɛ wɔfee kɛtsɔɔ akɛ wɔhiɛ sɔɔ Biblia lɛ, ni ji “nikeenii ni hi kɛwula shi” ni Yehowa kɛdro wɔ lɛ?
18 Be fɛɛ be lɛ, esa akɛ wɔhã ana akɛ wɔbuɔ Biblia lɛ akɛ “nikeenii ni hi kɛwula shi,” ni agbɛnɛ hu, wɔhiɛ sɔɔ waa. (Yak. 1:17) Nɔ kome ni wɔbaanyɛ wɔfee kɛtsɔɔ nakai ji, ni wɔbaakane ni wɔjwɛŋ nɔ. Kɛ́ wɔfee nakai lɛ, Yehowa, mɔ ni hã aŋma Biblia lɛ, baajɔɔ wɔ ni ‘wɔbaale lɛ.’—Abɛi 2:5.
LALA 98 Ŋmalɛi Lɛ Jɛ Nyɔŋmɔ Mumɔ Lɛŋ
a Biblia lɛ yeɔ ebuaa wɔ ni wɔbasumɔɔ Yehowa. Mɛɛ gbɛ nɔ eyeɔ ebuaa wɔ ni wɔnaa akɛ Nyɔŋmɔ hiɛ kã shi, eyeɔ jalɛ sane, ni esumɔɔ wɔ? Nɔ ni wɔbaasusu he yɛ nikasemɔ nɛɛ mli lɛ baahã wɔhiɛ asɔ Nyɔŋmɔ Wiemɔ lɛ waa ni wɔna lɛ akɛ nikeenii ni jɛ wɔ-Tsɛ ni yɔɔ ŋwɛi lɛ ŋɔɔ.