Teremɔ Nɔ Ni Esa Akɛ Otere Lɛ, Ni Oshɛrɛ Nɔ Ni Eshwɛ Lɛ Fɛɛ Oshwie

1. Yɛ nɔ ni awie yɛ Hebribii 12:1 lɛ naa lɛ, mɛni esa akɛ wɔfee koni wɔnyɛ wɔda wala he foi lɛ wɔgbe naa?

BIBLIA lɛ kɛ wɔshihilɛ akɛ Kristofoi lɛ toɔ foidamɔ he. Mɛi ni baada foi nɛɛ kɛyashi naagbee lɛ baaná naanɔ wala. (2 Tim. 4:7, 8) Esa akɛ wɔmia wɔhiɛ ni wɔya nɔ wɔda foi lɛ, titri lɛ, akɛni eshwɛ fioo ni wɔbaatse kpãa lɛ hewɔ. Mɔ ko ni nyɛ eda foi nɛɛ egbe naa ji, bɔfo Paulo, ni etsɔɔ wɔ nɔ ko ni baanyɛ aye abua wɔ ni wɔ hu wɔnyɛ wɔda wɔgbe naa. Ekɛɛ ‘wɔshɛ nɔ fɛɛ nɔ ni tsii wɔfɔ̃ ni wɔkɛ shifimɔ ada foi ni kã wɔhiɛ lɛ.’​—Kanemɔ Hebribii 12:1.

2. Kɛ́ akɛɛ ‘wɔshɛ nɔ fɛɛ nɔ ni tsii wɔfɔ̃’ lɛ, te atsɔɔ tɛŋŋ?

² Be ni Paulo wie akɛ ‘wɔshɛ nɔ fɛɛ nɔ ni tsii wɔfɔ̃’ lɛ, ani no mli lɛ eetsɔɔ akɛ esaaa akɛ Kristofonyo tereɔ jatsu ko kwraa? Dabi, jeee nakai no mli lɛ etsɔɔ lɛ. Nɔ moŋ ni etsɔɔ ji, esa akɛ wɔshɛ nɔ fɛɛ nɔ ni tsii ni he ehiaaa lɛ wɔfɔ̃ koni wɔnyɛ wɔda foi lɛ jogbaŋŋ ni ekatɔ wɔ. Kɛ́ wɔmiitao wɔda foi lɛ kɛyagbe naa lɛ, esa akɛ wɔkɛ wɔhiɛ afɔ̃ shi koni kɛ́ wɔna nɔ ko ni tsii ni he ehiaaa ni baanyɛ awo wɔnajiaŋ lɛ, wɔjie kɛje jɛmɛ oya nɔŋŋ. Shi yɛ nakai beiaŋ nɔŋŋ lɛ, esaaa akɛ wɔshɛrɛɔ jatsui ni esa akɛ wɔtere lɛ wɔshwieɔ. Kɛ́ wɔshɛrɛ wɔshwie lɛ, wɔjie wɔhe kɛje foidamɔ lɛ mli. (2 Tim. 2:5) Mɛni ji jatsui ni esa akɛ wɔtere lɛ?

3. (a) Yɛ nɔ ni aŋma yɛ Galatiabii 6:5 lɛ naa lɛ, mɛni esa akɛ wɔtere? (b) Mɛni he wɔbaasusu yɛ nikasemɔ nɛɛ mli? Ni mɛni hewɔ?

³ Kanemɔ Galatiabii 6:5. Paulo kɛɛ: “Mɔ fɛɛ mɔ baatere lɛ diɛŋtsɛ ejatsu.” Mɛni ji ‘wɔ diɛŋtsɛ wɔjatsu’ ni Paulo wieɔ he yɛ biɛ lɛ? No ji nibii ni Yehowa kpaa gbɛ akɛ wɔteŋ mɔ fɛɛ mɔ baatsu yɛ esɔɔmɔ lɛ mli lɛ, ni nɛkɛ nibii nɛɛ, mɔ ko nyɛŋ etsu ehã mɔ ko. Nikasemɔ nɛɛ baahã wɔna nibii nɛɛ ekomɛi kɛ bɔ ni wɔbaafee wɔtsu amɛhe nii. Agbɛnɛ hu, wɔbaana nibii komɛi ni tsii ni he ehiaaa ni ekolɛ wɔtere ni esa akɛ wɔshɛrɛ wɔshwie kɛ bɔ ni wɔbaafee wɔfee nakai. Kɛ́ wɔtere wɔ diɛŋtsɛ wɔjatsu, ni wɔshɛrɛ nibii ni he ehiaaa ni tsii lɛ wɔshwie lɛ, no baaye abua wɔ ni wɔda wala he foi lɛ kɛyashi naagbee.

JATSUI NI ESA AKƐ WƆTERE

4. Mɛni hewɔ shi ni wɔwo Yehowa akɛ wɔbaafee esuɔmɔnaa nii kɛya naanɔ lɛ jeee nɔ ko ni wɔnyɛŋ wɔye nɔ lɛ? (Kwɛmɔ mfoniri lɛ hu.)

⁴ Shi ni wɔwo Yehowa akɛ wɔbaasɔmɔ lɛ kɛya naanɔ lɛ. Be ni wɔjɔɔ wɔhe nɔ wɔhãa Yehowa lɛ, wɔwo lɛ shi akɛ wɔbaajá lɛ ni wɔbaafee esuɔmɔnaa nii. Esa akɛ wɔye shiwoo nɛɛ nɔ. Enɛ feemɔ kãaa shi akɔɔɔ, ni kɛ̃lɛ ejeee nɔ ko ni wɔnyɛŋ wɔfee, ejaakɛ Yehowa bɔ wɔ bɔ ni wɔbaanyɛ wɔfee esuɔmɔnaa nii. (Kpo. 4:11) Mɛni tsɔɔ nakai? Klɛŋklɛŋ lɛ, ebɔ wɔ bɔ ni wɔbaanu he yɛ wɔtsui mli akɛ wɔtao esɛɛgbɛ ni wɔjá lɛ, ni agbɛnɛ hu, ebɔ wɔ tamɔ bɔ ni eyɔɔ lɛ. Enɛ hewɔ lɛ, wɔbaanyɛ wɔbɛŋkɛ lɛ ni wɔjɛ wɔsuɔmɔ mli wɔfee esuɔmɔnaa nii. (Lala 40:8) Kɛfata he lɛ, kɛ́ wɔfee Nyɔŋmɔ suɔmɔnaa nii, ni wɔnyiɛ e-Bi lɛ sɛɛ lɛ, ‘wɔhe baajɔ wɔ.’​—Mat. 11:28-30.

5. Mɛni baaye abua bo ni oye shi ni owo Yehowa lɛ nɔ? (1 Yohane 5:3)

⁵ Mɛni baaye abua bo ni otere jatsu nɛɛ? Nibii enyɔ baanyɛ aye abua bo. Klɛŋklɛŋ nɔ lɛ ji, feemɔ nibii ni baahã osumɔ Yehowa waa. Nibii nɛɛ eko ji, ni obaahe be osusu nibii kpakpai fɛɛ ni efee ehã bo kɛ nibii ni ewo shi akɛ ebaafee ehã bo wɔsɛɛ lɛ ahe. Kɛ́ obasumɔ Yehowa waa lɛ, ewaŋ tsɔ kɛhãŋ bo akɛ obaabo lɛ toi. (Kanemɔ 1 Yohane 5:3.) Nɔ ni ji enyɔ lɛ, kasemɔ Yesu. Yesu nyɛ efee Yehowa suɔmɔnaa nii, ejaakɛ esɔle ebi Yehowa dɛŋ yelikɛbuamɔ ni ekɛ ejwɛŋmɔ ma jweremɔnɔ ni kã ehiɛ lɛ nɔ. (Heb. 5:7; 12:2) Bo hu sɔlemɔ obi Yehowa ni ewaje bo, ni ohã shi ni ewo akɛ ebaadro wɔ naanɔ wala lɛ ahi ojwɛŋmɔ mli be fɛɛ be. Kɛ́ ofee nibii ni baahã osumɔ Nyɔŋmɔ waa, ni okase e-Bi lɛ, obaanyɛ oye shi ni owo Yehowa lɛ nɔ.

6. Mɛni hewɔ esa akɛ wɔtsu sɔ̃i ni jwere wɔnɔ yɛ weku lɛ mli lɛ ahe nii? (Kwɛmɔ mfoniri lɛ hu.)

⁶ Sɔ̃i ni jwere wɔnɔ yɛ weku lɛ mli. Yɛ wala he foi ni wɔdaa lɛ mli lɛ, esa akɛ wɔsumɔ Yehowa kɛ Yesu fe wɔwekumɛi. (Mat. 10:37) Shi enɛ etsɔɔɔ akɛ wɔku wɔhiɛ wɔshwie sɔ̃i ni jwere wɔnɔ yɛ weku lɛ mli lɛ anɔ. Anɔkwa, kɛ́ wɔmiitao wɔsa Nyɔŋmɔ kɛ Kristo hiɛ lɛ, esa akɛ wɔtsu sɔ̃i nɛɛ ahe nii jogbaŋŋ moŋ. (1 Tim. 5:4, 8) Kɛ́ wɔtsu sɔ̃i ni jwere wɔnɔ yɛ weku lɛ mli lɛ ahe nii lɛ, wɔbaaná miishɛɛ waa. Yehowa le akɛ, kɛ́ wu kɛ ŋa sumɔɔ amɛhe ni amɛteŋ mɔ fɛɛ mɔ bu enyɛmi, ni fɔlɔi tsɔse amɛbii ni amɛjie suɔmɔ kpo amɛtsɔɔ amɛ, ni bii hu bo amɛfɔlɔi toi lɛ, ebaahã miishɛɛ ahi weku lɛ mli.​—Efe. 5:33; 6:1, 4.

7. Mɛni baaye abua bo ni otsu nɔ ni Yehowa kpaa gbɛ akɛ otsu yɛ weku lɛ mli lɛ he nii?

⁷ Mɛni baaye abua bo ni otere jatsu nɛɛ? Kɛ́ wu ji bo jio, ŋa ji bo jio, bi ji bo jio lɛ, okɛ ŋaawoi kpakpai ni yɔɔ Biblia lɛ mli lɛ atsu nii. Kaafee nɔ ni bo diɛŋtsɛ osumɔɔ loo nɔ ni mɛi pii feɔ yɛ he ni oyɔɔ lɛ loo nɔ ni mɛi ni tsɛɔ amɛhe nilelɔi lɛ ekɛɛ akɛ afee lɛ. (Abɛi 24:3, 4) Kasemɔ asafo lɛ woji lɛ. Ŋaawoi kpakpai yɛ mli ni baaye abua bo ni okɛ Biblia mli shishitoo mlai atsu nii. Akɛ nɔkwɛmɔnɔ lɛ, saji ni yitso ji, “Yelikɛbuamɔ Kɛhã Weku Lɛ” tsɔɔ mɛi ni ebote gbalashihilɛ mli, fɔlɔi, kɛ oblahii kɛ oblayei nibii ni amɛbaanyɛ amɛfee kɛkpee naagbai pɔtɛi komɛi ni amɛkɛkpeɔ ŋmɛnɛ lɛ anaa.b Tswaa ofai shi akɛ, okɛ nɔ ni Biblia lɛ ewie lɛ baatsu nii kɛ́ weku lɛ mli bii krokomɛi kɛtsuuu nii po. Kɛ́ ofee nakai lɛ, weku muu lɛ fɛɛ baaná he sɛɛ, ni Yehowa baajɔɔ bo.​—1 Pet. 3:1, 2.

8. Mɛni baanyɛ ajɛ yiŋ ni wɔkpɛɔ lɛ amli kɛba?

⁸ Nibii ni jɛɔ yiŋ ni wɔkpɛɔ lɛ amli kɛbaa. Yehowa ehã wɔ hegbɛ akɛ wɔ diɛŋtsɛ wɔkpɛ wɔyiŋ yɛ saji ahe, ni eesumɔ ni wɔkpɛ yiŋ kpakpai koni wɔná miishɛɛ. Shi kɛ́ wɔkpɛ yiŋ gbohii lɛ, wɔbaaná naagbai, ni esaaa akɛ wɔkpaa gbɛ akɛ Yehowa baatsĩ naa. (Gal. 6:7, 8) No hewɔ lɛ, kɛ́ wɔkpɛ yiŋ gbonyo ko loo wɔwie nɔ ko loo wɔfee nɔ ko ni wɔsusuuu he ni wɔmiiná naagbai lɛ, esaaa akɛ wɔshwaa mɔ ko. Bei komɛi po lɛ, nɔ ni wɔfee lɛ hewɔ lɛ, wɔhenilee baagwao wɔ. Shi kɛ́ wɔkpɛlɛ nɔ akɛ yiŋ ko ni wɔkpɛ lɛ ni kɛ naagba lɛ ba lɛ, no baanyɛ atsirɛ wɔ ni wɔjaje wɔhe eshai, wɔsaa nibii ni wɔfite lɛ, ni wɔkayafee nakai nii lɛ dɔŋŋ. Kɛ́ wɔfee nibii nɛɛ lɛ, no baaye abua wɔ ni wɔya nɔ wɔda wala he foi lɛ.

9. Kɛ́ okpɛ yiŋ gbonyo ko ni eye awui momo lɛ, mɛni obaanyɛ ofee? (Kwɛmɔ mfoniri lɛ hu.)

⁹ Mɛni baaye abua bo ni otere jatsu nɛɛ? Kɛ́ okpɛ yiŋ gbonyo ko ni eye awui momo lɛ, mɛni obaanyɛ ofee? Klɛŋklɛŋ lɛ, esa akɛ oyɔse akɛ nɔ ni eba lɛ eba momo. No hewɔ lɛ, kaafite obe ni ooye nɔ ni eba lɛ he ŋkɔmɔ loo ooshwa mɛi krokomɛi yɛ he. Moŋ lɛ, kpɛlɛmɔ nɔ akɛ okpɛ yiŋ gbonyo, ni okwɛ akɛ kɛjɛ bianɛ kɛyaa lɛ, mɛni obaanyɛ otsu yɛ shihilɛ lɛ he. Kɛ́ esha ko ni oyafee lɛ, jɛɛ heshibaa mli osɔle ohã Yehowa ni okɛɛ lɛ akɛ otɔ̃, ni okpa lɛ fai ni ekɛ ohe ake bo. (Lala 25:11; 51:3, 4) Kɛ́ nɔ ni oyafee lɛ esa mɛi komɛi ahe lɛ, kpa amɛ fai. Ni kɛ́ esa akɛ oyana asafoŋ onukpai lɛ, bɔɔ mɔdɛŋ ni ofee nakai. (Yak. 5:14, 15) Kasemɔ nii kɛjɛ otɔmɔi lɛ amli, ni omia ohiɛ ni okafee nakai dɔŋŋ. Kɛ́ ofee nibii nɛɛ, Yehowa baana bo mɔbɔ, ni ebaashɛje omii ni eye ebua bo.​—Lala 103:8-13.

NIBII NI TSII NI ESA AKƐ ‘WƆSHƐRƐ WƆSHWIE’

10. Mɛni hewɔ esaaa akɛ wɔkɛ otii ni wɔnyɛŋ wɔshɛ he kɔkɔɔkɔ lɛ mamɔɔ wɔhiɛ? (Galatiabii 6:4)

¹⁰ Otii ni wɔnyɛŋ wɔshɛ he kɔkɔɔkɔ. Kɛ́ wɔkɛ wɔhe to mɛi krokomɛi ahe lɛ, no baanyɛ ahã wɔkɛ otii ni wɔnyɛŋ wɔshɛ he kɔkɔɔkɔ amamɔ wɔhiɛ. (Kanemɔ Galatiabii 6:4.) Kɛ́ be fɛɛ be lɛ wɔkɛ wɔhe miito mɛi ahe lɛ, no baanyɛ ahã wɔhe atsɛ̃ amɛ loo wɔnu he akɛ wɔfee fe bɔ ni amɛfeɔ lɛ. (Gal. 5:26) Kɛ́ mɛi komɛi miitsu nɔ ko yɛ Yehowa sɔɔmɔ lɛ mli ni wɔka akɛ doo lɛ wɔ hu wɔbaafee eko eyɛ mli akɛ wɔhewalɛ shɛɛɛ lɛ, wɔbaanyɛ wɔye wɔhe awui. Biblia lɛ kɛɛ, “kɛ́ aakwɛ nɔ ko gbɛ ni ebaaa mli mra lɛ, ewoɔ tsui hela.” (Abɛi 13:12) No hewɔ lɛ, kɛ́ wɔkɛ otii ni wɔnyɛŋ wɔshɛ he kɔkɔɔkɔ mamɔ wɔhiɛ lɛ, kɛ́ okwɛ lɛ, te wɔbaayagbe naa wɔhã tɛŋŋ? Wɔbaagbo deŋme efolo, ni wɔnyɛŋ wɔda wala he foi lɛ jogbaŋŋ.​—Abɛi 24:10.

11. Mɛni baaye abua bo ni okɛ otii ni onyɛŋ oshɛ he kɔkɔɔkɔ lɛ akamamɔ ohiɛ?

¹¹ Te obaafee tɛŋŋ oshɛ nii ni tsii nɛɛ ofɔ̃? Okɛ otii ni onyɛŋ oshɛ he akamamɔ ohiɛ ejaakɛ Yehowa sumɔɔɔ ni ofeɔ nakai. Nɔ ni obaanyɛ otsu yɛ esɔɔmɔ lɛ mli lɛ, no pɛ ekpaa gbɛ akɛ otsu. (2 Kor. 8:12) Be fɛɛ be lɛ, hã ehi ojwɛŋmɔ mli akɛ, Yehowa kɛ nɔ ni onyɛɔ otsuɔ lɛ etooo nɔ ni mɛi krokomɛi nyɛɔ amɛtsuɔ lɛ he. (Mat. 25:20-23) Nɔ pɛ ni ekpaa gbɛ ji, ni osɔmɔ lɛ kɛ osusuma muu fɛɛ, oye lɛ anɔkwa, ni ofi shi kɛyawula shi. Ni kɛ́ ofee nakai lɛ, ebaaná he miishɛɛ waa. Kpɛlɛmɔ nɔ akɛ, afii abɔ ni oye, ogbɔmɔtsoŋ hewalɛ, kɛ oshihilɛ hewɔ lɛ, amrɔ nɛɛ, jeee nɔ fɛɛ nɔ obaanyɛ otsu. Kasemɔ Barzilai; kɛ́ aahã bo nitsumɔ ko ni oona akɛ afii abɔ ni oye kɛ ogbɔmɔtsoŋ hewalɛ hewɔ lɛ, ebaawa kɛhã bo akɛ obaatsu he nii jogbaŋŋ lɛ, kaamɔ mli. (2 Sam. 19:35, 36) Agbɛnɛ hu, kasemɔ Mose, ni oŋmɛ gbɛ ni mɛi aye amɛbua bo, ni okɛ nitsumɔi awo mɛi adɛŋ hu. (2 Mo. 18:21, 22) Kɛ́ ofee nakai lɛ, no baatsɔɔ akɛ obaa ohe shi, ni no baaye abua bo ni okɛ otii ni onyɛŋ oshɛ he akamamɔ ohiɛ ni no hã ebawa kɛhã bo akɛ obaada wala he foi lɛ.

12. Ani esa akɛ wɔnu he akɛ wɔ ejɛ ni mɔ ko kpɛ yiŋ gbonyo ko? Tsɔɔmɔ mli.

¹² Kaanu he akɛ bo ofee ni mɔ ko kpɛ yiŋ gbonyo ko. Wɔnyɛŋ wɔkpɛ yiŋ wɔhã mɛi, ni nakai nɔŋŋ jeee be fɛɛ be wɔbaanyɛ wɔtsĩ naagbai ni baanyɛ ajɛ yiŋ gbonyo ko ni mɔ ko ekpɛ lɛ mli kɛba lɛ anaa. Akɛ nɔkwɛmɔnɔ lɛ, gbekɛbii komɛi yɛ ni kɛ́ amɛdara lɛ, amɛkpɛɔ amɛyiŋ akɛ amɛsɔmɔŋ Yehowa dɔŋŋ. Kɛ́ eba lɛ nakai lɛ, amɛfɔlɔi lɛ atsui kumɔɔ. Bei komɛi lɛ, fɔlɔi nɛɛ nuɔ he akɛ amɛ amɛfee ni amɛbi lɛ kpɛ nakai yiŋ gbonyo lɛ, ni enɛ batsɔɔ tamɔ jatsu ko ni tsii ni amɛtere. Shi enɛ jeee jatsu ko ni Yehowa miisumɔ ni amɛtere.​—Rom. 14:12.

13. Mɛni fɔlɔ ko baanyɛ afee kɛ́ ebi ko kpa Yehowa sɔɔmɔ?

¹³ Te obaafee tɛŋŋ oshɛ nii ni tsii nɛɛ ofɔ̃? Kaimɔ akɛ, Yehowa ehã wɔteŋ mɔ fɛɛ mɔ hegbɛ ni lɛ diɛŋtsɛ ekpɛ eyiŋ yɛ saji ahe. No hewɔ lɛ, kɛ́ mɔ ko baasɔmɔ Yehowa jio, esɔmɔŋ lɛ jio, lɛ diɛŋtsɛ eyiŋkpɛɛ ni. Fɔlɔi, Yehowa le akɛ nyɛyeee emuu, no hewɔ lɛ, nɔ pɛ ni ekpaa gbɛ ji, ni nyɛbaafee bɔ fɛɛ bɔ ni nyɛbaanyɛ kɛtsɔse nyɛbii lɛ. Naagbee lɛ, nyɛbii lɛ ni baakpɛ amɛyiŋ kɛji amɛbaasɔmɔ Yehowa loo amɛsɔmɔŋ lɛ. (Abɛi 20:11) Nakai yiŋkpɛɛ lɛ bɛ nyɛdɛŋ. Bei komɛi lɛ, fɔlɔi komɛi haoɔ yɛ yiŋ gbonyo ko ni amɛkpɛ be ni amɛtsɔseɔ amɛbii lɛ hewɔ. Kɛ́ nakai onuɔ he lɛ, sɔlemɔ ni ogba Yehowa bɔ ni onuɔ he ohãa lɛ ni okpa lɛ fai ni ekɛ ohe esha lɛ ake bo. Ele akɛ, nɔ ni eba lɛ eba momo, ni nɔ ko bɛ ni obaanyɛ ofee yɛ he. Ele hu akɛ, nɔ ni obi lɛ edu lɛ, no nɔŋŋ ebaakpa, ni nɔ ko bɛ ni obaanyɛ ofee yɛ he. Shi hã ehi ojwɛŋmɔ mli akɛ, kɛ́ obi lɛ kpɛ eyiŋ akɛ ebaaku esɛɛ kɛba Yehowa ŋɔɔ lɛ, Yehowa kɛ miishɛɛ baahere lɛ atuu.​—Luka 15:18-20.

14. Mɛni hewɔ mɔ henilee ni gbaa enaa fe nine lɛ ji jatsu ni tsii ni esa akɛ wɔshɛ wɔfɔ̃ lɛ?

¹⁴ Henilee ni gbaa mɔ naa fe nine. Kɛ́ wɔfee esha lɛ, ŋwanejee ko bɛ he akɛ, wɔhenilee baagba wɔnaa. Shi Yehowa sumɔɔɔ ni wɔhenilee gbaa wɔnaa fe nine. Eji jatsu ko ni tsii ni esa akɛ wɔshɛ wɔfɔ̃. Mɛni tsɔɔ akɛ mɔ ko henilee miigba enaa fe nine? Kɛ́ wɔjaje esha lɛ ni wɔfee lɛ, wɔtsake wɔtsui, ni wɔmiifee nibii fɛɛ ni esa akɛ wɔfee koni wɔkayafee nakai esha lɛ dɔŋŋ lɛ, esa akɛ wɔhe wɔye akɛ Yehowa kɛke wɔ. (Bɔf. 3:19) Kɛ́ wɔfee nibii nɛɛ fɛɛ lɛ, Yehowa sumɔɔɔ ni wɔhenilee gbaa wɔnaa yɛ nakai esha lɛ he dɔŋŋ. Ele akɛ, kɛ́ wɔhenilee tee nɔ egba wɔnaa be ni wɔfee nibii nɛɛ fɛɛ lɛ, no baanyɛ aye wɔ awui. (Lala 31:10) Kɛ́ wɔhao fe nine lɛ, ebaanyɛ ehã wɔkpa wala he foi ni wɔdaa lɛ.​—2 Kor. 2:7.

15. Kɛ́ ohenilee miigba onaa fe nine lɛ, mɛni baaye abua bo? (1 Yohane 3:19, 20) (Kwɛmɔ mfoniri lɛ hu.)

¹⁵ Te obaafee tɛŋŋ oshɛ nii ni tsii nɛɛ ofɔ̃? Kɛ́ ohenilee miigba onaa fe nine lɛ, kaimɔ akɛ Yehowa kɛ “eshai keɔ lɛɛlɛŋ.” (Lala 130:4) No hewɔ lɛ, ni ekɛɛ ekɛke bo lɛ, belɛ ekɛke bo. Yehowa ewo shi akɛ, kɛ́ wɔtsake wɔtsui lɛɛlɛŋ lɛ, ‘ekaiŋ wɔhe esha lɛ dɔŋŋ.’ (Yer. 31:34) Enɛ tsɔɔ akɛ, Yehowa damɔŋ nakai esha lɛ nɔ egbalaŋ wɔtoi. No hewɔ lɛ, kɛ́ esha lɛ ni oyafee lɛ hewɔ lɛ okɛ naagbai komɛi miikpe lɛ, kaanu he akɛ Yehowa ni miigbala otoi. Ni kɛ́ esha lɛ hewɔ lɛ, sɔɔmɔ hegbɛi komɛi eŋmɛɛ bo lɛ, kaahã omli fu ohe. Yehowa ejie ejwɛŋmɔ kɛje esha lɛ ni ofee lɛ nɔ, ni bo hu esa akɛ ofee nakai.​—Kanemɔ 1 Yohane 3:19, 20.

DA FOI LƐ BƆ NI BAAHÃ ONINE ASHƐ JWEREMƆNƆ LƐ NƆ

16. Mɛni esa akɛ wɔyɔse be ni wɔyaa nɔ wɔdaa wala he foi lɛ?

¹⁶ Be ni wɔdaa wala he foi lɛ, esa akɛ ‘wɔda lɛ bɔ ni baahã wɔnine ashɛ jweremɔnɔ lɛ nɔ.’ (1 Kor. 9:24) Nɔ ni baaye abua wɔ ni wɔfee nakai ji, ni wɔbaana jatsui ni esa akɛ wɔtere kɛ nibii ni tsii ni esa akɛ wɔshɛrɛ wɔshwie. Yɛ nikasemɔ nɛɛ mli lɛ, wɔsusu nibii ni esa akɛ wɔtere kɛ nibii ni esa akɛ wɔshɛrɛ wɔshwie lɛ fioo pɛ he. Shi babaoo yɛ lolo. Yesu kɛɛ, “ŋmaayeli babaoo kɛ dãanumɔ babaoo kɛ tsui ni ayeɔ yɛ shihilɛ mli nibii ahe lɛ” baanyɛ ahe wɔtsui. (Luka 21:34) Ŋmalɛi ni atsĩ tã yɛ kuku nɛɛ mli lɛ kɛ ekrokomɛi baanyɛ aye abua wɔ ni wɔna nibii ni esa akɛ wɔfee koni wɔnyɛ wɔya nɔ wɔda wala he foi lɛ.        

17. Mɛni hewɔ wɔbaanyɛ wɔná nɔmimaa akɛ, wɔbaanyɛ wɔda wala he foi lɛ kɛyashi wɔbaagbe naa?

¹⁷ Wɔle akɛ, wɔbaanyɛ wɔda wala he foi lɛ wɔgbe naa, ejaakɛ Yehowa baahã wɔ hewalɛ lɛ ni wɔkɛfee nakai. (Yes. 40:29-31) No hewɔ lɛ, onijiaŋ akaje wui; kasemɔ bɔfo Paulo. Emia ehiɛ waa eda wala he foi lɛ koni enine ashɛ jweremɔnɔ lɛ nɔ. (Fip. 3:13, 14) Mɔ ko mɔ ko nyɛŋ eda foi nɛɛ ehã bo, shi Yehowa baaye ebua bo ni oye kunim. Ebaanyɛ eye ebua bo ni otere jatsui ni esa akɛ otere lɛ, ni ebaaye ebua bo ni oshɛrɛ nibii ni tsii ni esaaa akɛ otereɔ lɛ oshwie. (Lala 68:19) Yehowa baaye ebua bo ni okɛ shifimɔ ada wala he foi lɛ ni onine ashɛ jweremɔnɔ lɛ nɔ!