Esa Akɛ Wɔteŋ Mɔ Fɛɛ Mɔ Akpɛ Yiŋ Ko

Kɛ́ ootao ofã gbɛ kɛya he ko ni oleee jɛmɛ lɛ, mɛni obaafee?

1. 1. Okɛ ohiɛ baatsɔɔ gbɛ ni otsui kɛɔ bo akɛ oyatsɔ nɔ lɛ.

2. 2. Obaanyiɛ mɛi komɛi ni efeɔ bo akɛ amɛle gbɛ lɛ sɛɛ.

3. 3. Obaatao yelikɛbuamɔ ni sa, ekolɛ okɛ GPS, loo map baatsu nii, loo obaabi onaanyo ko ni oheɔ lɛ oyeɔ, ni le gbɛ lɛ.

Kɛ́ ohala klɛŋklɛŋ nɔ lɛ loo nɔ ni ji enyɔ lɛ, obaayashɛ he ko kɛ̃, shi ekolɛ jeee he ni otaoɔ oya lɛ. Shi kɛ́ ohala nɔ ni ji etɛ lɛ, obaanyɛ ohe oye akɛ obaayashɛ he ni otaoɔ oya lɛ.

Wɔbaanyɛ wɔkɛ wɔshihilɛ ato gbɛfãa he. Tamɔ bɔ ni wɔmiisumɔ ni wɔyashɛ he ni wɔtaoɔ wɔya lɛ, nakai nɔŋŋ wɔshweɔ ni wɔsɛɛ lɛ, nibii ahi ahã wɔ. Kɛ́ wɔsɛɛ lɛ, nibii baahi ahã wɔ jio, ehiŋ ehãŋ wɔ jio lɛ, nɔ titri ni edamɔ nɔ ji he ni wɔyataoɔ yelikɛbuamɔ yɛ kɛ́ wɔmiikpɛ wɔyiŋ.

Eyɛ mli akɛ yiŋ srɔtoi ni wɔkpɛɔ yɛ saji ahe lɛ ateŋ babaoo ahe ehiaaa tsɔ moŋ, shi amɛteŋ ekomɛi ahe hiaa waa. Yiŋkpɛi ni he hiaa waa nɛɛ hãa anaa nɔ ni wɔbuɔ lɛ akɛ eja loo ejaaa. Yiŋkpɛi ni tamɔ nɛkɛ lɛ baahã nibii ahi ahã wɔ kɛ mɛi ni wɔsumɔɔ amɛsane lɛ, loo ebaaye wɔ kɛ amɛ fɛɛ awui. Yiŋ ni wɔkpɛɔ yɛ saji komɛi ahe lɛ ahe hiaa waa. Saji nɛɛ ekomɛi nɛ:

• Bɔlɛnamɔ kɛ gbalashihilɛ

• Anɔkwayeli, nitsumɔ, kɛ shika

• Bɔ ni esa akɛ atsɔse gbekɛbii ahã

• Bɔ ni esa akɛ wɔkɛ mɛi aye ahã

Te obaafee tɛŋŋ ona akɛ, yiŋ ni okpɛɔ yɛ saji nɛɛ ahe lɛ baahã wɔsɛɛ lɛ, nibii ahi ahã bo kɛ oweku lɛ?

Sane ni esa akɛ wɔteŋ mɔ fɛɛ mɔ ana naa ji: Mɛni baawa mi ni makpɛ yiŋ kpakpai yɛ nɔ ni ja kɛ nɔ ni ejaaa he?

Magazin nɛɛ baahã ona nɔ hewɔ ni obaanyɛ ohe nɔ ni Biblia lɛ wieɔ yɛ nɔ ni ja kɛ nɔ ni ejaaa he lɛ oye, kɛ bɔ ni ebaanyɛ awa bo.