Bɔ Ni Yehowa Miisumɔ Ni Asafo Lɛ Kɛ Mɔ Ko Ni Efee Esha Ni Yɔɔ Hiɛdɔɔ Lɛ Aye Ahã

1. Mɛni Yehowa miisumɔ ni adesai fɛɛ afee?

YEHOWA ehã adesai fɛɛ hegbɛ ni amɛ diɛŋtsɛ amɛkpɛ amɛyiŋ yɛ saji ahe. Daa gbi lɛ, wɔkpɛɔ wɔyiŋ yɛ saji srɔtoi ahe. Shi yiŋ ni he hiaa fe fɛɛ ni mɔ ko baanyɛ akpɛ ji, ni ejɔɔ ehe nɔ ehã Yehowa ni ebafata etsuji ni yɔɔ jeŋ fɛɛ ni efee ekome akɛ weku kɛmiijá lɛ lɛ ahe. Yehowa miisumɔ ni mɔ fɛɛ mɔ akpɛ yiŋ kpakpa nɛɛ. Mɛni hewɔ? Ejaakɛ esumɔɔ wɔ waa ni eesumɔ ni ahi ahã wɔ. Eesumɔ ni wɔbatsɔmɔ enanemɛi, ni agbɛnɛ hu, wɔhi shi kɛya naanɔ.—5 Mo. 30:​19, 20; Gal. 6:​7, 8.

2. Mɛni Yehowa miishwe waa ni mɛi ni efee eshai ni yɔɔ hiɛdɔɔ shi amɛtsakeko amɛtsui lɛ afee? (1 Yohane 2:1)

² Shi Yehowa enyɛɛɛ wɔnɔ ni wɔsɔmɔ lɛ. Ehã wɔteŋ mɔ fɛɛ mɔ hegbɛ ni ekpɛ eyiŋ kɛji ebaasɔmɔ lɛ aloo esɔmɔŋ lɛ. Kɛ́ mɔ ko kpɛ eyiŋ akɛ ebaasɔmɔ Yehowa, shi yɛ ebaptisimɔ sɛɛ lɛ, eyafee esha ko ni yɔɔ hiɛdɔɔ lɛ, te esa akɛ asafoŋ onukpai lɛ atsu he nii amɛhã tɛŋŋ? Kɛ́ mɔ lɛ tsakeee etsui lɛ, esa akɛ ajie lɛ kɛje asafo lɛ mli. (1 Kor. 5:13) Shi kɛ́ eba lɛ nakai po lɛ, nɔ ni Yehowa shweɔ ji, ni mɔ lɛ atsake etsui ni eku esɛɛ kɛba eŋɔɔ. Anɔkwa, yiŋtoi ahewɔ ni ehã e-Bi lɛ bagbo kɛkpɔ̃ adesai lɛ ateŋ ekome ni he hiaa waa ji, koni enyɛ ekɛ mɛi ni efee esha ni amɛtsake amɛtsui lɛ ahe eshai ake amɛ. (Kanemɔ 1 Yohane 2:1.) Yehowa, wɔ-Nyɔŋmɔ lɛ, sumɔɔ wɔ waa, ni no hewɔ lɛ, ewoɔ mɛi fɛɛ ni efee eshai ni yɔɔ hiɛdɔɔ lɛ hewalɛ ni amɛtsake amɛtsui.—Zak. 1:3; Rom. 2:4; Yak. 4:8.

3. Mɛni he wɔbaasusu yɛ nikasemɔ nɛɛ mli?

³ Yehowa ehã wɔle bɔ ni enaa esha kɛ mɛi ni feɔ eshai ni yɔɔ hiɛdɔɔ lɛ ehãa, ni eesumɔ ni wɔ hu wɔna amɛ nakai. Yɛ nikasemɔ nɛɛ mli lɛ, wɔbaakwɛ nɔ ni baaye abua wɔ ni wɔnyɛ wɔfee nakai. No hewɔ lɛ, be ni okaseɔ lɛ, kwɛmɔ akɛ obaana (1) nɔ ni bɔfo Paulo kɛɛ Korinto asafo lɛ akɛ amɛfee be ni nyɛmi nuu ko yafee esha ko ni yɔɔ hiɛdɔɔ lɛ, (2) nɔ ni ekɛɛ amɛ akɛ amɛfee be ni eshafeelɔ lɛ tsake etsui lɛ, kɛ (3) bɔ ni sane nɛɛ ni aŋma yɛ Biblia lɛ mli lɛ tsɔɔ wɔ bɔ ni Yehowa naa mɛi ni efee esha ni yɔɔ hiɛdɔɔ lɛ ehãa.

NƆ NI PAULO KƐƐ KORINTO ASAFO LƐ AKƐ AMƐFEE

4. Mɛɛ nɔ ko ni ehiii kwraa Paulo nu akɛ eeya nɔ yɛ Korinto asafo lɛ mli? (1 Korintobii 5:​1, 2)

⁴ Kanemɔ 1 Korintobii 5:​1, 2. Yɛ Paulo maŋsɛɛ sɔɔmɔ gbɛfãa ni ji etɛ lɛ nɔ lɛ, enu akɛ nɔ ko ni ehiii kwraa miiya nɔ yɛ Korinto asafo ni atse etsɛko lɛ mli. Nyɛmi nuu ko ni yɔɔ nakai asafo lɛ mli lɛ kɛ epapa ŋa náa bɔlɛ. Nɔ ni nyɛmi nuu nɛɛ fee lɛ yɛ nyaŋemɔ waa, ni mɛi ni jáaa Yehowa po le akɛ afeee nakai! Shi nyɛmimɛi lɛ nu he akɛ naagba ko bɛ he akɛ abaahã eya nɔ ehi asafo lɛ mli. Ekolɛ amɛteŋ mɛi komɛi po nu he akɛ ŋmɛ ni amɛŋmɛ nyɛmi nuu lɛ gbɛ ni eya nɔ ehi asafo lɛ mli lɛ tsɔɔ akɛ, amɛnuɔ nii ashishi ni amɛnaa mɔbɔ tamɔ Yehowa nɔŋŋ. Shi Yehowa ekuuu ehiɛ eshwieee eshafeemɔ nɔ. Ŋwanejee ko bɛ he akɛ, nyɛmi nuu lɛ jeŋba gbonyo lɛ hã mɛi pii wie amɛshi asafo lɛ. Ni ekolɛ nyɛmimɛi ni kɛ lɛ bɔɔ lɛ bɔi esu gbonyo lɛ kasemɔ. No hewɔ lɛ, mɛni Paulo kɛɛ asafo lɛ ni amɛfee yɛ sane lɛ he?

5. Mɛni Paulo kɛɛ asafo lɛ akɛ amɛfee? Ni mɛni enɛ tsɔɔ? (1 Korintobii 5:13) (Kwɛmɔ mfoniri lɛ hu.)

⁵ Kanemɔ 1 Korintobii 5:13. Yehowa kɛ emumɔ lɛ tsirɛ Paulo ni eŋma wolo eyahã asafo lɛ ni ekɛɛ amɛ akɛ, amɛjie eshafeelɔ ni tsakeee etsui lɛ kɛje asafo lɛ mli. Kɛ́ ajie lɛ kɛje asafo lɛ mli lɛ, te esa akɛ nyɛmimɛi lɛ kɛ lɛ aye ahã tɛŋŋ? Paulo kɛɛ amɛ akɛ amɛkɛ lɛ “akpa bɔɔ.” Ewie po akɛ, “nyɛkɛ mɔ ni tamɔ nɛkɛ lɛ akayea nii po.” (1 Kor. 5:11) Kɛ́ mɛi tara shi amɛmiiye nii lɛ, amɛgbaa sane ni no hãa amɛbatsɔmɔɔ nanemɛi. No hewɔ lɛ, gbɛtsɔɔmɔ ni Paulo kɛhã asafo lɛ akɛ amɛkɛ nuu lɛ akabɔ lɛ, baabu nyɛmimɛi lɛ ahe koni nuu lɛ subaŋ gbonyo lɛ akatsɛŋe amɛ. (1 Kor. 5:​5-7) Kɛfata he lɛ, kɛ́ amɛkɛ nuu lɛ kpa bɔɔ lɛ, ekolɛ no baahã ena akɛ nɔ ni efee lɛ yɛ hiɛdɔɔ waa, ni ekolɛ ehiɛ baagbo ni no baatsirɛ lɛ ni etsake etsui.

6. Be ni asafo lɛ nine shɛ wolo ni Paulo ŋma amɛ lɛ nɔ lɛ, mɛni amɛfee? Ni mɛni jɛ mli kɛba?

⁶ Be ni Paulo kɛ wolo ni eŋma lɛ maje nyɛmimɛi ni yɔɔ Korinto lɛ, eshwe ni ele kɛji amɛkɛ ŋaa ni ewo amɛ lɛ miitsu nii kɛ nɔ ni ejɛ mli kɛba. Etsɛɛɛ tsɔ ni Tito kɛ amaniɛbɔɔ kpakpa ko bahã lɛ, ni enɛ hã ená miishɛɛ waa. Tito kɛɛ Paulo akɛ, nyɛmimɛi lɛ kɛ egbɛtsɔɔmɔ lɛ miitsu nii. (2 Kor. 7:​6, 7) Amɛjie efɔŋfeelɔ lɛ kɛje asafo lɛ mli, ni enɛ ewo yibii kpakpai. Be ni ekɛ wolo lɛ maje amɛ lɛ sɛɛ etsɛɛɛ lɛ, nuu lɛ tsake etsui! Ekpa esha ni efeɔ lɛ, ni ekɛ Yehowa gbɛtsɔɔmɔi bɔi nitsumɔ. (2 Kor. 7:​8-11) Be ni Paulo nu amaniɛbɔɔ nɛɛ, mɛni ekɛɛ asafo lɛ akɛ amɛfee?

NƆ NI PAULO KƐƐ ASAFO LƐ AFEE BE NI NYƐMI NUU LƐ TSAKE ETSUI

7. Be ni ajie nyɛmi nuu lɛ kɛje asafo lɛ mli lɛ, mɛɛ nɔ kpakpa jɛ mli kɛba? (2 Korintobii 2:​5-8)

⁷ Kanemɔ 2 Korintobii 2:​5-8. Paulo wie yɛ nyɛmi nuu lɛ ni etsake etsui lɛ he akɛ: “Ehiɛ ni mɛi pii ekã lɛ fa hã lɛ.” Nɔ ni enɛ tsɔɔ ji, jiemɔ ni ajie nyɛmi nuu lɛ kɛje asafo lɛ mli lɛ etsirɛ lɛ ni etsake etsui, no hewɔ lɛ tsɔsemɔ ni atsɔse lɛ lɛ fa.—Heb. 12:11.

8. Mɛni Paulo kɛɛ asafo lɛ akɛ amɛfee?

⁸ Paulo kɛɛ asafo lɛ akɛ, ‘amɛjɛ mlihilɛ mli amɛkɛ nyɛmi nuu lɛ ni etɔ̃ lɛ he ake lɛ ni amɛshɛje emii,’ ni ‘amɛma suɔmɔ ni amɛyɔɔ kɛhã lɛ lɛ nɔ mi amɛhã lɛ.’ Nɔ ni enɛ tsɔɔ ji, amɛhe nyɛmi nuu lɛ ni etsake etsui lɛ kɛba asafo lɛ mli, ni agbɛnɛ hu, amɛkɛ amɛwiemɔ kɛ amɛnifeemɔ ahã ena faŋŋ akɛ, amɛkɛ ehe esha lɛ eke lɛ lɛɛlɛŋ, ni amɛsumɔɔ lɛ. Enɛ baahã nyɛmi nuu lɛ ana faŋŋ akɛ, eŋɔɔ amɛnaa akɛ eku esɛɛ kɛba asafo lɛ mli.

9. Mɛni hewɔ eeenyɛ efee akɛ nyɛmimɛi lɛ ekomɛi náaa lɛ mlɛo akɛ amɛkɛ nyɛmi nuu lɛ ni etsake etsui lɛ he baake lɛ lɛ?

⁹ Ani no mli lɛ, ewa kɛhã nyɛmimɛi lɛ ekomɛi akɛ amɛbaahere nyɛmi nuu ni etsake etsui lɛ atuu kɛba asafo lɛ mli? Biblia lɛ etsɔɔɔ, shi eeenyɛ efee akɛ, amɛteŋ mɛi komɛi náaa lɛ mlɛo. Mɛni hewɔ wɔkɛɔ nakai? Eeenyɛ efee akɛ, nyɛmi nuu lɛ subaŋ lɛ hã asafo lɛ ná naagbai pii, ni ekolɛ, esa nyɛmimɛi lɛ ekomɛi ahe tɛ̃ɛ po. Enɛ hewɔ lɛ, ekolɛ, be ni ahe lɛ lɛ sɛɛ fɛɛ lɛ, nyɛmimɛi lɛ ekomɛi amli efu lɛ lolo. Agbɛnɛ hu, ebaanyɛ eba lɛ akɛ, nyɛmimɛi lɛ ekomɛi nu he akɛ, amɛmia amɛhiɛ amɛye Yehowa anɔkwa, no hewɔ lɛ, kɛ́ nyɛmi nuu lɛ eyanyɛɛɛ efee nakai ni ajie lɛ kɛje asafo lɛ mli lɛ, mɛni hewɔ esa akɛ ahe lɛ ekoŋŋ? (Okɛto Luka 15:​28-30 lɛ he.) Shi ehe bahia ni asafo lɛ ahã nyɛmi nuu lɛ ni etsake etsui ni ahe lɛ lɛ ana akɛ amɛsumɔɔ lɛ waa. Mɛni hewɔ?

10-11. Kɛ́ asafoŋ onukpai lɛ heee nyɛmi nuu lɛ ni etsake etsui lɛ kɛbaaa asafo lɛ mli lɛ, mɛni baanyɛ ajɛ mli kɛba?

¹⁰ Kɛ́ asafoŋ onukpai lɛ heee nyɛmi nuu lɛ ni etsake etsui lɛ kɛbaaa asafo lɛ mli ekoŋŋ, loo amɛhe lɛ shi nyɛmimɛi lɛ hereee lɛ hiɛmɛɛ lɛ, mɛni baanyɛ ajɛ mli kɛba? Ekolɛ “awerɛhoyeli babaoo” baaye enɔ kwraa, ni ebaanu he akɛ egbe ejeŋ naa. Ekolɛ enijiaŋ baaje wui ni ebaanu he akɛ sɛɛnamɔ po bɛ he akɛ ebaaya nɔ emia ehiɛ ni esaa ekɛ Yehowa teŋ.

¹¹ Nɔ ni fe fɛɛ lɛ, kɛ́ nyɛmimɛi lɛ hereee nyɛmi nuu lɛ ni etsake etsui lɛ hiɛmɛɛ lɛ, no baanyɛ afite wekukpaa ni yɔɔ amɛ kɛ Yehowa teŋ lɛ. Mɛni hewɔ? Ejaakɛ no baatsɔɔ akɛ amɛkaseee Yehowa, mɔ ni kɛ eshai keɔ lɛ, shi moŋ, amɛmiikase Satan, mɔ ni yitsoŋ wa ni enaaa mɔbɔ lɛ. Ni kɛ́ amɛkwɛɛɛ ni ahi lɛ, Abonsam baatsɔ amɛnɔ ehã nyɛmi nuu lɛ akpa Yehowa sɔɔmɔ kwraa.—2 Kor. 2:​10, 11; Efe. 4:27.

12. Mɛni ehe bahia ni asafo lɛ afee kɛtsɔɔ akɛ amɛmiikase Yehowa?

¹² No hewɔ lɛ, mɛni ehe bahia ni Korinto asafo lɛ afee koni amɛkase Yehowa, shi jeee Satan? Ehe bahia ni amɛkɛ mɔ ni efee esha shi etsake etsui lɛ he ake lɛ, tamɔ bɔ ni Yehowa feɔ lɛ. Naa nɔ ni mɛi komɛi ni ŋma Biblia lɛ wie yɛ Yehowa he. David wie akɛ, ‘Yehowa hi ni esumɔɔ waa akɛ ekɛ esha ake.’ (Lala 86:5) Mika wie akɛ, ‘Namɔ ji Nyɔŋmɔ tamɔ bo, ní kɛ tɔmɔ keɔ, ní kuɔ ehiɛ efɔ̃ɔ mlatɔmɔ nɔ?’ (Mika 7:18) Ni Yesaia hu wie akɛ: “Mɔ fɔŋ atsi ehe kɛje egbɛ lɛ nɔ, ni nɔshafeelɔ hu atsi ehe kɛje ejwɛŋmɔi lɛ ahe; eku esɛɛ kɛba Yehowa, mɔ ni baana lɛ mɔbɔ lɛ ŋɔɔ, eba wɔ-Nyɔŋmɔ lɛ ŋɔɔ, ejaakɛ ekɛ ehe baake lɛ kwraa.”—Yes. 55:7.

13. Mɛni hewɔ ehe ehiaaa ni asafoŋ onukpai lɛ shashaoɔ shi kwraa akɛ amɛbaahe nuu lɛ kɛba asafo lɛ mli ekoŋŋ? (Kwɛmɔ akrabatsa ni ji, “Mɛɛ Be Ahe Nuu Lɛ Ni Yɔɔ Korinto Lɛ Kɛba Asafo Lɛ Mli Ekoŋŋ?”)

¹³ Kɛ́ nyɛmimɛi ni yɔɔ Korinto asafo lɛ mli lɛ kɛ nyɛmi nuu lɛ ni etsake etsui lɛ he ke lɛ, ni amɛhã ena akɛ amɛsumɔɔ esane waa ni eŋɔɔ amɛnaa akɛ eku esɛɛ lɛ, no baatsɔɔ akɛ amɛmiikase Yehowa. Agbɛnɛ hu, akɛni Paulo ni kɛ gbɛtsɔɔmɔ hã amɛ akɛ amɛkɛ nuu lɛ he ake lɛ hewɔ lɛ, kɛ́ amɛhe lɛ kɛba asafo lɛ mli ekoŋŋ lɛ, no baatsɔɔ akɛ amɛboɔ gbɛtsɔɔmɔ toi. (2 Kor. 2:9) Eyɛ mli akɛ kɛjɛ be ni ajie nyɛmi nuu lɛ kɛje asafo lɛ mli lɛ, eshɛko afi moŋ nɛ, shi tsɔsemɔ lɛ etsu nii; eye ebua lɛ ni etsake etsui. No hewɔ lɛ, ehe ehiaaa ni asafoŋ onukpai lɛ shashaoɔ shi kwraa akɛ amɛbaahe lɛ kɛba asafo lɛ mli ekoŋŋ.

BƆ NI WƆBAAFEE WƆYE JALƐSANE NI WƆNA MƆBƆ TAMƆ YEHOWA

14-15. Mɛni wɔkaseɔ yɛ bɔ ni atsu sane ni ba yɛ Korinto asafo lɛ mli lɛ he nii ahã lɛ mli? (2 Petro 3:9) (Kwɛmɔ mfoniri lɛ hu.)

¹⁴ Yehowa hã aŋma bɔ ni atsu sane ni ba yɛ Korinto asafo lɛ mli lɛ he nii ahã lɛ afɔ̃ shi ‘koni wɔkase nii yɛ mli.’ (Rom. 15:4) Bɔ ni atsu sane nɛɛ he nii ahã lɛ hãa wɔnaa akɛ, kɛ́ mɔ ko fee esha ni yɔɔ hiɛdɔɔ shi etsakeee etsui lɛ, Yehowa hãa ajieɔ lɛ kɛjeɔ Kristofoi asafo lɛ mli. Mɛi komɛi susuɔ akɛ, akɛni Yehowa naa mɔbɔ hewɔ lɛ, kɛ́ mɔ ko fee esha ni yɔɔ hiɛdɔɔ shi etsakeee etsui po lɛ, ebaaŋmɛ lɛ gbɛ ni eya nɔ ehi Kristofoi asafo lɛ mli. Shi Yehowa efeee nakai. Yehowa naa mɔbɔ, shi eesumɔ ni etsuji fɛɛ ahi shi yɛ emlai kɛ eshishitoo mlai lɛ anaa. No hewɔ lɛ, kɛ́ mɔ ko fee esha shi etsakeee etsui lɛ, ekuuu ehiɛ efɔ̃ɔɔ nɔ. (Yuda 4) Kɛ́ Yehowa ŋmɛ gbɛ ni eshafeelɔi ni tsakeee amɛtsui lɛ tee nɔ amɛhi asafo lɛ mli lɛ, ebaaye asafo muu lɛ fɛɛ awui, ni no baatsɔɔ akɛ enaaa mɔbɔ.—Abɛi 13:20; 1 Kor. 15:33.

¹⁵ Shi fɛɛ sɛɛ lɛ, Yehowa sumɔɔɔ ni akpãtãa mɔ ko mɔ ko hiɛ. Eesumɔ ni kɛ́ ebaahi lɛ, ahere mɔ fɛɛ mɔ yiwala. No hewɔ lɛ, kɛ́ mɔ ko ni efee esha lɛ tsake etsui ni efee nibii ni baahã ebatsɔ Yehowa naanyo ekoŋŋ lɛ, Yehowa naa lɛ mɔbɔ. (Eze. 33:11; kanemɔ 2 Petro 3:9.) Enɛ hewɔ be ni nuu lɛ ni yɔɔ Korinto lɛ tsake etsui ni ekpa nibii gbohii ni efeɔ lɛ, Yehowa tsɔ Paulo nɔ ehã asafo lɛ le akɛ, amɛkɛ nuu lɛ he esha lɛ ake lɛ ni amɛhere lɛ kɛba asafo lɛ mli ekoŋŋ lɛ.

16. Mɛni okaseɔ yɛ Yehowa he yɛ bɔ ni atsu sane ni ba yɛ Korinto asafo lɛ mli lɛ he nii ahã lɛ mli? Ni te no hãa onuɔ he ohãa tɛŋŋ?

¹⁶ Bɔ ni atsu sane ni ba yɛ Korinto asafo lɛ mli lɛ he nii ahã lɛ hãa wɔnaa akɛ, Yehowa yɛ suɔmɔ, efeɔ nɔ ni ja, ni eyeɔ jalɛsane. (Lala 33:5) Ani enɛ tsirɛɛɛ bo ni ojie Yehowa, wɔ-Nyɔŋmɔ lɛ, yi waa fe bɔ ni ofeɔ bianɛ lɛ po? Wɔ fɛɛ lɛ, eshafeelɔi ji wɔ, ni kɛ́ Yehowa kɛ wɔhe eshai ekeee wɔ lɛ, wɔnii baafee mɔbɔ waa. No hewɔ lɛ, eŋɔɔ wɔnaa waa akɛ ehã e-Bi lɛ kɛ ewala bafɔ̃ shi ehã wɔ akɛ kpɔmɔnɔ, koni enyɛ ekɛ wɔhe eshai ake wɔ. Yehowa sumɔɔ wɔ, ni ji ewebii lɛ, asane waa ni eesumɔ ni ahi ahã wɔ. Enɛ ni wɔle lɛ hãa wɔtsui nyɔɔ wɔmli waa!

17. Mɛɛ sanebimɔi abaahã hetoo yɛ nikasemɔi ni nyiɛ sɛɛ lɛ amli?

¹⁷ Ni ŋmɛnɛ hu? Kɛ́ mɔ ko yafee esha ni yɔɔ hiɛdɔɔ lɛ, te esa akɛ atsu he nii ahã tɛŋŋ? Mɛni asafoŋ onukpai lɛ baanyɛ afee kɛtsɔɔ akɛ amɛmiikase Yehowa ni amɛmiisumɔ ni amɛye amɛbua mɔ ni efee esha lɛ ni etsake etsui? Kɛ́ asafoŋ onukpai lɛ kpɛ amɛyiŋ akɛ esa akɛ ajie mɔ ko kɛje asafo lɛ mli loo ahe mɔ ko kɛba asafo lɛ mli lɛ, te esa akɛ asafoŋbii lɛ afee amɛnii amɛhã tɛŋŋ? Abaahã sanebimɔi nɛɛ ahetoo yɛ nikasemɔi ni nyiɛ sɛɛ lɛ amli.