Bɔɔ Mɔdɛŋ Ni Okase Nɔ Ko Hee Be Fɛɛ Be Ni Obaakase Nii

Kɛ́ wɔyaakase nii lɛ, ehi akɛ wɔbaabi wɔhe akɛ, ‘Mɛni nɔ ni miyakase lɛ baahã male?’ Shi esa akɛ wɔhã ehi wɔjwɛŋmɔ mli akɛ, yɛ nibii ni wɔkpaa gbɛ akɛ wɔbaakase lɛ asɛɛ lɛ, ekolɛ nibii krokomɛi yɛ nɔ ni wɔyaakase lɛ mli ni Yehowa baasumɔ ni wɔle. No hewɔ lɛ, mɛni baaye abua wɔ ni wɔkase nɔ ko hee be fɛɛ be ni wɔbaakase nii?

Sɔlemɔ obi Yehowa ni edro bo hiɛshikamɔ. Bi lɛ ni eye ebua bo ni ona nɔ ni etaoɔ okase yɛ nakai sane lɛ mli yɛ nakai shitamɔ lɛ mli. (Yak. 1:5) Okɛ ojwɛŋmɔ akaya nibii ni ole momo lɛ pɛ anɔ.—Abɛi 3:​5, 6.

Hã Nyɔŋmɔ Wiemɔ lɛ atsu nii yɛ oshihilɛ mli. “Nyɔŋmɔ wiemɔ lɛ hiɛ kã.” (Heb. 4:12) No hewɔ lɛ, be fɛɛ be ni obaakase Biblia lɛ, obaanyɛ ona nɔ ko hee yɛ mli ni baaye abua bo yɛ oshihilɛ mli. Shi ja okɛma ohiɛ akɛ ootao Yehowa atsɔɔ bo nɔ ko hee yɛ nɔ ni okaneɔ lɛ mli dani obaana.

Ohiɛ asɔ nibii fɛɛ ni Yehowa kɛlɛɔ wɔ lɛ. Yehowa eŋmɛ wɔ mfonirifeemɔŋ “okpɔlɔ kɛ enɔ niyenii kpakpai” srɔtoisrɔtoi. (Yes. 25:6) Kɛ́ niyenii lɛ, ni ji nibii ni Yehowa tsɔɔ wɔ lɛ, eko yɛ po ni osusuɔ akɛ eŋɔŋ lɛ, miamɔ ohiɛ ni oye. Obaaná he sɛɛ, ni obaana hu akɛ, asomoaŋ, eŋɔɔ!