Sanebimɔi Ni Jɛ Kanelɔi Adɛŋ

Te Solomon sɔlemɔ shĩa lɛ ablanaa lɛ kwɔlɛ lɛ?

Sɔlemɔ shĩa lɛ ablanaa lɛ nɔ atsɔɔ kɛyaa He Krɔŋkrɔŋ lɛ. Yɛ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ srɔtoi fɛɛ ni akala dani afi 2023 lɛ amli lɛ, awie akɛ “ablanaa lɛ ni yɔɔ tsũ lɛ hiɛ lɛ lɛɛmɔ ji ninetalɔi 20, tamɔ shĩa lɛ lɛɛmɔ lɛ nɔŋŋ, ni ekwɔlɛ ji 120.” (2 Kro. 3:4) Biblia shishitsɔɔmɔi krokomɛi hu kɛɛ ablanaa lɛ kwɔlɛ ji “ninetalɔi 120,” loo nanetalɔi 175 sɔŋŋ!

Shi yɛ Jeŋ Hee Shishitsɔɔmɔ ni akala yɛ afi 2023 lɛ mli lɛ, awie yɛ Solomon sɔlemɔ shĩa lɛ ablanaa lɛ he akɛ: “Ekwɔlɛ ji ninetalɔi 20,” loo nanetalɔi 30.a Naa yiŋtoi fioo komɛi ahewɔ ni afee tsakemɔ nɛɛ.

Atsĩii ablanaa lɛ kwɔlɛ tã yɛ 1 Maŋtsɛmɛi 6:3 lɛ mli. Yɛ nakai ŋmalɛ lɛ mli lɛ, Yeremia, ni ji mɔ ni ŋma lɛ, wie ablanaa lɛ kɛlɛ kɛ elɛɛmɔ he, shi ewieee ekwɔlɛ he. Kɛkɛ ni yɛ yitso 7 lɛ mli lɛ, ewie sɔlemɔ shĩa lɛ mli nibii komɛi ni sa kadimɔ waa lɛ ahe fitsofitso. Nibii nɛɛ ekomɛi ji, dade taŋki ni atsɛɔ lɛ Ŋshɔ lɛ, nu shwiilii nyɔŋma lɛ, kɛ akɔɔble akulashiŋi enyɔ ni mamɔ ablanaa lɛ hiɛ lɛ. (1 Maŋ. 7:​15-37) Kɛ́ lɛɛlɛŋ, ablanaa lɛ kwɔlɛ ji nanetalɔi 175 lɛ, belɛ ekwɔ kwraa fe sɔlemɔ shĩa lɛ diɛŋtsɛ. No hewɔ lɛ, mɛni hewɔ Yeremia etsĩii ekwɔlɛ lɛ tã lɛ? Afii pii asɛɛ lɛ, Yudafoi yinɔsaneŋmalɔi komɛi hu wie akɛ, ablanaa lɛ kwɔɔɔ fe sɔlemɔ shĩa lɛ diɛŋtsɛ.

Mɛi ni ekase tsũi ni amamɔ yɛ blema lɛ ahe nii fitsofitso lɛ kɛɛ, kɛ́ amɛkwɛ bɔ ni ama sɔlemɔ shĩa lɛ ahã lɛ, efeee amɛ akɛ abaanyɛ ama ablanaa ni kwɔlɛ shɛɔ ninetalɔi 120 yɛ he. Kɛ́ okwɛ tsũi ni akɛ tɛi kɛ brikii mamɔ yɛ blema ni kwɔ waa, tamɔ sɔlemɔ shĩai ni yɔɔ Ejipt lɛ ageetii lɛ nɛkɛ lɛ, obaana akɛ amɛshishi lɛɛ waa ni amɛŋwɛi yɛ bibioo. Shi Solomon sɔlemɔ shĩa lɛ bɛ nakai. Nilelɔi kɛɛ sɔlemɔ shĩa lɛ gbogboi lɛ atilɛ shɛɛɛ ninetalɔi ekpaa loo nanetalɔi nɛɛhu. Nuu ko ni ekase tsumaa he yinɔsane jogbaŋŋ, ni atsɛɔ lɛ Theodor Busink lɛ, wie akɛ: “Kɛ́ okwɛ sɔlemɔ shĩa lɛ shinaa lɛ naa gbogboi lɛ atilɛ lɛ, mikpaaa shi akɛ ablanaa lɛ kwɔlɛ baanyɛ afee ninetalɔi 120.”

Eeenyɛ efee akɛ, mɔ ni kwɛ blema wolokpoi ni akɛ niji ŋmala lɛ anɔ eŋma 2 Kronika 3:4 lɛ eyaŋmaaa lɛ jogbaŋŋ. Eyɛ mli akɛ blema wolokpoi komɛi kɛ “120” tsu nii yɛ kuku nɛɛ mli moŋ, shi blema wolokpoi krokomɛi ni amuɔ afɔ̃ɔ amɛnɔ waa, tamɔ Kodɛs Alexandrinus, ni aŋma nɔ ni fe afii 1,500 ni eho nɛ, kɛ Kodɛs Ambrosianus, ni aŋma nɔ ni fe afii 1,400 ni eho nɛ lɛ, kɛ “ninetalɔi 20” tsu nii. No hewɔ lɛ, mɛni hewɔ ekolɛ mɔ ni kwɛ blema wolokpoi ni akɛ niji ŋmala lɛ anɔ eŋma 2 Kronika 3:4 lɛ ŋma “120” lɛ? Hebri wiemɔ ni atsɔɔ shishi akɛ “oha” kɛ Hebri wiemɔ ni atsɔɔ shishi akɛ “ninetalɔi” lɛ je amɛhe waa. No hewɔ lɛ, eeenyɛ efee akɛ, mɔ lɛ yaaŋma “ninetalɔi” ni eyaŋma “oha.”

Eyɛ mli akɛ wɔmiaa wɔhiɛ waa koni wɔnu nibii ni awie yɛ Solomon sɔlemɔ shĩa lɛ he lɛ ashishi jogbaŋŋ ni wɔnyɛ wɔtɛŋ lɛ jogbaŋŋ moŋ, shi nɔ titri ni wɔkɛ wɔjwɛŋmɔ maa nɔ ji, nɔ ni sɔlemɔ shĩa lɛ feɔ he mfoniri lɛ, ni ji mfonirifeemɔŋ sɔlemɔ shĩa kpeteŋkpele lɛ. Eŋɔɔ wɔnaa waa akɛ, Yehowa efɔ̃ etsuji fɛɛ nine ni amɛbajá lɛ yɛ sɔlemɔ shĩa nɛɛ mli!—Heb. 9:​11-14; Kpo. 3:12; 7:​9-17.