Sanebimɔi Ni Jɛ Kanelɔi Adɛŋ

Namɛi ji “ŋwɛibɔfoi ni ahala lɛ” ni atsĩ amɛtã yɛ 1 Timoteo 5:21 lɛ?

Bɔfo Paulo kɛɛ Timoteo, ni lɛ hu eji asafoŋ onukpa lɛ, akɛ: “Mikɛ hiɛdɔɔ miifã bo yɛ Nyɔŋmɔ kɛ Kristo Yesu kɛ ŋwɛibɔfoi ni ahala lɛ ahiɛ akɛ okɛ gbɛtsɔɔmɔi nɛɛ atsu nii, ni okaye ohe oyai okojo, ni okafee nɔ ko kɛ hiɛiaŋkwɛmɔ.”—1 Tim. 5:21.

Klɛŋklɛŋ lɛ, nyɛhãa wɔkwɛa akɛ, namɛi wɔnyɛŋ wɔwie akɛ ŋwɛibɔfoi nɛɛ ji. Wɔnyɛŋ wɔwie akɛ amɛji mɛi 144,000 lɛ. Mɛni hewɔ? Ejaakɛ be ni Paulo ŋma Timoteo wolo lɛ, ateko mɛi ni afɔ amɛ mu lɛ ateŋ mɔ ko mɔ ko shi kɛyako ŋwɛi. Nakai beiaŋ lɛ, ahãko Yesu bɔfoi lɛ kɛ Kristofoi krokomɛi ni afɔ amɛ mu lɛ mumɔŋ gbɔmɔtsei. No hewɔ lɛ, ekã shi faŋŋ akɛ, wɔnyɛŋ wɔwie akɛ amɛji “ŋwɛibɔfoi ni ahala lɛ.”—1 Kor. 15:​50-54; 1 Tes. 4:​13-17; 1 Yoh. 3:2.

Agbɛnɛ hu, wɔnyɛŋ wɔwie akɛ “ŋwɛibɔfoi ni ahala lɛ” ji ŋwɛibɔfoi ni gbo Nyɔŋmɔ nɔ toi yɛ Noa beiaŋ lɛ. Ŋwɛibɔfoi fɔji nɛɛ yafata Satan he ni amɛbatsɔmɔ daimonioi, ni wɔle akɛ amɛji Yesu henyɛlɔi. (1 Mo. 6:2; Luka 8:​30, 31; 2 Pet. 2:4) Wɔsɛɛ lɛ, akɛ amɛ baawo bu kwɔŋkwɔŋ lɛ mli afii 1,000, ni no sɛɛ lɛ, abaakpãtã amɛ kɛ Abonsam fɛɛ hiɛ.—Yuda 6; Kpo. 20:​1-3, 10.

Ŋwanejee ko bɛ he akɛ, “ŋwɛibɔfoi ni ahala lɛ” ji ŋwɛibɔfoi ni fiɔ “Nyɔŋmɔ kɛ Kristo Yesu” sɛɛ.

Ayɛ ŋwɛibɔfoi anɔkwafoi akpekpe toi akpei abɔ. (Heb. 12:​22, 23) Amɛteŋ mɔ fɛɛ mɔ kɛ nitsumɔ ni Yehowa kɛwo edɛŋ. (Kpo. 14:​17, 18) Akɛ nɔkwɛmɔnɔ lɛ, Yehowa hã ŋwɛibɔfo kome yagbe Asiria asraafoi 185,000. (2 Maŋ. 19:35) Agbɛnɛ hu, eeenyɛ efee akɛ, Yehowa kɛ nitsumɔ ewo ŋwɛibɔfoi komɛi adɛŋ akɛ, “amɛbua nanetɔ̃tɔmɔnii fɛɛ kɛ mɛi ni tsuɔ nitsumɔi ni mla eŋmɛɛɛ gbɛ lɛ anaa kɛje [Yesu Maŋtsɛyeli] lɛ mli.” (Mat. 13:​39-41) Ekolɛ ŋwɛibɔfoi lɛ ateŋ mɛi komɛi hu ‘baabua ehalamɔbii lɛ anaa’ kɛya ŋwɛi. (Mat. 24:31) Yehowa efã ŋwɛibɔfoi komɛi hu akɛ ‘amɛbu wɔhe yɛ wɔgbɛi fɛɛ anɔ.’—Lala 91:11; Mat. 18:10; okɛto Mateo 4:11; Luka 22:43 lɛ he.

Eeenyɛ efee akɛ, “ŋwɛibɔfoi ni ahala lɛ” ni atsĩ amɛtã yɛ 1 Timoteo 5:21 lɛ, ji ŋwɛibɔfoi ni Yehowa kɛ nitsumɔ ewo amɛdɛŋ akɛ amɛye amɛbua asafo lɛ. Yɛ kukuji ni tsɔ hiɛ lɛ amli lɛ, Paulo wo asafoŋ onukpai lɛ ŋaa yɛ bɔ ni amɛtsu nitsumɔi ni akɛwo amɛdɛŋ lɛ ahe nii amɛhã lɛ he, ni ewo asafoŋbii lɛ hu hewalɛ ni amɛbu asafoŋ onukpai lɛ. Ewo asafoŋ onukpai lɛ ŋaa akɛ, ‘amɛkaye amɛhe oyai kɛkojo, ni amɛkafee nɔ ko kɛ hiɛiaŋkwɛmɔ.’ Agbɛnɛ hu, ewo amɛ ŋaa akɛ kɛ́ amɛyaakpɛ yiŋ yɛ sane ko he lɛ, amɛsusu nii ahe jogbaŋŋ dã. No sɛɛ lɛ, Paulo tsɔɔ amɛ nɔ kome hewɔ ni ehe hiaa waa ni amɛbo ŋaa ni ewo amɛ lɛ toi. No ji akɛ, “Nyɔŋmɔ kɛ Kristo Yesu kɛ ŋwɛibɔfoi ni ahala lɛ” miikwɛ bɔ ni amɛtsuɔ nitsumɔ ni akɛwo amɛdɛŋ akɛ nɔkwɛlɔi lɛ amɛhãa lɛ jogbaŋŋ. Enɛ hãa wɔnaa faŋŋ akɛ, Yehowa kɛ nitsumɔ ewo ŋwɛibɔfoi lɛ ekomɛi adɛŋ akɛ amɛye amɛbua asafo lɛ. Nibii ni amɛfeɔ lɛ ekomɛi ji, amɛbuɔ wɔhe, amɛyeɔ amɛbuaa wɔ yɛ shiɛmɔ nitsumɔ lɛ mli, ni amɛhãa Yehowa leɔ bɔ ni nitsumɔ ni ekɛwo amɛdɛŋ lɛ yaa lɛ ehãa.—Mat. 18:10; Kpo. 14:6.