NIKASEMƆ 26
LALA 123 Ba Ohe Shi Ohã Teokrase Gbɛtsɔɔmɔ
Ba Ohe Shi Ni Okpɛlɛ Nɔ Akɛ Jeee Nɔ Fɛɛ Nɔ Ole
“Ofe lɛ, wɔnyɛŋ wɔnu lɛ shishi kɔkɔɔkɔ.”—HIOB 37:23.
NƆ NI WƆBAAKASE
Wɔbaana bɔ ni wɔbaafee wɔjɛ heshibaa mli wɔkpɛlɛ nɔ akɛ jeee nɔ fɛɛ nɔ wɔle, wɔkɛ wɔjwɛŋmɔ ama nɔ ni wɔle lɛ nɔ, ni wɔkɛ wɔhiɛ afɔ̃ Yehowa nɔ.
1. Bɔ ni Yehowa bɔ wɔ ehã lɛ hewɔ lɛ, mɛni wɔnyɛɔ wɔfeɔ? Ni mɛni hewɔ ebɔ wɔ nakai?
BƆ NI Yehowa bɔ wɔ ehã lɛ hewɔ lɛ, wɔnyɛɔ wɔjwɛŋɔ, wɔkaseɔ nibii hei, ni wɔnaa bɔ ni wɔkɛ nibii nɛɛ baatsu nii. Mɛni hewɔ Yehowa bɔ wɔ nakai? Nɔ hewɔ lɛ ji akɛ, eesumɔ ni wɔle lɛ jogbaŋŋ, ni wɔdamɔ nibii ni wɔle yɛ ehe lɛ anɔ wɔsɔmɔ lɛ ni wɔkpɛ yiŋ kpakpai.—Abɛi 2:1-5; Rom. 12:1.
2. (a) Mɛni esa akɛ wɔyɔse yɛ wɔ diɛŋtsɛ wɔhe? (Hiob 37:23, 24) (Kwɛmɔ mfoniri lɛ hu.) (b) Kɛ́ wɔyɔse enɛ lɛ, mɛɛ gbɛ nɔ wɔnáa he sɛɛ?
2 Eyɛ mli akɛ bɔ ni Yehowa bɔ wɔ ehã lɛ hewɔ lɛ, wɔbaanyɛ wɔkase nibii pii moŋ, shi nibii pii hu yɛ ni wɔleee. (Kanemɔ Hiob 37:23, 24.) Hiob sane lɛ maa enɛ nɔ mi. Yehowa bi lɛ saji komɛi, ni no hã ena akɛ nibii pii yɛ ni eleee. Enɛ ye ebua Hiob ni eba ehe shi ni etsake bɔ ni esusuɔ nii ahe ehãa lɛ. (Hiob 42:3-6) Wɔ hu esa akɛ wɔyɔse akɛ jeee nɔ fɛɛ nɔ wɔle. Enɛ baaye abua wɔ ni wɔba wɔhe shi ni wɔhe wɔye akɛ, be fɛɛ be lɛ, Yehowa baatsɔɔ wɔ nɔ ni esa akɛ wɔle koni wɔnyɛ wɔkpɛ yiŋ kpakpai.—Abɛi 2:6.
Kɛ́ wɔyɔse akɛ jeee nɔ fɛɛ nɔ wɔle lɛ, ebaaye ebua wɔ tamɔ eye ebua Hiob lɛ (Kwɛmɔ kuku 2)
3. Mɛni he wɔbaasusu yɛ nikasemɔ nɛɛ mli?
3 Yɛ nikasemɔ nɛɛ mli lɛ, wɔbaasusu nibii komɛi ni wɔleee kɛ naagbai ni bei komɛi lɛ enɛ baanyɛ ahã wɔkɛkpe lɛ ahe. Agbɛnɛ hu, wɔbaana nɔ hewɔ ni ehi akɛ wɔleee nibii komɛi lɛ. Saji nɛɛ ni wɔbaasusu he lɛ baaye abua wɔ ni wɔhe wɔye waa akɛ, Yehowa, “mɔ ni le nii jogbaŋŋ kɛmɔ shi lɛ,” kɛɔ wɔ nibii ni esa akɛ wɔle.—Hiob 37:16.
WƆLEEE BE NI NAAGBEE LƐ BAABA
4. Yɛ nɔ ni aŋma yɛ Mateo 24:36 lɛ naa lɛ, mɛni ji nɔ kome ni wɔleee?
4 Kanemɔ Mateo 24:36. Wɔleee be ni je nɛɛ naagbee lɛ baaba. Be ni Yesu yɔɔ shikpɔŋ lɛ nɔ lɛ, no mli lɛ, lɛ po eleee “nakai gbi lɛ kɛ nakai ŋmɛlɛtswaa lɛ.”a Sɛɛ mli lɛ, Yesu kɛɛ ebɔfoi lɛ akɛ, nibii komɛi yɛ ni Yehowa pɛ ji mɔ ni yɔɔ hegbɛ akɛ etoɔ be ni amɛbaaya nɔ. (Bɔf. 1:6, 7) Yehowa eto be ni je nɛɛ baaba naagbee, shi wɔnyɛŋ wɔle nakai be lɛ tuuntu.
5. Mɛɛ naagbai wɔbaanyɛ wɔkɛkpe akɛni wɔleee be tuuntu ni naagbee lɛ baaba lɛ hewɔ?
5 Yɛ nɔ ni Yesu wie lɛ naa lɛ, wɔleee bei abɔ ni esa akɛ wɔmɛ kɛyashi naagbee lɛ baaba. Enɛ baanyɛ ahã wɔnijiaŋ aje wui loo ewa kɛhã wɔ akɛ wɔbaato wɔtsui shi, titri lɛ, kɛ́ wɔkɛ be kplaŋŋ emɛ Yehowa gbi lɛ. Loo ebaanyɛ ehã ewa kɛhã wɔ akɛ wɔbaafi shi kɛ́ wɔwekumɛi kɛ mɛi krokomɛi ye wɔhe fɛo. (2 Pet. 3:3, 4) Enɛ hewɔ lɛ, ekolɛ wɔbaanu he akɛ eji wɔle be tuuntu ni naagbee lɛ baaba kulɛ, ewaŋ kɛhãŋ wɔ akɛ wɔbaato wɔtsui shi, ni agbɛnɛ hu, ewaŋ kɛhãŋ wɔ akɛ wɔbaafi shi kɛ́ mɛi ye wɔhe fɛo.
6. Mɛni hewɔ ehi waa akɛ wɔleee be tuuntu ni naagbee lɛ baaba lɛ?
6 Yɛ anɔkwale mli lɛ, kɛɛmɔ ni Yehowa ekɛɛɛ wɔ be tuuntu ni naagbee lɛ baaba lɛ hãa wɔnáa hegbɛ ni wɔkɛtsɔɔ akɛ, nɔ hewɔ ni wɔsɔmɔɔ lɛ ji, wɔsumɔɔ lɛ ni wɔkɛ wɔhiɛ fɔ̃ɔ enɔ. Wɔmiisumɔ ni wɔsɔmɔ Yehowa kɛya naanɔ, shi jeee kɛyashi naagbee lɛ baaba pɛ. No hewɔ lɛ, nɔ najiaŋ ni wɔkɛ wɔjwɛŋmɔ baama be ni “Yehowa gbi lɛ” baaba lɛ nɔ lɛ, ehi waa akɛ wɔkɛ wɔjwɛŋmɔ baama nibii kpakpai ni baaya nɔ yɛ nakai gbi lɛ sɛɛ lɛ moŋ anɔ. Kɛ́ wɔfee nakai lɛ, no baahã wɔya nɔ wɔkɛ wɔnyɛmɔ fɛɛ asɔmɔ Yehowa ni wɔfee nibii ni baahã ená wɔhe miishɛɛ.—2 Pet. 3:11, 12.
7. Mɛni wɔle?
7 Nɔ najiaŋ ni wɔkɛ wɔjwɛŋmɔ baama nibii ni wɔleee lɛ anɔ lɛ, ehi waa akɛ wɔkɛ wɔjwɛŋmɔ baama nibii ni wɔle lɛ moŋ anɔ. Akɛ nɔkwɛmɔnɔ lɛ, wɔle akɛ naagbee lɛ je shishi 1914. Gbalɛi ni Yehowa hã agba yɛ Biblia lɛ mli lɛ hãa wɔnaa akɛ, nakai afi lɛ mli naagbee gbii lɛ je shishi. Agbɛnɛ hu, amɛhãa wɔnaa nibii ni baaya nɔ kɛjɛ nakai afi lɛ nɔ kɛyaa, ni wɔmiina nibii nɛɛ ŋmɛnɛ. Enɛ hãa wɔnaa faŋŋ akɛ, “Yehowa gbi wulu lɛ ebɛŋkɛ.” (Zef. 1:14) Kɛfata he lɛ, wɔle nitsumɔ ni Yehowa kɛwo wɔdɛŋ, no ji, ni wɔgba mɛi babaoo “Maŋtsɛyeli lɛ he sane kpakpa” lɛ. (Mat. 24:14) Aashiɛ sane kpakpa nɛɛ yɛ maji aaafee 240 anɔ yɛ wiemɔi ni fa fe 1,000 amli. Ehe ehiaaa ni wɔle ‘gbi lɛ kɛ ŋmɛlɛtswaa lɛ’ dani wɔkɛ ekãa ashiɛ.
WƆLEEE NƆ TUUNTU NI YEHOWA BAAFEE
8. Mɛni he ‘anɔkwa Nyɔŋmɔ lɛ nitsumɔ’ lɛ kɔɔ? (Jajelɔ 11:5)
8 Biblia lɛ kɛɛ, wɔleee ‘anɔkwa Nyɔŋmɔ lɛ nitsumɔ.’ (Kanemɔ Jajelɔ 11:5.) Wiemɔ nɛɛ kɔɔ nɔ ni Yehowa hãa ebaa loo nɔ ni eŋmɛɔ gbɛ ni eba koni no ahã eyiŋtoo aba mli lɛ he. Wɔleee nɔ tuuntu hewɔ ni Yehowa ŋmɛɔ gbɛ ni nɔ ko aba loo gbɛ tuuntu ni ebaatsɔ nɔ eye ebua wɔ yɛ shihilɛ pɔtɛɛ ko mli. (Lala 37:5) Biblia lɛ kɛ enɛ toɔ bɔ ni feɔ ni abifao daa yɛ enyɛ musu mli lɛ he. Bɔ ni jeŋ shikpalɔi po nyɛko amɛnu bɔ ni feɔ ni abifao ko daa yɛ enyɛ musu mli lɛ shishi jogbaŋŋ kɛmɔ shi lɛ, nakai nɔŋŋ wɔnyɛŋ wɔle nɔ tuuntu ni Yehowa baafee yɛ shihilɛ pɔtɛɛ ko mli.
9. Akɛni wɔleee nɔ tuuntu ni Yehowa baafee kɛye ebua wɔ hewɔ lɛ, te ekolɛ wɔbaafee wɔnii wɔhã tɛŋŋ?
9 Akɛni wɔleee nɔ tuuntu ni Yehowa baafee kɛye ebua wɔ hewɔ lɛ, bei komɛi lɛ ewaa kɛhãa wɔ akɛ wɔbaakpɛ wɔyiŋ yɛ nibii komɛi ahe. Akɛ nɔkwɛmɔnɔ lɛ, ekolɛ wɔbaashashao shi akɛ wɔkɛ nibii komɛi baashã afɔle koni wɔtsu babaoo yɛ Yehowa sɔɔmɔ lɛ mli loo wɔfã kɛya he ko ni hiamɔ lɛ da yɛ. Agbɛnɛ hu, kɛ́ wɔnyɛɛɛ wɔshɛ oti ko ni wɔkɛma wɔhiɛ yɛ asafo lɛ mli lɛ he, loo wɔmiitsu shiɛmɔ nitsumɔ lɛ waa shi fɛɛ sɛɛ lɛ ewooo yibii, loo asafo nitsumɔ ko ni wɔtsuɔ lɛ eyaaa nɔ jogbaŋŋ lɛ, ekolɛ wɔbaanu he akɛ Yehowa bɛ wɔhe miishɛɛ.
10. Mɛɛ su lé ni wɔleee nɔ ni Yehowa baafee lɛ baanyɛ aye abua wɔ ni wɔná?
10 Shi lé ni wɔleee nɔ ni Yehowa baafee kɛye ebua wɔ lɛ baanyɛ awa wɔ ni wɔná sui kpakpai komɛi tamɔ heshibaa. Su nɛɛ baaye abua wɔ ni wɔna akɛ, Yehowa jwɛŋmɔi kɛ egbɛi lɛ anɔ kwɔlɔ fe wɔnɔ lɛ. (Yes. 55:8, 9) Agbɛnɛ hu, ebaahã wɔkɛ wɔhiɛ afɔ̃ Yehowa nɔ kwraa akɛ ebaatsu nibii ahe nii ehã wɔ. Akɛ nɔkwɛmɔnɔ lɛ, kɛ́ wɔshiɛmɔ nitsumɔ lɛ wo yibii, loo asafo nitsumɔ ko ni wɔmiitsu lɛ tee lɛ jogbaŋŋ lɛ, wɔkɛ yijiemɔ lɛ hãa Yehowa. (Lala 127:1; 1 Kor. 3:7) No hewɔ lɛ, kɛ́ nibii eyaaa lɛ jogbaŋŋ hu lɛ, esa akɛ wɔkai akɛ Yehowa le. (Yes. 26:3) Esa akɛ wɔfee nɔ ni wɔbaanyɛ, ni wɔya nɔ wɔkɛ wɔhiɛ afɔ̃ Yehowa nɔ akɛ, lɛ hu ebaatsu egbɛfaŋ nɔ. Kɛ́ etsɔɔɔ naakpɛɛ gbɛ nɔ etsuuu saji ahe nii tamɔ efee yɛ blema lɛ po lɛ, ebaaya nɔ etsɔɔ wɔ gbɛ.—Bɔf. 16:6-10.
11. Mɛɛ nibii wɔle yɛ Yehowa he ni baanyɛ aye abua wɔ?
11 Wɔle akɛ Yehowa sumɔɔ wɔ waa, eyeɔ jalɛ sane, ni ehiɛ kã shi. Wɔle hu akɛ, ehiɛ sɔɔ nibii ni wɔfeɔ yɛ ejamɔ lɛ mli kɛ nibii ni wɔfeɔ kɛyeɔ wɔbuaa wɔnyɛmimɛi lɛ waa. Kɛfata he lɛ, wɔle akɛ, Yehowa jwereɔ mɛi ni yeɔ lɛ anɔkwa lɛ be fɛɛ be.—Heb. 11:6.
WƆLEEE NƆ NI BAABA WƆ́
12. Mɛni Yakobo 4:13, 14 lɛ kɛɛ wɔleee?
12 Kanemɔ Yakobo 4:13, 14. Anɔkwa sane ji akɛ, wɔleee bɔ ni wɔshihilɛ baaji wɔ́. Yɛ jeŋ fɔŋ nɛɛ mli lɛ, “nibii ni baa yɛ be ni akpaaa gbɛ mli lɛ” baa wɔteŋ mɔ fɛɛ mɔ nɔ. (Jaj. 9:11) Enɛ hewɔ lɛ, wɔnyɛŋ wɔle kɛji nibii ni wɔto wɔyiŋ akɛ wɔbaafee lɛ baaye omanye loo kɛji wɔbaahi wala mli kɛyashi wɔbaagbe naa po.
13. Mɛɛ gbɛ nɔ lé ni wɔleee nɔ ni baaba wɔ́ lɛ baanyɛ ahã shihilɛ afee wɔ ahuntoo?
13 Lé ni wɔleee nɔ ni baaba wɔ́ lɛ baanyɛ ahã shihilɛ afee wɔ ahuntoo. Mɛni hewɔ? Akɛni wɔleee wɔ́ hewɔ lɛ, bei komɛi lɛ wɔyeɔ wɔtsui, ni enɛ hãa wɔmiishɛɛ fɛɛ tãa. Agbɛnɛ hu, wɔshihilɛ baanyɛ atsake trukaa loo nibii gbohii baanyɛ aba wɔnɔ be ni wɔkpaaa gbɛ, ni enɛ baanyɛ ahã wɔwerɛ aho wɔhe loo wɔhao. Kɛfata he lɛ, kɛ́ nibii ni wɔkpaa gbɛ lɛ baaa mli lɛ, wɔnijiaŋ baanyɛ aje wui.—Abɛi 13:12.
14. Kɛ́ wɔmiitao wɔná miishɛɛ lɛ, mɛni esa akɛ wɔfee? (Kwɛmɔ mfonirii lɛ hu.)
14 Kɛ́ wɔkɛ shihilɛi ni mli wawai kpe ni wɔtee nɔ wɔfi shi lɛ, ehãa wɔ-Tsɛ ni yɔɔ ŋwɛi lɛ naa akɛ suɔmɔ ni wɔyɔɔ kɛhã lɛ lɛ hewɔ wɔsɔmɔɔ lɛ lɛ, shi jeee nɔ ni wɔnáa yɛ edɛŋ lɛ hewɔ. Nibii ni wɔkase yɛ Biblia lɛ mli lɛ hãa wɔnaa akɛ, esaaa akɛ wɔkpaa gbɛ akɛ Yehowa baabu wɔhe kɛje sane fɔŋ fɛɛ sane fɔŋ he, ni etsɔko hiɛ etoko bɔ ni wɔshihilɛ baaya lɛ ahã hu. Yehowa le akɛ, kɛ́ wɔbo lɛ toi ni wɔnyiɛ egbɛtsɔɔmɔ sɛɛ lɛ, wɔbaaná miishɛɛ, kɛ́ wɔleee nɔ ni baaba wɔ́ po. (Yer. 10:23) Kɛ́ wɔtao edɛŋ gbɛtsɔɔmɔ dani wɔkpɛ yiŋ lɛ, belɛ wɔmiikɛɛ akɛ: “Kɛ́ Yehowa miisumɔ lɛ, wɔbaahi wala mli ni wɔfee enɛ loo enɛ.”—Yak. 4:15.
Kɛ́ wɔnyiɛ Yehowa gbɛtsɔɔmɔ sɛɛ ni wɔbo lɛ toi lɛ, no baabu wɔhe (Kwɛmɔ kuku 14-15)b
15. Mɛni wɔle akɛ ebaaba wɔsɛɛ?
15 Eyɛ mli akɛ wɔleee nɔ ni baaba wɔ́ moŋ, shi wɔle akɛ Yehowa ewo shi akɛ ebaahã wɔ naanɔ wala, kɛ́ yɛ ŋwɛi jio, shikpɔŋ nɔ jio. Wɔle akɛ enyɛŋ emale, ni nɔ ko nɔ ko bɛ ni baanyɛ atsĩ enaa ni ekaye eshiwoo lɛ nɔ. (Tito 1:2) Lɛ pɛ ‘egbaa nibii ni baaba yɛ naagbee, ni ejɛɔ blema ejajeɔ nibii ni anako afee lɛ.’ Nibii fɛɛ ni egba yɛ blema lɛ ba mli, ni nibii fɛɛ ni egba akɛ ebaaba wɔsɛɛ lɛ hu baaba mli. (Yes. 46:10) Wɔheɔ wɔyeɔ waa akɛ, nɔ ko nɔ ko bɛ ni baatse wɔ kɛje Yehowa suɔmɔ lɛ he. (Rom. 8:35-39) Ebaahã wɔ hiɛshikamɔ, ebaashɛje wɔmii, ni ebaahã wɔ hewalɛ ni wɔkɛdamɔ shihilɛ fɛɛ shihilɛ naa. Wɔbaanyɛ wɔná nɔmimaa akɛ, Yehowa baaye ebua wɔ ni ebaajɔɔ wɔ.—Yer. 17:7, 8.
WƆJWƐŊMƆ NYƐŊ ASHƐ BƆ NI YEHOWA LE WƆ JOGBAŊŊ EHÃ LƐ HE
16. Mɛni Yehowa le yɛ wɔhe? Ni te enɛ hãa onuɔ he ohãa tɛŋŋ? (Lala 139:1-6)
16 Kanemɔ Lala 139:1-6. Yehowa, mɔ ni bɔ wɔ lɛ, le wɔhe nɔ fɛɛ nɔ. Ele nɔ hewɔ ni esoro bɔ ni wɔsusuɔ nii ahe wɔhãa lɛ yɛ mɛi krokomɛi anɔ he, kɛ nɔ hewɔ ni esoro bɔ ni wɔnuɔ nii ahe wɔhãa lɛ yɛ mɛi krokomɛi anɔ he. Kɛ́ wɔwie nɔ ko lɛ, ele nɔ ni wɔmiitao wɔtsɔɔ diɛŋtsɛ, ni kɛ́ wɔfee nɔ ko hu lɛ, ele nɔ hewɔ ni wɔfee nakai. Tamɔ Maŋtsɛ David wie lɛ, Yehowa yɛ wɔhiɛ kɛ wɔsɛɛ fɛɛ. Eekwɛ wɔnɔ jogbaŋŋ, ni efee klalo akɛ ebaaye ebua wɔ. Bo lɛ, susumɔ enɛ he okwɛ, jeŋ muu fɛɛ Nuŋtsɔ Ofe lɛ, mɔ ni bɔ ŋwɛi kɛ shikpɔŋ lɛ, susuɔ ohe waa. Te enɛ hãa onuɔ he ohãa tɛŋŋ? Ekolɛ onuɔ he tamɔ David. Ewie akɛ: “Nilee nɛɛ ji nɔ ni mijwɛŋmɔ shɛɛɛ he lɛ. Enɔ kwɔ kwraa fe bɔ ni manyɛ manu shishi.”—Lala 139:6, shn.
17. Mɛni baanyɛ ahã ewa waa kɛhã wɔ akɛ wɔbaahe wɔye akɛ Yehowa le wɔ jogbaŋŋ ni enuɔ wɔ shishi?
17 Ekolɛ nibii ni etee nɔ yɛ wɔweku lɛ mli, he ni wɔjɛ, loo nibii ni wɔheɔ wɔyeɔ dani wɔbale anɔkwale lɛ baanyɛ ahã ewa kɛhã wɔ akɛ wɔbaana Yehowa akɛ eji wɔ-Tsɛ, ni agbɛnɛ hu, wɔhe wɔye akɛ, esusuɔ wɔhe ni esumɔɔ wɔ. Aloo ekolɛ nibii komɛi ni ehiii kwraa ni wɔfee be ko ni eho lɛ ahewɔ lɛ, wɔnuɔ he akɛ Yehowa taooo wɔ yɛ emasɛi kwraa, ni akɛ, ekɛ wɔ teŋ jekɛ. David po nu he nakai bei komɛi. (Lala 38:18, 21) Bei komɛi lɛ, mɛi ni miimia amɛhiɛ waa ni amɛtsake amɛjeŋba koni amɛhi shi yɛ Nyɔŋmɔ mlai kɛ eshishitoo mlai anaa lɛ ateŋ mɛi komɛi biɔ amɛhe akɛ, ‘Kɛ́ Nyɔŋmɔ nuɔ mi shishi lɛɛlɛŋ lɛ, mɛni hewɔ doo lɛ eetao matsake mijeŋba, be mli ni ele faŋŋ akɛ, nakai feemɔ wa waa kɛhã mi?’
18. Kɛ́ wɔhe wɔye waa akɛ Yehowa le wɔ jogbaŋŋ lɛ, te wɔbaaná he sɛɛ wɔhã tɛŋŋ? (Kwɛmɔ mfonirii lɛ hu.)
18 Wɔbaanyɛ wɔhe wɔye akɛ, Yehowa le wɔ jogbaŋŋ fe bɔ ni wɔ diɛŋtsɛ po wɔle wɔhe, ni enaa nibii kpakpai yɛ wɔhe ni wɔ po wɔnaaa. Eyɛ mli akɛ enaa wɔfatɔi moŋ, shi enuɔ wɔ shishi ni esumɔɔ wɔ. (Rom. 7:15) Kɛ́ wɔbana akɛ Yehowa naa wɔmɔdɛŋbɔi lɛ kɛ nɔ gbɔmɔ ni wɔbaanyɛ wɔtsɔ wɔsɛɛ lɛ, wɔbaaná ekãa kɛsɔmɔ lɛ, ni wɔbaaná miishɛɛ hu.
Yehowa yeɔ ebuaa wɔ koni wɔhe wɔye waa akɛ, jeŋ hee lɛ baaba, ni enɛ yeɔ ebuaa wɔ ni wɔfiɔ shi kɛ́ wɔkɛ shihilɛi ni mli wawai ni wɔkpaaa gbɛ po kpe (Kwɛmɔ kuku 18-19)c
19. Mɛni wɔle waa yɛ Yehowa he?
19 Wɔle akɛ, Yehowa lɛ, suɔmɔ ji lɛ, ni ŋwanejee ko kwraa bɛ enɛ he. (1 Yoh. 4:8) Wɔle akɛ nɔ fɛɛ nɔ ni Yehowa kɛɔ wɔ akɛ wɔfee loo wɔkafee lɛ, ekɛɔ wɔ nakai ejaakɛ esumɔɔ wɔ, ni eesumɔ ni ahi ahã wɔ. Wɔle akɛ Yehowa miisumɔ ni wɔná naanɔ wala, ni no hewɔ ehã e-Bi lɛ bagbo ehã wɔ lɛ. Kpɔmɔnɔ lɛ hewɔ lɛ, wɔbaanyɛ wɔsɔmɔ Yehowa yɛ emuu ni wɔyeee lɛ fɛɛ sɛɛ. (Rom. 7:24, 25) Wɔle hu akɛ, “Nyɔŋmɔ da fe wɔtsuii, ni ele nɔ fɛɛ nɔ.” (1 Yoh. 3:19, 20) Yehowa naa nɔ fɛɛ nɔ ni yaa nɔ yɛ wɔshihilɛ mli, ni eheɔ eyeɔ akɛ wɔbaanyɛ wɔfee esuɔmɔnaa nii.
20. Mɛni baaye abua wɔ ni wɔkaye wɔtsui yɛ nibii ni wɔleee lɛ ahe?
20 Yehowa ekɛɛ wɔ nɔ fɛɛ nɔ ni esa akɛ wɔle, ni ekɛ nɔ ko eteko wɔ. No hewɔ lɛ, ehe ehiaaa ni wɔyeɔ wɔtsui yɛ nibii ni wɔleee lɛ ahe. Moŋ lɛ, esa akɛ wɔkɛ wɔjwɛŋmɔ ama nibii ni he hiaa diɛŋtsɛ lɛ anɔ. Kɛ́ wɔfee nakai lɛ, no baatsɔɔ akɛ wɔbaa wɔhe shi ni wɔkɛ wɔhiɛ fɔ̃ɔ Yehowa, “mɔ ni eye emuu yɛ nilee gbɛfaŋ lɛ” nɔ. (Hiob 36:4) Eyɛ mli akɛ jeee nɔ fɛɛ nɔ wɔle bianɛ moŋ, shi wɔle akɛ Yehowa baaya nɔ etsɔɔ wɔ nibii hei kɛya naanɔ, ni enɛ ŋɔɔ wɔnaa waa, ejaakɛ wɔbaaya nɔ wɔkase wɔ-Nyɔŋmɔ Kpele lɛ he nii babaoo.—Jaj. 3:11.
LALA 104 Mumɔ Krɔŋkrɔŋ Lɛ—Nikeenii Ni Jɛ Nyɔŋmɔ Ŋɔɔ
b NƆ NI WƆNAA YƐ MFONIRI LƐ : Papa ko kɛ ebinuu miito nibii komɛi amɛmiiwo baagi mli koni kɛ́ oshãra ko ba lɛ, amɛweku lɛ he akafi amɛ.
c NƆ NI WƆNAA YƐ MFONIRI LƐ MLI: Nyɛmi nuu ko ni ehao lɛ miisusu shihilɛ kpakpa ni ebaaná yɛ jeŋ hee lɛ mli lɛ he.