Yesu ‘Kase Bɔ Ni Aboɔ Nyɔŋmɔ Toi’

Be ni Yesu yɔɔ ŋwɛi lɛ, eboɔ Yehowa toi be fɛɛ be. (Yoh. 8:29) Kɛ́ nakai lɛ, mɛni hewɔ Biblia lɛ kɛɛ: “Ekase bɔ ni aboɔ Nyɔŋmɔ toi kɛjɛ amanehului ni ena lɛ amli” lɛ?—Heb. 5:8.

Be ni Yesu ba shikpɔŋ lɛ nɔ lɛ, ekɛ shihilɛi komɛi ni ekɛkpeee yɛ ŋwɛi lɛ kpe. Akɛ nɔkwɛmɔnɔ lɛ, efɔlɔi lɛ sumɔɔ Yehowa, shi amɛyeee emuu. (Luka 2:51) Agbɛnɛ hu, jamɔŋ hiɛnyiɛlɔi ni yitseiaŋ wala kɛ amralofoi ni bɛ jeŋba kɛ lɛ yeee jogbaŋŋ ni amɛhã epiŋ waa. (Mat. 26:59; Mar. 15:15) Naagbee kwraa lɛ, afee lɛ niseniianii ni agbe lɛ. Biblia lɛ kɛɛ: “Eba ehe shi, ni ebo Nyɔŋmɔ toi kɛtee gbele mli tɔ̃ɔ.”—Fip. 2:8.

No hewɔ lɛ, nibii ni Yesu tsɔ mli be ni eyɔɔ shikpɔŋ lɛ nɔ lɛ hã ekase bɔ ni aboɔ Nyɔŋmɔ toi yɛ shihilɛi ni ekɛkpeee be ni eyɔɔ ŋwɛi lɛ amli. Enɛ hewɔ lɛ, amrɔ nɛɛ ni ebatsɔ Maŋtsɛ kɛ Osɔfonukpa lɛ, ebaanyɛ enu wɔ shishi jogbaŋŋ ni etsu wɔhiamɔ nii ahe nii jogbaŋŋ ehã wɔ. (Heb. 4:15; 5:9) Bɔ ni Yesu kase toiboo kɛjɛ amanehului ni ena lɛ amli hewɔ lɛ, bianɛ lɛ, Yehowa nyɛɔ ekɛ lɛ tsuɔ nii waa fe tsutsu lɛ po, ni eshwɛɛɛ ehe kwraa. Kɛ́ wɔ hu wɔbo Yehowa toi yɛ shihilɛi ni mli wawai amli lɛ, Yehowa kɛ wɔ baatsu nii waa, ni eshwɛŋ wɔhe kwraa.—Yak. 1:4.