COVID Hela Lɛ Egbe Mɛi 6,000,000​—Mɛni Biblia Lɛ Yɔɔ Kɛɛmɔ Yɛ He?

World Health Organization (WHO; Jeŋ Hewalɛnamɔ Gbɛjianɔtoo) lɛ bɔ amaniɛ akɛ, be ni shɛɔ May 23, 2022 lɛ, COVID-19 hela lɛ egbe mɛi 6,270,000 sɔŋŋ. Shi dani sane nɛɛ baaje kpo lɛ, yɛ May 5, 2022 lɛ, WHO lɛ tswa adafi akɛ, etamɔ nɔ ni mɛi ni COVID hela lɛ egbe lɛ ayi fa kwraa fe yibɔ nɛɛ. Awie yɛ nakai adafitswaa lɛ mli akɛ, yɛ afi 2020 kɛ 2021 mli lɛ, “mɛi ni COVID-19 tsɛŋemɔ hela lɛ gbe amɛ loo ehã hela ko ni amɛmiiye momo lɛ mli wo wu ni amɛgboi lɛ ayi baanyɛ ashɛ mɛi 14,900,000.” Ani Biblia lɛ kɛɔ nɔ ko yɛ sane fɔŋ nɛɛ kɛ ekrokomɛi ni tamɔ nakai ni kumɔɔ mɔ tsui lɛ ahe?

Biblia lɛ gba akɛ tsɛŋemɔ helai ni gbeɔ mɔ baaba

•  Yesu gba akɛ, yɛ “naagbee gbii lɛ amli” lɛ, “tsɛŋemɔ helai ni gbeɔ mɔ” loo gbele helai baaba.​—Luka 21:11; 2 Timoteo 3:1.

Nɔ ni Yesu gba lɛ miiba mli ŋmɛnɛ. Kɛ́ ootao ole sane nɛɛ he saji krokomɛi lɛ, kanemɔ sane ni ji, “What Is the Sign of ‘the Last Days,’ or ‘End Times’?” (Mɛni Ji Naagbee Gbii Lɛ Ahe Okadi Lɛ?)

Saji ni shɛjeɔ mɔ mii yɛ Biblia lɛ mli

•  “Miishɛjemɔ fɛɛ Nyɔŋmɔ lɛ . . . shɛjeɔ wɔmii yɛ wɔmanehului fɛɛ amli.”​—2 Korintobii 1:3, 4.

Biblia lɛ mli saji lɛ eshɛje mɛi ni agboi yɛ amɛnɔ lɛ ateŋ mɛi pii amii. Obaana enɛ he saji yɛ sane ni ji, “Coping With Grief​—What You Can Do Today” (Nibii Ni Obaanyɛ Ofee Bianɛ Kɛ́ Ooye Awerɛho) kɛ “The Best Help for Those Who Grieve” (Nɔ Ni Hi Fe Fɛɛ Ni Baanyɛ Aye Abua Mɛi Ni Miiye Awerɛho) lɛ mli.

Biblia lɛ hãa wɔnaa bɔ ni abaafee afo naagbai nɛɛ fɛɛ asɛɛ kwraa

•  “O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.”​—Mateo 6:10.

Etsɛŋ, “Nyɔŋmɔ Maŋtsɛyeli lɛ” hewɔ lɛ, mɔ ko mɔ ko ekɛŋ akɛ: “Mibɛ hewalɛ.” (Marko 1:14, 15; Yesaia 33:24) Kɛ́ ootao ole nɔ ni nɔyeli nɛɛ ni yɔɔ ŋwɛi lɛ ji kɛ nɔ ni ebaafee lɛ, kwɛmɔ vidio ni ji, Mɛni Ji Nyɔŋmɔ Maŋtsɛyeli Lɛ?

Wɔmiiwo bo hewalɛ ni okase Biblia lɛ koni bo kɛ oweku lɛ aná ŋaawoi kpakpai kɛ shiwoi ni nɔ bɛ ni yɔɔ mli lɛ ahe sɛɛ.