Namɔ Baahere Maŋbii Ni Fataaa Asraafoi Ni Wuɔ Ta Lɛ Ahe Lɛ?​—Mɛni Biblia Lɛ Kɛɔ Yɛ He?

Jeŋmaji Ekomefeemɔ lɛ bɔ amaniɛ akɛ:

• Kɛjɛ October 7 kɛyashi October 23, 2023 lɛ, ta ni miiya nɔ yɛ Gaza kɛ Israel teŋ lɛ ehã mɛi ni fa fe 6,400 egboi, ni mɛi 15,200 hu epila, ni mɛi ni egboi kɛ mɛi ni epila lɛ ateŋ mɛi babaoo ji maŋbii ni fataaa asraafoi ni wuɔ ta lɛ ahe. Agbɛnɛ hu, ta lɛ ehã mɛi akpei ohai abɔ eshi amɛshĩai kɛyahi hei krokomɛi.

• Be ni shɛɔ September 24, 2023 lɛ, ta ni yaa nɔ yɛ Russia kɛ Ukraine teŋ lɛ egbe maŋbii 9,701 ni fataaa asraafoi ni wuɔ ta lɛ ahe, ni ehã mɛi 17,748 hu epila yɛ Ukraine.

Mɛɛ hiɛnɔkamɔ Biblia lɛ kɛhãa mɛi ni naa nɔ yɛ tai ahewɔ lɛ?

Nɔ hewɔ ni obaanyɛ oná hiɛnɔkamɔ

Biblia lɛ egba efɔ̃ shi akɛ, Nyɔŋmɔ baafo “tai asɛɛ yɛ shikpɔŋ lɛ nɔ fɛɛ.” (Lala 46:9) Ekɛ ŋwɛi nɔyeli loo maŋtsɛyeli ko baaye adesai anɔyelii fɛɛ anajiaŋ. (Daniel 2:44) Nyɔŋmɔ Maŋtsɛyeli lɛ baahã adesai fɛɛ ahe ajɔ amɛ.

Kadimɔ nibii ni Yesu Kristo, ni ji Nyɔŋmɔ Maŋtsɛyeli lɛ nɔ Maŋtsɛ lɛ, baafee lɛ ekomɛi:

• “Ebaajie ohiafo ni bolɔɔ kɛhã yelikɛbuamɔ lɛ, kɛ mɔ ni nii yɔɔ mɔbɔ lɛ, kɛ mɔ fɛɛ mɔ ni bɛ yelikɛbualɔ lɛ. Ebaana mɔ ni bɛ yelikɛbualɔ lɛ kɛ ohiafo lɛ mɔbɔ, ebaahere ohiafoi lɛ ayiwala. Ebaajie amɛ kɛje nɔnyɛɛ kɛ yiwalɛ mli.”​—Lala 72:12-14.

Nyɔŋmɔ baatsɔ e-Maŋtsɛyeli lɛ nɔ ejie amanehului kɛ piŋmɔi fɛɛ ni ejɛ tai kɛ yiwalɛ nifeemɔi amli kɛba lɛ kɛya kwraa.

• “Ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni awerɛhoyeli loo yaafo loo piŋmɔ ko hu bɛ dɔŋŋ. Tsutsu nibii lɛ eho etee.”​—Kpojiemɔ 21:4.

Etsɛŋ, Nyɔŋmɔ Maŋtsɛyeli lɛ kɛ tsakemɔi kpelei baaba shikpɔŋ nɛɛ nɔ. Biblia lɛ egba “tai kɛ tai amaniɛbɔi” ni wɔnaa ŋmɛnɛ lɛ efɔ̃ shi momo. (Mateo 24:6) Tai nɛɛ kɛ nibii krokomɛi ni yaa nɔ lɛ tsɔɔ akɛ, wɔyɛ adesai anɔyelii lɛ “naagbee gbii lɛ amli.”​—2 Timoteo 3:1.