Mɛɛ Be Abaakpa Tawuu Lɛ?​—⁠Mɛni Biblia Lɛ Kɛɔ Yɛ He?

Be ni Iran tswara okplɛmii kɛtutua Israel yɛ Hɔgbaa, April 13 lɛ, António Guterres ni eji Jeŋmaji Ekomefeemɔ Lɛ Hiɛnyiɛlɔ lɛ kɛɛ akɛ: “Amrɔ nɛɛ ji be ni esa akɛ mɔ fɛɛ mɔ kɛ etawuu nibii ashwie shi ni akpa bei kɛ awuiyeli lɛ. Amrɔ nɛɛ ji be ni esa akɛ mɔ fɛɛ mɔ aye ehe nɔ, ni etsui aba shi.”

Ta ni miiya nɔ yɛ Middle East lɛ ji tai ni miiya nɔ yɛ je lɛŋ hei srɔtoi lɛ ateŋ ekome.

“Kɛjɛ be ni agbe Jeŋ Ta Ni Ji Enyɔ lɛ naa kɛbaa nɛɛ, wɔbei nɛɛ ji be ni aawu tai ni yɔɔ gbeyei babaoo yɛ je lɛŋ hei srɔtoi fe bei fɛɛ ni eho, ni tai nɛɛ miisa mɛi biliɔn enyɔ, ni ji mɛi fɛɛ ni yɔɔ je lɛ mli lɛ amlijaa ejwɛ ahe.”​—United Nations Security Council, January 26, 2023.

Maji ni aawu tai ni yɔɔ gbeyei yɛ nɔ ekomɛi ji, Israel, Gaza, Syria, Azerbaijan, Ukraine, Sudan, Ethiopia, Niger, Myanmar, kɛ Haiti.a

Mɛɛ be abaakpa tawuu lɛ? Ani je lɛŋ hiɛnyiɛlɔi baanyɛ amɛhã toiŋjɔlɛ aba? Mɛni Biblia lɛ kɛɔ yɛ he?

Tai miiya nɔ yɛ je lɛŋ hei babaoo

Bɔ ni tai yaa nɔ yɛ je lɛŋ hei srɔtoi ŋmɛnɛ lɛ tsɔɔ akɛ etsɛŋ, tai fɛɛ asɛɛ baafo. Tai nɛɛ ehã gbalɛ ni Biblia lɛ gba yɛ wɔbei nɛɛ ahe lɛ eba mli. Biblia lɛ tsɛɔ bei ni wɔyɔɔ mli nɛɛ akɛ “je lɛ naagbee gbii lɛ.”​—Mateo 24:3.

• “Nyɛbaanu tai kɛ tai amaniɛbɔi ahe. . . . Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli.”​—Mateo 24:6, 7.

Kanemɔ sane ni ji “Mɛni Ji ‘Naagbee Gbii Lɛ’ Ahe Okadi Lɛ?” koni ona bɔ tai ni yaa nɔ ŋmɛnɛ lɛ woɔ Biblia gbalɛ obɔ̃.

Ta ko ni baafo tai fɛɛ asɛɛ

Biblia lɛ gba akɛ, béi kɛ tai ni adesai wuɔ lɛ asɛɛ baafo. Mɛni baahã eba lɛ nakai? Jeee gbɔmɛi amɔdɛŋbɔi baahã tai nɛɛ asɛɛ afo, moŋ lɛ, Nyɔŋmɔ baatsɔ Harmagedon ta lɛ, ni ji “Nyɔŋmɔ Ofe lɛ gbi wulu lɛ nɔ ta lɛ” nɔ efo tai fɛɛ asɛɛ.” (Kpojiemɔ 16:14, 16) Harmagedon ta lɛ nɔ Nyɔŋmɔ baatsɔ efo tai asɛɛ koni shi ni ewo akɛ ebaahã gbɔmɛi ahi shi yɛ toiŋjɔlɛ mli kɛya naanɔ lɛ aba mli.​—Lala 37:10, 11, 29.

Kɛ́ ootao ole Nyɔŋmɔ ta ni baafo tai fɛɛ asɛɛ lɛ he saji krokomɛi lɛ, kanemɔ sane ni ji, “Mɛni Ji Harmagedon Ta Lɛ?”