Thai Liang Lim/E+ aná kɛjɛ Getty Images
NYƐYAA NƆ NYƐBUA!
Ani Soshia Midia Miiye Obi Lɛ Awui?—Bɔ Ni Biblia Lɛ Baanyɛ Aye Abua Fɔlɔi
“Oblahii kɛ oblayei ni miiná jwɛŋmɔŋ naagbai lɛ ayi efa waa bɔ ni esa akɛ akɛ oyaiyeli kɛ hiɛdɔɔ amɔ naa, ni wɔyɔse akɛ soshia midia ji nibii titri ni hãa amɛnáa jwɛŋmɔŋ naagbai lɛ ateŋ ekome.”—Dr. Vivek Murthy, U.S. maŋ onukpa ni kwɛɔ helatsamɔ nɔ, New York Times, June 17, 2024.
Mɛni fɔlɔi baanyɛ afee kɛbu amɛbii lɛ ahe yɛ soshia midia nɔ oshãrai ahe? Biblia lɛ kɛ ŋaawoi ni yeɔ ebuaa hãa.
Nɔ ni fɔlɔi baanyɛ afee
Naa Biblia mli shishitoo mlai komɛi.
“Hiɛtɛ̃lɔ kwɛɔ enajifaamɔi jogbaŋŋ.”—Abɛi 14:15.
Akɛni soshia midia baanyɛ aná obi lɛ nɔ hewalɛ gbonyo loo eye lɛ awui hewɔ lɛ, kaanu he akɛ doo lɛ, esa akɛ oŋmɛ lɛ gbɛ ni eya soshia midia lɛ nɔ. Dani obaaŋmɛ obi gbɛ akɛ eya soshia midia nɔ lɛ, kwɛmɔ akɛ eji mɔ ko ni baanyɛ eye mlai ni owo lɛ yɛ bei abɔ ni esa akɛ eye yɛ nɔ, nanemɛi kpakpai ni esa akɛ ekɛbɔ yɛ nɔ, kɛ nibii gbohii ni esaaa akɛ ekwɛɔ, ekaneɔ, ekɛmajeɔ, loo ekɛwoɔ nɔ lɛ anɔ lo.
Kɛ́ ootao ole enɛ he saji krokomɛi lɛ, kanemɔ saji ni ji, “Ani Esa Akɛ Mibi Lɛ Aya Social Media Lɛ Nɔ?” kɛ “Bɔ Ni Obaafee Oye Obua Obii Lɛ Koni Kɛ́ Amɛtee Social Media Nɔ Lɛ Amɛfee Shweshweeshwe” lɛ.
“Nyɛkɛ nyɛbe atsu nii jogbaŋŋ.”—Efesobii 5:16.
Kɛ́ obaaŋmɛ obi lɛ gbɛ koni eya soshia midia nɔ lɛ, wo lɛ mlai yɛ bɔ ni esa akɛ ekɛtsu nii ehã lɛ he, ni ogbala mli otsɔɔ lɛ bɔ ni kɛ́ eye mlai loo gbɛtsɔɔmɔi ni okɛhã lɛ anɔ lɛ, ebaaye ebua lɛ koni efee shweshweeshwe yɛ nɔ. Okɛ ohiɛ afɔ̃ shi kɛkwɛ akɛ obaana tsakemɔi komɛi yɛ obi lɛ nifeemɔ mli ni tsɔɔ akɛ esa akɛ okudɔ bɔ ni eyaa soshia midia lɛ nɔ ehãa lo.
Okɛ vidio ni ji, Ohiɛ Akã Shi Yɛ Fesbuk Kɛ Ehenɔi Lɛ Kɛnitsumɔ Mli lɛ aye abua obi lɛ koni ena nɔ hewɔ ni ehe miihia waa ni wɔkudɔ bɔ ni wɔkɛ soshia midia tsuɔ nii wɔhãa lɛ.
Ekrokomɛi hu nɛ
Biblia lɛ kɛɛ, wɔyɛ “bei krɛdɛi ni mli shihilɛ wa” mli. (2 Timoteo 3:1-5) Nakai beiaŋ nɔŋŋ lɛ, Biblia lɛ hãa wɔ ŋaawoi kpakpai ni baaye abua wɔ koni wɔkpee shihilɛi ni mli wawai anaa, ni ŋaawoi nɛɛ abe hooo kɔkɔɔkɔ. Ajɛ Biblia lɛ mli aŋmala saji ni fa fe 20 kɛhã fɔlɔi kɛ amɛbii yɛ jwɛŋmɔŋ naagbai ni oblahii kɛ oblayei náa lɛ ahe.