Namɔ Obaanyɛ Okɛ Ohiɛ Afɔ̃ Enɔ?​—⁠Mɛni Biblia Lɛ Kɛɔ Yɛ He?

Kɛ́ mɛi ni akpaa gbɛ akɛ abaanyɛ akɛ hiɛ afɔ̃ amɛnɔ lɛ eyafeee amɛnii jogbaŋŋ lɛ, ejeɔ mɛi anijiaŋ wui waa. Mɛi babaoo nyɛɛɛ amɛkɛ amɛhiɛ afɔ̃ mɛi ni nyiɛ sɛɛ nɛɛ anɔ dɔŋŋ . . .

• maŋkwramɔŋ hiɛnyiɛlɔi ni jwɛŋŋ maŋbii lɛ ahilɛkɛhamɔ he, shi moŋ amɛfeɔ nibii ni amɛ amɛbaaná he sɛɛ.

• adafitswaa nitsumɔhei ni eŋmɛɛɛ pɛpɛɛpɛ yɛ amaniɛbɔi amli, ni amɛkɛ amaniɛbɔi ni ejaaa hu hãa.

• jeŋ shikpálɔi ni efeee nibii ni mɛi baaná he sɛɛ.

• jamɔŋ hiɛnyiɛlɔi ni kɛ amɛhe woɔ pɔlitis mli vii moŋ fe ni amɛbaasɔmɔ akɛ Nyɔŋmɔ najiaŋdamɔlɔi.

Eja gbɛ akɛ mɛi baakwɛ amɛhe nɔ jogbaŋŋ yɛ mɛi ni amɛkɛ amɛhiɛ baafɔ̃ amɛnɔ lɛ he. Biblia lɛ bɔ kɔkɔ akɛ:

• “Okɛ ohiɛ akafɔ̃ hiɛnyiɛlɔ ko ni ji adesa nɔ; gbɔmɔ ko gbɔmɔ ko nyɛŋ ahere oyiwala.”​—Lala 146:3, Good News Translation.

Mɔ ko ni obaanyɛ okɛ ohiɛ afɔ̃ enɔ

 Biblia lɛ hãa wɔnaa mɔ ko ni wɔbaanyɛ wɔmu wɔfɔ̃ enɔ: Yesu Kristo. Jeee akɛ eji gbɔmɔ kpakpa ko ni hi shi afii ohai komɛi ni eho kɛkɛ. Nyɔŋmɔ hala Yesu koni ‘eye nɔ akɛ Maŋtsɛ ni e-Maŋtsɛyeli lɛ baŋ naagbee.’ (Luka 1:32, 33) Yesu ji Nyɔŋmɔ Maŋtsɛyeli lɛ nɔ Maŋtsɛ, ni Maŋtsɛyeli nɛɛ ji nɔyeli ko ni miiye nɔ amrɔ nɛɛ kɛmiijɛ ŋwɛi.​—Mateo 6:10.

• Kɛ́ ootao ole nɔ hewɔ ni obaanyɛ okɛ ohiɛ afɔ̃ Yesu nɔ lɛ, kanemɔ sane ni ji, “Namɔ Ji Nyɔŋmɔ Maŋtsɛyeli Lɛ Nɔ Maŋtsɛ?” lɛ kɛ “Mɛni Nyɔŋmɔ Maŋtsɛyeli Lɛ Baafee?”