2 Maŋtsɛmɛi

8 Elisha kɛɛ yoo lɛ ni etee ebinuu lɛ shi kɛba wala mli*+ lɛ akɛ: “Tee shi ni oya, bo kɛ oshĩabii lɛ, ni nyɛyahi shi akɛ gbɔi yɛ he fɛɛ he ni nyɛbaaná, ejaakɛ Yehowa ewie akɛ hɔmɔ baaba shikpɔŋ lɛ nɔ,+ ni hɔmɔ lɛ baahi shikpɔŋ lɛ nɔ afii kpawo.” 2 No hewɔ lɛ, yoo lɛ te shi ni efee nɔ ni anɔkwa Nyɔŋmɔ lɛ gbɔmɔ lɛ kɛɛ lɛ lɛ. Yoo lɛ kɛ eshĩabii lɛ tee ni amɛyahi Filistibii+ lɛ ashikpɔŋ lɛ nɔ afii kpawo.

3 Be ni afii kpawo lɛ ba naagbee lɛ, yoo lɛ ku esɛɛ kɛjɛ Filistibii lɛ ashikpɔŋ lɛ nɔ, ni etee eyakpa maŋtsɛ lɛ fai yɛ eshĩa lɛ kɛ eshikpɔŋ lɛ hewɔ. 4 No mli lɛ, maŋtsɛ lɛ kɛ Gehazi, anɔkwa Nyɔŋmɔ lɛ gbɔmɔ lɛ sɔɔlɔ lɛ miiwie, ekɛɛ lɛ akɛ: “Ofainɛ, gbaa mi nibii wuji fɛɛ ni Elisha efee lɛ.”+ 5 Be ni Gehazi gbaa maŋtsɛ lɛ bɔ ni Elisha tee mɔ ko shi kɛba wala mli+ lɛ nɔŋŋ ni yoo lɛ, ni Elisha tee ebinuu lɛ shi kɛba wala mli lɛ, ba maŋtsɛ lɛ ŋɔɔ koni ebakpa fai yɛ eshĩa lɛ kɛ eshikpɔŋ lɛ hewɔ.+ Oya nɔŋŋ ni Gehazi kɛɛ akɛ: “Minuŋtsɔ maŋtsɛ, yoo lɛ nɛ, ni ebinuu lɛ ni Elisha tee lɛ shi kɛba wala mli lɛ hu nɛ.” 6 Kɛkɛ ni maŋtsɛ lɛ bi yoo lɛ sane, ni yoo lɛ gba lɛ nɔ fɛɛ nɔ. Ni maŋtsɛ lɛ fã maŋtsɛ shĩa onukpai lɛ eko ehã lɛ ni ekɛɛ: “Okɛ nibii fɛɛ ni ji yoo lɛ nɔ, kɛ nibaa nii fɛɛ ni akpa yɛ eshikpɔŋ lɛ nɔ kɛjɛ gbi nɔ ni eshi shikpɔŋ lɛ etee lɛ kɛbashi ŋmɛnɛ lɛ aku sɛɛ ahã lɛ.”

7 Be ko lɛ, Elisha tee Damasko+ be ni Ben-hadad,+ Siria maŋtsɛ lɛ bɛ hewalɛ. No hewɔ lɛ, ayakɛɛ maŋtsɛ lɛ akɛ: “Anɔkwa Nyɔŋmɔ lɛ gbɔmɔ+ lɛ eba biɛ.” 8 Kɛkɛ ni maŋtsɛ lɛ kɛɛ Hazael+ akɛ: “Ŋɔɔ nikeenii ko ni oya ni okɛ anɔkwa Nyɔŋmɔ lɛ gbɔmɔ+ lɛ ayakpe. Kɛɛmɔ lɛ ni ebi Yehowa nii ehã mi akɛ, ‘Ani hela ni miyeɔ nɛɛ, mihe baawa mi?’” 9 Hazael tee koni ekɛ Elisha ayakpe, ni ekɛ nikeenii tee, Damasko nibii kpakpai lɛ fɛɛ eko, nibii ni afukpɔŋɔi 40 baanyɛ atere. Etee ni eyadamɔ Elisha hiɛ ni ekɛɛ lɛ akɛ: “Obinuu, Ben-hadad, Siria maŋtsɛ lɛ tsu mi oŋɔɔ koni mibabi bo akɛ, ‘Ani hela ni miyeɔ nɛɛ, mihe baawa mi lo?’” 10 Elisha kɛɛ lɛ akɛ: “Yaa ni oyakɛɛ lɛ akɛ, ‘Ohe baawa bo kɛ̃,’ shi Yehowa ejie etsɔɔ mi akɛ bɔ fɛɛ bɔ ni fee lɛ ebaagbo.”+ 11 Ni ekwɛ lɛ gãa aahu kɛyashi efee lɛ ahuntoo. Kɛkɛ ni anɔkwa Nyɔŋmɔ lɛ gbɔmɔ lɛ jwa yaafo. 12 Hazael bi lɛ akɛ: “Mɛni hewɔ minuŋtsɔ fóɔ?” Elisha kɛɛ akɛ: “Ejaakɛ mile efɔŋ ni obaafee Israelbii lɛ.+ Obaawo amɛmaji ni atswa gbogboi awo amɛhe lɛ amli la, okɛ klante baagbe amɛhii kãkãlɔi lɛ, okɛ amɛbii lɛ baatswia shi, ni obaagbála amɛyeihɔlɔi lɛ amli.”+ 13 Hazael kɛɛ akɛ: “Te aaafee tɛŋŋ otsulɔ baafee nɔ ko tamɔ nɛkɛ, ejaakɛ gbee kɛkɛ ji mi?” Shi Elisha kɛɛ akɛ: “Yehowa ejie etsɔɔ mi akɛ obaaye Siria nɔ maŋtsɛ.”+

14 Kɛkɛ ni eshi Elisha hiɛ ni eku esɛɛ etee enuŋtsɔ lɛ ŋɔɔ, ni enuŋtsɔ lɛ bi lɛ akɛ: “Mɛni Elisha kɛɛ bo?” Hazael kɛɛ akɛ: “Ekɛɛ mi akɛ, ohe baawa bo kɛ̃.”+ 15 Shi enɔ jetsɛremɔ lɛ, Hazael kɔ saa nɔ bo, ni ekɛtsɔ nu mli, ni ekɛbu* enuŋtsɔ lɛ hiɛ kɛyashi egbo.+ Ni Hazael baye maŋtsɛ yɛ esɛɛ.+

16 Yɛ Yehoram,+ Ahab binuu lɛ, ni ji Israel maŋtsɛ lɛ nɔyeli afi ni ji enumɔ lɛ nɔ, be ni Yehoshafat yeɔ maŋtsɛ yɛ Yuda lɛ, Yehoram,+ Yuda maŋtsɛ Yehoshafat binuu lɛ batsɔ maŋtsɛ. 17 Be ni ebatsɔ maŋtsɛ lɛ, no mli lɛ, eye afii 32, ni eye maŋtsɛ afii kpaanyɔ yɛ Yerusalem. 18 Enyiɛ Israel maŋtsɛmɛi lɛ agbɛ lɛ nɔ,+ tamɔ bɔ ni Ahab shĩabii lɛ fee lɛ nɔŋŋ,+ ejaakɛ no mli lɛ, ekɛ Ahab biyoo ebote gbalashihilɛ mli;+ ni etee nɔ efee efɔŋ yɛ Yehowa hiɛ.+ 19 Shi Yehowa sumɔɔɔ akɛ ekpãtãa Yuda maŋtsɛyeli lɛ hiɛ yɛ etsulɔ David hewɔ,+ ejaakɛ ewo lɛ shi akɛ, be fɛɛ be lɛ, ebaahã lɛ kɛ ebihii lɛ seshi ko ni baaye nɔ.*+

20 Yɛ egbii lɛ amli lɛ, Edom tse Yuda hiɛ atua+ ni amɛ diɛŋtsɛ amɛwó maŋtsɛ amɛhã amɛhe.+ 21 No hewɔ lɛ, Yehoram kɛ eshwiilii lɛ fɛɛ fo mli kɛtee Zair, ni ete shi nyɔɔŋ ni eye Edombii lɛ ni ebabɔle lɛ kɛ shwiili tatsɛmɛi lɛ anɔ kunim; ni asraafoi lɛ jo foi kɛyabote amɛmama tsũi lɛ amli. 22 Shi Edom etee nɔ etse Yuda hiɛ atua kɛbashi ŋmɛnɛ. Libna+ hu tse atua yɛ nakai beiaŋ.

23 Shi Yehoram shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli. 24 Kɛkɛ ni Yehoram gbo* ni afu lɛ yɛ etsɛmɛi lɛ amasɛi yɛ David Maŋ+ lɛ mli. Ni ebinuu Ahazia+ baye maŋtsɛ yɛ esɛɛ.

25 Yɛ Yehoram, Ahab binuu lɛ, ni ji Israel maŋtsɛ lɛ nɔyeli afi ni ji 12 lɛ nɔ lɛ, Ahazia, Yuda maŋtsɛ Yehoram binuu lɛ, batsɔ maŋtsɛ.+ 26 Be ni Ahazia batsɔ maŋtsɛ lɛ, no mli lɛ, eye afii 22, ni eye maŋtsɛ afi kome yɛ Yerusalem. Emami gbɛ́i ji Atalia;+ Atalia ji Israel maŋtsɛ Omri+ nabi.* 27 Enyiɛ Ahab shĩabii lɛ agbɛ lɛ nɔ,+ ni etee nɔ efee efɔŋ yɛ Yehowa hiɛ tamɔ bɔ ni Ahab shĩabii lɛ fee lɛ, ejaakɛ epapa kɛ yoo ko ni jɛ Ahab shĩabii lɛ ateŋ lɛ bote gbalashihilɛ mli.+ 28 No hewɔ lɛ, ekɛ Yehoram, Ahab binuu lɛ tee koni amɛkɛ Siria maŋtsɛ Hazael ayawu ta yɛ Ramot-gilead,+ shi Siriabii lɛ pila Yehoram.+ 29 No hewɔ lɛ, Maŋtsɛ Yehoram ku esɛɛ kɛtee Yezreel+ koni eyatsa pilamɔ ni Siriabii lɛ pila lɛ yɛ Rama* be ni ekɛ Siria maŋtsɛ Hazael wuɔ lɛ.+ Yuda maŋtsɛ Ahazia, Yehoram binuu lɛ, kpeleke shi kɛtee Yezreel koni eyasara Yehoram, Ahab binuu lɛ, ejaakɛ no mli lɛ, apila lɛ.*