2 Maŋtsɛmɛi

17 Yɛ Yuda maŋtsɛ Ahaz nɔyeli afi ni ji 12 lɛ nɔ lɛ, Hoshea,+ Ela binuu lɛ batsɔ Israel maŋtsɛ yɛ Samaria; ni eye nɔ afii nɛɛhu. 2 Etee nɔ efee efɔŋ yɛ Yehowa hiɛ, shi efɔŋ ni efee lɛ shɛɛɛ nɔ ni Israel maŋtsɛmɛi ni tsɔ ehiɛ lɛ fee lɛ. 3 Asiria maŋtsɛ Shalmaneser kwɔ kɛba ni ekɛ Hoshea bawu,+ ni Hoshea batsɔ etsulɔ ni eyakeɔ Asiria maŋtsɛ lɛ nii.*+ 4 Shi Asiria maŋtsɛ lɛ ná ele akɛ Hoshea ekpaŋ eyi nɔ, ejaakɛ Hoshea tsu mɛi kɛtee Ejipt maŋtsɛ ni atsɛɔ lɛ So lɛ ŋɔɔ,+ ni ekɛ nikeenii emajeee Asiria maŋtsɛ lɛ tamɔ bɔ ni efeɔ yɛ afii ni eho lɛ amli lɛ. No hewɔ lɛ, Asiria maŋtsɛ lɛ hã amɔ Hoshea ni efi lɛ ewo tsuŋ.

5 Asiria maŋtsɛ lɛ fã ta eshi shikpɔŋ lɛ fɛɛ, ni eba Samaria, ni ewo Samaria he ka afii etɛ. 6 Yɛ Hoshea nɔyeli afi ni ji nɛɛhu lɛ nɔ lɛ, Asiria maŋtsɛ lɛ ŋɔ Samaria.+ Ni eŋɔ Israelbii lɛ nom kɛtee Asiria,+ ni ehã amɛhi Hala kɛ Habor yɛ Gozan faa lɛ he,+ kɛ agbɛnɛ hu, Mediabii lɛ amaji lɛ amli.+

7 Enɛ ba lɛ nakai ejaakɛ Israelbii lɛ fee esha amɛshi Yehowa, amɛ-Nyɔŋmɔ ni yawó amɛ kɛje Ejipt shikpɔŋ lɛ nɔ yɛ Ejipt maŋtsɛ Farao nɔyeli shishi lɛ.+ Amɛjá nyɔŋmɔi krokomɛi,*+ 8 ni amɛhi shi yɛ jeŋmaji ni Yehowa jie* amɛ kɛje Israelbii lɛ ahiɛ lɛ akusumii lɛ kɛ kusumii ni Israel maŋtsɛmɛi lɛ to shishi lɛ anaa.

9 Israelbii lɛ yatiu nibii ni ejaaa yɛ Yehowa, amɛ-Nyɔŋmɔ lɛ hiɛ lɛ asɛɛ. Amɛtee nɔ amɛmamɔ hei grɔŋŋi yɛ amɛmaji lɛ fɛɛ amli,+ kɛjɛ bulɔi amɔɔ lɛ nɔ kɛyashi maŋ ni atswa gbogbo awo he lɛ mli.* 10 Amɛmamɔ wɔŋ tɛi kɛ wɔŋ tsei*+ amɛhã amɛhe yɛ gɔŋkpɔ fɛɛ gɔŋkpɔ ni kwɔ nɔ, kɛ tso fɛɛ tso ni ebu kusuu shishi;+ 11 ni amɛshã lasu afɔle yɛ hei grɔŋŋi lɛ fɛɛ tamɔ bɔ ni jeŋmaji ni Yehowa jie* amɛ kɛje amɛhiɛ* lɛ fee lɛ nɔŋŋ.+ Amɛtee nɔ amɛfee nibii fɔji kɛwo Yehowa mli la.

12 Amɛtee nɔ amɛjá* amagai ni yɔɔ nyaŋemɔ*+ ni Yehowa ekɛɛ amɛ yɛ he akɛ: “Nyɛkajáa amɛ!”* lɛ.+ 13 Yehowa tsɔ egbalɔi lɛ fɛɛ kɛ ninalɔ fɛɛ ninalɔ nɔ ebɔ Israel kɛ Yuda kɔkɔ shii abɔ+ akɛ: “Nyɛkua nyɛsɛɛ kɛjea nyɛgbɛi fɔji lɛ anɔ!+ Nyɛyea mikitãi kɛ mimlai lɛ fɛɛ ni aŋmala yɛ mla ni mikɛhã nyɛtsɛmɛi lɛ kɛ nɔ ni mitsɔ mitsuji gbalɔi lɛ anɔ mikɛhã nyɛ lɛ mli lɛ anɔ.” 14 Shi amɛbooo toi, ni amɛfee amɛhe kuɛŋtilɔi tamɔ amɛtsɛmɛi ni heee Yehowa, amɛ-Nyɔŋmɔ lɛ amɛyeee lɛ fee lɛ nɔŋŋ.+ 15 Amɛbooo etaomɔ nii kɛ ekpaŋmɔ+ ni ekɛ amɛtsɛmɛi lɛ kpaŋ lɛ kɛ kaimɔi ni ekɛhã kɛbɔ amɛ kɔkɔ lɛ toi,+ ni amɛtee nɔ amɛjá nyɔŋmɔi* ni he bɛ sɛɛnamɔ lɛ,+ ni no hã amɛtsɔmɔ mɛi ni he bɛ sɛɛnamɔ,+ ni amɛkase jeŋmaji ni ebɔle amɛ ni Yehowa ewo amɛ kitã akɛ amɛkakase amɛ lɛ.+

16 Amɛyeee Yehowa, amɛ-Nyɔŋmɔ lɛ kitãi lɛ eko eko nɔ, ni amɛfee tsinabi dade amagai enyɔ+ kɛ wɔŋ tso,*+ ni amɛkoto ŋwɛi asraafoi lɛ fɛɛ,+ ni amɛsɔmɔ Baal hu.+ 17 Agbɛnɛ hu, amɛhã amɛbihii kɛ amɛbiyei tsɔ la mli,+ amɛkla,+ ni amɛbi nii,* ni amɛtswa amɛfai shi* akɛ amɛbaafee efɔŋ yɛ Yehowa hiɛ kɛwo emli la.

18 No hewɔ lɛ, Yehowa mli fu Israel waa, ni ejie amɛ kɛje ehiɛ.+ Ehãaa wekui lɛ ateŋ eko eko ashwɛ akɛ ja Yuda weku lɛ kɛkɛ.

19 Yuda weku lɛ hu eyayeee Yehowa, amɛ-Nyɔŋmɔ lɛ kitãi lɛ anɔ;+ amɛ hu amɛhi shi yɛ Israelbii lɛ akusumii lɛ anaa.+ 20 Yehowa kwa Israel seshibii lɛ fɛɛ ni eshwie amɛhiɛ shi, ni ekɛ amɛ wo nihalɔi adɛŋ kɛyashi eshɛrɛ amɛ eshwie kɛje ehiɛ. 21 Eshɔ̃ Israel yɛ David shĩa lɛ dɛŋ,* ni Israelbii lɛ wó Yeroboam, Nebat binuu lɛ maŋtsɛ.+ Shi Yeroboam hã Israel je Yehowa sɛɛ, ni ehã amɛfee esha kpele. 22 Ni Israelbii lɛ tee nɔ amɛfee eshai fɛɛ ni Yeroboam fee lɛ nɔŋŋ.*+ Amɛtsiii amɛhe kɛjeee eshai lɛ eko fɛɛ eko he 23 kɛyashi Yehowa jie Israel kɛje ehiɛ, tamɔ bɔ ni etsɔ etsuji gbalɔi lɛ fɛɛ anɔ egba lɛ pɛpɛɛpɛ.+ No hewɔ lɛ, aŋɔ Israelbii lɛ nom kɛje amɛshikpɔŋ lɛ nɔ kɛtee Asiria,+ he ni amɛyɔɔ kɛbashi ŋmɛnɛ lɛ.

24 Kɛkɛ ni Asiria maŋtsɛ lɛ yaloo mɛi kɛjɛ Babilon, kɛ Kuta, kɛ Ava, kɛ Hamat, kɛ Sefarvaim+ ni ekɛ amɛ ba koni amɛbahi Samaria maji lɛ amli yɛ Israelbii lɛ anajiaŋ; amɛkɛ Samaria fee amɛmaŋ, ni amɛhi emaji lɛ amli. 25 Be ni amɛbahi jɛmɛ klɛŋklɛŋ lɛ, no mli lɛ, amɛsheee Yehowa gbeyei.* No hewɔ lɛ, Yehowa hu tsu jatai kɛba amɛteŋ,+ ni jatai lɛ gbegbee amɛteŋ mɛi komɛi. 26 Ayabɔ Asiria maŋtsɛ lɛ amaniɛ akɛ: “Jeŋmaji lɛ ni oŋɔ amɛ nom ni ohã amɛyahi Samaria maji lɛ amli lɛ, amɛleee bɔ ni ajáa nakai shikpɔŋ lɛ nɔ Nyɔŋmɔ lɛ ahãa.* No hewɔ lɛ, etsuɔ jatai kɛyaa amɛteŋ, ni jatai lɛ gbeɔ amɛ, ejaakɛ amɛteŋ mɔ ko mɔ ko leee bɔ ni ajáa nakai shikpɔŋ lɛ nɔ Nyɔŋmɔ lɛ ahãa.”

27 Kɛkɛ ni Asiria maŋtsɛ lɛ fã amɛ akɛ: “Nyɛhãa osɔfoi ni nyɛyaŋɔ amɛ nom kɛjɛ jɛmɛ lɛ ateŋ mɔ kome aku esɛɛ eyahi jɛmɛ, ni etsɔɔ amɛ bɔ ni ajáa nakai shikpɔŋ lɛ nɔ Nyɔŋmɔ lɛ ahãa.” 28 No hewɔ lɛ, osɔfoi lɛ ni amɛŋɔ amɛ nom kɛjɛ Samaria lɛ ateŋ mɔ kome ku sɛɛ ebahi Betel,+ ni etsɔɔ amɛ bɔ ni ajáa Yehowa ahãa.*+

29 Shi jeŋmaŋ fɛɛ jeŋmaŋ fee lɛ diɛŋtsɛ enyɔŋmɔ,* ni amɛkɛwo jamɔhei ni Samariabii lɛ mamɔ yɛ hei grɔŋŋi lɛ anɔ lɛ amli; jeŋmaŋ lɛ eko fɛɛ eko fee nakai yɛ amɛmaji ni amɛyɔɔ mli lɛ amli. 30 No hewɔ lɛ, Babilonbii lɛ fee Sukot-benot he amaga, Kutbii lɛ hu fee Nergal he amaga, Hamatbii+ lɛ hu fee Ashima he amaga, 31 ni Avabii lɛ hu fee Nibhaz kɛ Tartak he amagai. Sefarvaimbii lɛ shãa amɛbihii yɛ la mli amɛhãa Adramelek kɛ Anamelek, ni ji Sefarvaimbii lɛ anyɔŋmɔi lɛ.+ 32 Eyɛ mli akɛ, amɛshe Yehowa gbeyei moŋ, shi amɛhole osɔfoi yɛ amɛmaŋbii lɛ ateŋ kɛhã hei grɔŋŋi lɛ, ni osɔfoi nɛɛ sɔmɔ amɛ yɛ jamɔhei ni yɔɔ hei grɔŋŋi lɛ anɔ lɛ.+ 33 No hewɔ lɛ, amɛshe Yehowa gbeyei, shi amɛjá amɛ diɛŋtsɛ amɛnyɔŋmɔi lɛ tamɔ bɔ ni jeŋmaji ni ayaŋɔ amɛ nom kɛjɛ jɛmɛ kɛba lɛ jáa amɛnyɔŋmɔi lɛ pɛpɛɛpɛ lɛ.+

34 Bɔ ni amɛjáa amɛnyɔŋmɔi lɛ yɛ jeŋmaji ni amɛjɛ mli lɛ amli lɛ, nakai nɔŋŋ amɛfeɔ yɛ Samaria kɛbashi ŋmɛnɛ. Amɛteŋ mɔ ko mɔ ko jáaa Yehowa,* ni amɛteŋ mɔ ko mɔ ko yeee emlai, kɛ eyiŋkpɛi* lɛ anɔ, ni amɛyeee Mla lɛ, kɛ kitãi lɛ ni Yehowa kɛhã Yakob bii lɛ hu anɔ; etsake Yakob gbɛ́i ni ewo lɛ Israel.+ 35 Be ni Yehowa kɛ Israel kpaŋ kpaŋmɔ lɛ,+ efã amɛ akɛ: “Nyɛkajáa nyɔŋmɔi krokomɛi,* nyɛkakotoa amɛ ni nyɛkasɔmɔa amɛ ni nyɛkashãa afɔle hu nyɛhãa amɛ.+ 36 Shi Yehowa, mɔ ni kpã enine mli ni ekɛ hewalɛ kpele wó nyɛ kɛje Ejipt shikpɔŋ lɛ nɔ lɛ,+ lɛ nyɛjáa,*+ ni lɛ nyɛkotoa, ni lɛ nɔŋŋ nyɛshãa afɔle nyɛhãa. 37 Nyɛkwɛa jogbaŋŋ ni nyɛyea taomɔ nii lɛ, kɛ yiŋkpɛi* lɛ, kɛ Mla lɛ, kɛ kitãi ni eŋma kɛhã nyɛ+ lɛ anɔ pɛpɛɛpɛ, ni nyɛkajáa nyɔŋmɔi krokomɛi. 38 Ni nyɛhiɛ akakpaa kpaŋmɔ ni mikɛ nyɛ kpaŋ lɛ nɔ,+ ni nyɛkajáa nyɔŋmɔi krokomɛi.* 39 Shi Yehowa, nyɛ-Nyɔŋmɔ lɛ pɛ nyɛjáa,* ejaakɛ lɛ ji mɔ ni baajie nyɛ kɛje nyɛhenyɛlɔi lɛ fɛɛ adɛŋ.”

40 Shi amɛbooo toi, moŋ lɛ, amɛtee nɔ amɛjá amɛnyɔŋmɔi lɛ tamɔ bɔ ni amɛjá amɛnyɔŋmɔi lɛ yɛ jeŋmaji ni amɛjɛ mli kɛba lɛ amli lɛ.+ 41 No hewɔ lɛ, jeŋmaji nɛɛ she Yehowa gbeyei,+ shi amɛtee nɔ amɛsɔmɔ amɛ diɛŋtsɛ amɛmagai lɛ hu. Amɛbii kɛ amɛnabii lɛ hu fee tamɔ bɔ ni amɛtsɛmɛi lɛ fee lɛ nɔŋŋ, ni amɛhiɛ mli nakai kɛbashi ŋmɛnɛ.