2 Maŋtsɛmɛi

20 Nakai gbii lɛ amli lɛ, hela mɔ Hezekia waa ni eehe egbo.+ Gbalɔ Yesaia, Amoz binuu lɛ bakɛɛ lɛ akɛ, “Nɔ ni Yehowa kɛɛ nɛ: ‘Too oshĩabii lɛ ahe gbɛjianɔ,* ejaakɛ obaagbo; onáŋ hewalɛ.’”+ 2 Kɛkɛ ni etsɔ ehiɛ ehã gbogbo lɛ ni esɔle ehã Yehowa akɛ: 3 “Ao, Yehowa, miikpa bo fai, ofainɛ ni okai bɔ ni minyiɛ yɛ ohiɛ yɛ anɔkwayeli mli, kɛ bɔ ni mikɛ mitsui muu fɛɛ hã bo, ni mifee nɔ ni ja yɛ ohiɛ lɛ.”+ Ni Hezekia fó waa.

4 Yesaia shɛko maŋtsɛ shĩa lɛ kpo lɛ teŋ ni Yehowa kɛ lɛ wie* akɛ:+ 5 “Kuu osɛɛ ni oyakɛɛ Hezekia, mimaŋ lɛ hiɛnyiɛlɔ lɛ akɛ, ‘Nɔ ni Yehowa, otsɛ David Nyɔŋmɔ lɛ kɛɛ nɛ: “Minu osɔlemɔ lɛ. Ni mina oyaafonui lɛ hu.+ Mibatsa bo.+ Yɛ gbi ni ji etɛ lɛ nɔ lɛ, obaakwɔ kɛya Yehowa shĩa lɛ.+ 6 Mikɛ afii 15 baagbe owala afii* lɛ ayi, ni majie bo kɛ maŋ nɛɛ kɛje Asiria maŋtsɛ lɛ dɛŋ,+ ni mafã maŋ nɛɛ he yɛ mi diɛŋtsɛ mihewɔ kɛ mitsulɔ David hu hewɔ.”’”+

7 Kɛkɛ ni Yesaia kɛɛ akɛ: “Nyɛkɛ agbami keeki* abaa.” No hewɔ lɛ, amɛkɛba ni amɛkɛbato asane lɛ nɔ, ni fiofio lɛ, Hezekia ná hewalɛ.+

8 No mli lɛ, Hezekia ebi Yesaia akɛ: “Mɛni ji okadi+ ni tsɔɔ akɛ Yehowa baatsa mi, ni makwɔ kɛya Yehowa shĩa lɛ yɛ gbi ni ji etɛ lɛ nɔ?” 9 Yesaia kɛɛ lɛ akɛ: “Okadi ni jɛ Yehowa ŋɔɔ koni okɛna akɛ nɔ ni Yehowa ewie lɛ baaba mli lɛ nɛ: Ani oosumɔ ni hɔɔŋ ni yɔɔ atrakpoi lɛ anɔ lɛ* aya hiɛ nanefaamɔi nyɔŋma, loo eba sɛɛ nanefaamɔi nyɔŋma?”+ 10 Hezekia kɛɛ akɛ: “Ewaaa akɛ hɔɔŋ lɛ baaya hiɛ nanefaamɔi nyɔŋma, shi ewa akɛ ebaaba sɛɛ nanefaamɔi nyɔŋma.” 11 No hewɔ lɛ, gbalɔ Yesaia bo etsɛ Yehowa, ni Nyɔŋmɔ hã hɔɔŋ lɛ ni yɔɔ Ahaz atrakpoi lɛ anɔ lɛ ba sɛɛ nanefaamɔi nyɔŋma, be ni no mli lɛ, hɔɔŋ lɛ ekpeleke shi yɛ atrakpoi lɛ anɔ momo lɛ.+

12 Nakai be lɛ mli lɛ, Babilon maŋtsɛ Berodak-baladan, Baladan binuu lɛ, ŋmala woji ni ekɛ woji lɛ kɛ nikeenii tsu ni akɛbahã Hezekia, ejaakɛ enu akɛ Hezekia náaa hewalɛ.+ 13 Hezekia here amɛ ni etsɔɔ amɛ enitoohe lɛ mli nii fɛɛ+—jwiɛtɛi lɛ, kɛ shika tsuru lɛ, kɛ balsam mu lɛ, kɛ mui kpakpai krokomɛi lɛ, kɛ etawuu nii lɛ, kɛ nɔ fɛɛ nɔ ni yɔɔ enitoohei lɛ. Nɔ ko nɔ ko bɛ ni yɔɔ Hezekia diɛŋtsɛ maŋtsɛ shĩa lɛ kɛ enɔyeli lɛ mli fɛɛ ni ekɛtsɔɔɔ amɛ.

14 No sɛɛ lɛ, gbalɔ Yesaia ba Maŋtsɛ Hezekia ŋɔɔ ebabi lɛ akɛ: “Nɛgbɛ hii nɛɛ jɛ, ni mɛni amɛkɛɛ?” Ni Hezekia kɛɛ akɛ: “Amɛjɛ he ko shɔŋŋ, amɛjɛ Babilon tɔ̃ɔ.”+ 15 No sɛɛ lɛ, Yesaia bi lɛ akɛ: “Mɛni amɛna yɛ omaŋtsɛ shĩa lɛ mli?” Hezekia kɛɛ lɛ akɛ: “Amɛna nɔ fɛɛ nɔ ni yɔɔ mimaŋtsɛ shĩa lɛ mli. Nɔ ko nɔ ko bɛ minitoohei lɛ ni mikɛtsɔɔɔ amɛ.”

16 Agbɛnɛ, Yesaia kɛɛ Hezekia akɛ: “Bo nɔ ni Yehowa kɛɛ lɛ toi,+ 17 ‘Naa! Gbii miiba, ni abaaloo nɔ fɛɛ nɔ ni yɔɔ omaŋtsɛ shĩa lɛ kɛ nɔ fɛɛ nɔ ni otsɛmɛi lɛ kɛto kɛbashi ŋmɛnɛ lɛ kɛya Babilon.+ Ashiŋ nɔ ko nɔ ko,’ Yehowa kɛɛ. 18 ‘Ni akɛ bo diɛŋtsɛ oseshibii* ni obaatsɔ amɛtsɛ lɛ hu baaya,+ ni amɛbaatsɔmɔ maŋtsɛ shĩa onukpai yɛ Babilon maŋtsɛ lɛ maŋtsɛ shĩa lɛ.’”+

19 Kɛkɛ ni Hezekia kɛɛ Yesaia akɛ: “Nɔ ni Yehowa etsɔ onɔ ewie lɛ ja.”+ Ni ewie kɛfata he akɛ: “Kɛ́ toiŋjɔlɛ kɛ shweshweeshwe shihilɛ* baahi shi yɛ miwala beiaŋ* lɛ, ehi.”+

20 Shi Hezekia shihilɛ mli saji krokomɛi fɛɛ, nibii wuji ni efee kɛ kpaakpo+ lɛ kɛ gɔɔta lɛ ni efee kɛ bɔ ni ekɛ nu ba maŋ lɛ mli+ lɛ, aŋmala yɛ Yuda maŋtsɛmɛi ayinɔsaji awolo lɛ mli. 21 Kɛkɛ ni Hezekia gbo;*+ ni ebinuu Manase+ baye maŋtsɛ yɛ esɛɛ.+