2 Kronika
33 Be ni Manase+ batsɔ maŋtsɛ lɛ, no mli lɛ, eye afii 12, ni eye nɔ afii 55 yɛ Yerusalem.+
2 Efee efɔŋ yɛ Yehowa hiɛ, efee nibii gbohii ni jeŋmaji ni Yehowa jie* amɛ kɛje Israelbii lɛ ahiɛ lɛ fee lɛ nɔŋŋ.+ 3 Emamɔ hei grɔŋŋi ni etsɛ Hezekia kumɔ eshwie shi lɛ ekoŋŋ,+ ni emamɔ afɔleshaa latɛi ehã Baal srɔtoi lɛ, ni efee wɔŋ tsei,* ni ekoto ŋwɛi asraafoi lɛ fɛɛ, ni esɔmɔ amɛ.+ 4 Emamɔ afɔleshaa latɛi hu yɛ Yehowa shĩa lɛ,+ shĩa ni Yehowa ewie yɛ he akɛ: “Yerusalem migbɛ́i baahi kɛya naanɔ” lɛ.+ 5 Ni emamɔ afɔleshaa latɛi ehã ŋwɛi asraafoi lɛ fɛɛ yɛ Yehowa shĩa lɛ kpoi enyɔ lɛ anɔ.+ 6 Ni ehã lɛ diɛŋtsɛ ebihii tsɔ la mli+ yɛ Hinom Binuu lɛ Jɔɔ lɛ mli;+ efee majik,+ ekla,* eye ŋkunyaa, ni ehã mɛi sɔmɔ akɛ mumɔi atsɛlɔi kɛ klamɔfoi.+ Efee efɔŋ kpele yɛ Yehowa hiɛ kɛwo emli la.
7 Ekɛ amaga ni egbɔ* lɛ yama anɔkwa Nyɔŋmɔ lɛ shĩa lɛ,+ shĩa ni Nyɔŋmɔ kɛɛ David kɛ ebinuu Solomon yɛ he akɛ: “Shĩa nɛɛ kɛ Yerusalem, ni ji he ni mihala yɛ Israel wekui lɛ fɛɛ ateŋ lɛ ji he ni migbɛ́i lɛ baahi kɛya naanɔ.+ 8 Ni kɛ́ Israelbii lɛ ye nibii fɛɛ ni mifã amɛ, ni ji Mla muu lɛ fɛɛ, kɛ taomɔ nii lɛ, kɛ yiŋkpɛi* lɛ ni atsɔ Mose nɔ akɛhã lɛ nɔ lɛ, mijieŋ amɛ* kɛjeŋ shikpɔŋ ni mikɛhã amɛtsɛmɛi lɛ nɔ dɔŋŋ.” 9 Manase tee nɔ elaka Yudabii lɛ kɛ Yerusalembii lɛ, ni ehã amɛfee efɔŋ kpele fe jeŋmaji ni Yehowa kpãtã amɛhiɛ kɛje Israelbii lɛ ahiɛ lɛ.+
10 Yehowa tee nɔ ekɛ Manase kɛ emaŋbii lɛ wie, shi amɛbooo toi.+ 11 No hewɔ lɛ, Yehowa hã Asiria maŋtsɛ lɛ tatsɛmɛi lɛ ba ni amɛkɛ amɛ bawu, ni amɛmɔ Manase kɛ kpoŋ* ni amɛwo lɛ akɔɔble gboklɛi enyɔ ni amɛkɛ lɛ tee Babilon. 12 Yɛ ehaomɔ lɛ mli lɛ, ekpa Yehowa, e-Nyɔŋmɔ lɛ fai koni ena lɛ mɔbɔ, ni etee nɔ eba ehe shi waa yɛ etsɛmɛi a-Nyɔŋmɔ lɛ hiɛ. 13 Etee nɔ esɔle ehã Nyɔŋmɔ, ni fai ni ekpa lɛ tsirɛ Nyɔŋmɔ ni ebo esɔlemɔ kɛhã mɔbɔnalɛ lɛ toi, ni eku sɛɛ ekɛ lɛ ba Yerusalem koni ebatsa emaŋtsɛyeli lɛ nɔ.+ Kɛkɛ ni Manase ná ele akɛ Yehowa ji anɔkwa Nyɔŋmɔ lɛ lɛɛlɛŋ.+
14 Enɛ sɛɛ lɛ, etswa gbogbo yɛ David Maŋ+ lɛ sɛɛ yɛ Gihon+ Nu lɛ ni yɔɔ jɔɔ* lɛ mli lɛ anaigbɛ, ni ekpã mli kɛtee Loo Agbó+ lɛ he, ni etsa nɔ etswa kɛbɔle kɛyashi Ofel,+ ni ehã ekwɔ waa. Agbɛnɛ hu, eto tatsɛmɛi yɛ Yuda maji ni atswa gbogboi awo amɛhe lɛ fɛɛ amli. 15 Kɛkɛ ni ejie maŋsɛɛ nyɔŋmɔi lɛ kɛ amaga lɛ kɛje Yehowa shĩa lɛ,+ ni ejie afɔleshaa latɛi ni emamɔ yɛ Yehowa shĩa lɛ gɔŋ lɛ nɔ+ lɛ kɛ Yerusalem lɛ, ni ehã ayashɛrɛ amɛ ashwie maŋ lɛ sɛɛ. 16 Esaa Yehowa afɔleshaa latɛ+ lɛ hu, ni ebɔi naanyobɔɔ afɔlei+ kɛ shidaa afɔlei+ shãa yɛ nɔ, ni ekɛɛ Yudabii lɛ akɛ amɛsɔmɔ Yehowa, Israel Nyɔŋmɔ lɛ. 17 Shi maŋbii lɛ tee nɔ amɛshã afɔlei yɛ hei grɔŋŋi lɛ lolo, shi Yehowa, amɛ-Nyɔŋmɔ lɛ, pɛ amɛshãa amɛhãa.
18 Shi Manase shihilɛ mli saji krokomɛi fɛɛ, sɔlemɔ ni esɔle ehã Nyɔŋmɔ, kɛ ninalɔi ni kɛ lɛ wie yɛ Yehowa, Israel Nyɔŋmɔ lɛ, gbɛ́i mli lɛ awiemɔi lɛ, aŋmala fɛɛ yɛ Israel maŋtsɛmɛi ayinɔsaji awolo lɛ mli. 19 Agbɛnɛ hu, sɔlemɔ ni esɔle+ kɛ bɔ ni ahã fai ni ekpa lɛ hetoo, kɛ eshai ni efee kɛ etɔmɔi lɛ fɛɛ,+ kɛ hei ni emamɔ hei grɔŋŋi yɛ kɛ hei ni ekɛ wɔŋ tsei*+ kɛ amagai lɛ mamɔ dani eba ehe shi lɛ, aŋmala fɛɛ yɛ eninalɔi lɛ awiemɔi lɛ amli. 20 Kɛkɛ ni Manase gbo* ni afu lɛ yɛ eshĩa lɛ; ni ebinuu Amon baye maŋtsɛ yɛ esɛɛ.+
21 Be ni Amon+ batsɔ maŋtsɛ lɛ, no mli lɛ eye afii 22, ni eye nɔ afii enyɔ yɛ Yerusalem.+ 22 Ni etee nɔ efee efɔŋ yɛ Yehowa hiɛ, tamɔ bɔ ni etsɛ Manase fee lɛ nɔŋŋ;+ ni Amon shã afɔlei ehã amagai ni etsɛ Manase fee lɛ fɛɛ,+ ni etee nɔ esɔmɔ amɛ. 23 Shi ebaaa ehe shi yɛ Yehowa hiɛ+ tamɔ bɔ ni etsɛ Manase ba ehe shi lɛ;+ shi moŋ lɛ, Amon fee efɔŋ babaoo. 24 Sɛɛ mli lɛ, etsuji lɛ kpaŋ eyi nɔ,+ ni amɛgbe lɛ yɛ lɛ diɛŋtsɛ eshĩa. 25 Shi shikpɔŋ lɛ nɔ bii lɛ gbe mɛi fɛɛ ni kpaŋ Maŋtsɛ Amon yi nɔ lɛ,+ ni amɛwó ebinuu Yosia+ maŋtsɛ yɛ esɛɛ.