2 Kronika

27 Be ni Yotam+ batsɔ maŋtsɛ lɛ, no mli lɛ, eye afii 25, ni eye nɔ afii 16 yɛ Yerusalem. Atsɛɔ emami Yerusha, Zadok biyoo lɛ.+ 2 Etee nɔ efee nɔ ni ja yɛ Yehowa hiɛ tamɔ bɔ ni etsɛ Uzia fee lɛ pɛpɛɛpɛ,+ shi lɛ lɛ, eyaaa Yehowa sɔlemɔ shĩa lɛ yɛ gbɛ ni esaaa nɔ.+ Shi maŋbii lɛ kã he amɛfee nibii fɔji. 3 Lɛ ji mɔ ni tswa Yehowa shĩa lɛ ŋwɛigbɛ* agbó lɛ,+ ni emamɔ nibii srɔtoi babaoo yɛ Ofel gbogbo lɛ nɔ.+ 4 Eto maji+ hu yɛ Yuda gɔji lɛ anɔ,+ ni eto hei ni atswa gbogboi awo he+ kɛ mɔji+ hu yɛ koi lɛ amli. 5 Ekɛ Amonbii lɛ amaŋtsɛ lɛ yawu,+ ni eye Amonbii lɛ anɔ kunim, no hewɔ lɛ, yɛ nakai afi lɛ mli lɛ, Amonbii lɛ hã lɛ jwiɛtɛi talɛntai* 100, kɛ wiiti kor* susumɔnii 10,000, kɛ barle* kor susumɔnii 10,000. Amonbii lɛ kɛ nibii nɛɛ bahã lɛ yɛ afi ni ji enyɔ lɛ kɛ afi ni ji etɛ lɛ hu mli.+ 6 No hewɔ lɛ, Yotam tee nɔ ená hewalɛ, ejaakɛ etswa efai shi akɛ ebaafee nɔ ni ja* yɛ Yehowa, e-Nyɔŋmɔ lɛ hiɛ.

7 Yotam shihilɛ mli saji krokomɛi fɛɛ, tai fɛɛ ni ewu kɛ nibii fɛɛ ni efee lɛ,* aŋmala yɛ Israel Maŋtsɛmɛi Awolo lɛ kɛ Yuda Maŋtsɛmɛi Awolo lɛ mli.+ 8 Be ni ebatsɔ maŋtsɛ lɛ, no mli lɛ, eye afii 25, ni eye nɔ afii 16 yɛ Yerusalem.+ 9 Kɛkɛ ni Yotam gbo* ni afu lɛ yɛ etsɛmɛi lɛ amasɛi yɛ etsɛ David Maŋ+ lɛ mli. Ni ebinuu Ahaz baye maŋtsɛ yɛ esɛɛ.+