Abaajie Gbɔmɔ Bi lɛ Kpo

Eeenyɛ efee akɛ Yesu yɛ Samaria loo Galilea kpokpaa lɛ nɔ lolo. Farisifoi lɛ susuɔ akɛ Maŋtsɛyeli lɛ baaba yɛ gbɛ ni yɔɔ sokoo nɔ, no hewɔ lɛ, amɛbi Yesu be ni Maŋtsɛyeli lɛ baaba. Shi ekɛɛ amɛ akɛ: “Nyɔŋmɔ Maŋtsɛyeli lɛ baŋ bɔ ni abaana lɛ faŋŋ; asaŋ mɛi ekɛŋ akɛ, ‘Kwɛmɔ biɛ!’ loo, ‘Jɛmɛ!’ Ejaakɛ naa! Nyɔŋmɔ Maŋtsɛyeli lɛ yɛ nyɛteŋ.”​—Luka 17:20, 21.

Mɛi komɛi baasusu akɛ Yesu miitsɔɔ akɛ Maŋtsɛyeli lɛ yɛ Nyɔŋmɔ tsuji lɛ atsuii amli. Shi enɛ nyɛŋ afee anɔkwale ejaakɛ Maŋtsɛyeli lɛ bɛ Farisifoi ni Yesu kɛwieɔ lɛ atsuii amli. Kɛ̃lɛ, eyɛ amɛteŋ ejaakɛ Yesu, ni ji mɔ ni Nyɔŋmɔ ehala akɛ Maŋtsɛ yɛ Nyɔŋmɔ Maŋtsɛyeli lɛ mli lɛ yɛ amɛteŋ yɛ nakai beiaŋ.​—Mateo 21:5.

Ekã shi faŋŋ akɛ, be ni Farisifoi lɛ shi sɛɛ lɛ, Yesu tsɔɔ ekaselɔi lɛ saji krokomɛi ni kɔɔ be ni Maŋtsɛyeli lɛ baaba lɛ he. Shi etsɔ hiɛ ebɔ amɛ kɔkɔ yɛ be ni ebaaye nɔ akɛ Maŋtsɛ lɛ he, akɛ: “Gbii baaba ni nyɛbaashwe akɛ nyɛna gbɔmɔ Bi lɛ gbii lɛ ekome, shi nyɛnaŋ.” (Luka 17:22) Yesu miitsɔɔ akɛ, gbɔmɔ Bi lɛ baaye maŋtsɛ wɔsɛɛ. Dani nakai be lɛ baashɛ lɛ, kaselɔi lɛ ekomɛi baahao amɛhe waa yɛ be nɛɛ he, shi ehe baahia ni amɛmɛ kɛyashi be ni Nyɔŋmɔ eto kɛhã gbɔmɔ Bi lɛ baashɛ.

Yesu tsa nɔ akɛ: “Mɛi baakɛɛ nyɛ akɛ, ‘Kwɛmɔ jɛmɛ!’ aloo, ‘Kwɛmɔ biɛ!’ Nyɛkajea kpo aloo nyɛkanyiɛa amɛsɛɛ. Ejaakɛ bɔ ni sarawai gbalaa kɛjɛɔ ŋwɛi shishi afã kome kɛyaa ŋwɛi shishi afã kroko lɛ, nakai nɔŋŋ gbɔmɔ Bi lɛ baatamɔ yɛ egbi lɛ nɔ.” (Luka 17:23, 24) Mɛni baaye abua Yesu kaselɔi koni amɛkayanyiɛ amale mesia srɔtoi asɛɛ? Yesu tsɔɔ akɛ, anɔkwa Mesia lɛ baa lɛ baafee tamɔ bɔ ni sarawai gbalaa kɛjɛɔ ŋwɛi shishi afã kome kɛyaa afã kroko lɛ. Ni tsɔɔ akɛ, mɛi ni hiɛ yɔɔ amɛhe nɔ lɛ baana faŋŋ akɛ eeye nɔ akɛ Maŋtsɛ.

Kɛkɛ ni Yesu kɛ bɔ ni mɛi baafee amɛnii yɛ nakai beiaŋ lɛ to bɔ ni mɛi fee amɛnii yɛ blema lɛ he ekɛɛ: “Taakɛ eba lɛ yɛ Noa gbii lɛ amli lɛ, nakai nɔŋŋ ebaaba lɛ yɛ gbɔmɔ Bi lɛ gbii lɛ hu amli . . . Asaŋ taakɛ eba lɛ yɛ Lot gbii lɛ amli lɛ: amɛmiiyeyee nii, amɛmiinunuu nii, amɛmiihéhée nii, amɛmiihɔ̃ɔhɔ̃ɔ nii, amɛmiitɛtɛo nii, ni amɛmiimamɔmamɔɔ tsũi. Shi gbi nɔ ni Lot je Sodom lɛ, la kɛ sɔlfa nɛ kɛjɛ ŋwɛi ni ekpãtã amɛ fɛɛ amɛhiɛ. Nakai nɔŋŋ ebaaba lɛ yɛ nakai gbi lɛ nɔ, be ni abaajie gbɔmɔ Bi lɛ kpo lɛ.”​—Luka 17:26-30.

Yesu etsɔɔɔ akɛ niyeli, ninumɔ, nihémɔ, nihɔ̃ɔmɔ, nitɛomɔ, kɛ tsumaa ni mɛi ni hi shi yɛ Noa kɛ Lot gbii lɛ amli lɛ kɛ amɛhe wo mli lɛ hewɔ ni akpãtã amɛhiɛ lɛ. Noa kɛ Lot kɛ amɛwekui lɛ fee nibii nɛɛ ekomɛi. Shi mɛi krokomɛi lɛ hã nibii nɛɛ he amɛjwɛŋmɔ fɛɛ ni amɛfeee nɔ ni Nyɔŋmɔ bi ni amɛfee yɛ nakai beiaŋ lɛ. No hewɔ lɛ, Yesu miibɔ ekaselɔi lɛ kɔkɔ koni amɛle nɔ ni Nyɔŋmɔ sumɔɔ ni amɛfee lɛ, ni amɛfee hu. No hewɔ lɛ, Yesu miitsɔɔ amɛ nɔ ni esa akɛ amɛfee koni Nyɔŋmɔ akakpãtã amɛhiɛ wɔsɛɛ.

Ehe miihia ni kaselɔi lɛ ahiɛ ahi amɛhe nɔ koni je lɛŋ nibii ni ji ‘nibii ni amɛshi yɛ sɛɛ lɛ’ akahe amɛjwɛŋmɔ. Yesu kɛɛ akɛ: “Nakai gbi lɛ nɔ lɛ, mɔ ni yɔɔ tsũ yiteŋ ni enibii yɔɔ shĩa lɛ akakpeleke shi eyakɔlɔ nibii nɛɛ, ni asaŋ mɔ ni yɔɔ ŋmɔ mli lɛ, esaaa akɛ ekuɔ esɛɛ kɛyaa nibii ni eshi yɛ sɛɛ lɛ ahe. Nyɛkaia Lot ŋa lɛ.” (Luka 17:31, 32) Etsɔ ŋoo kpɔ.

Yesu tsa nɔ ni etsɔɔ ekaselɔi lɛ bɔ ni nibii baaji ahã be ni gbɔmɔ Bi lɛ baaye nɔ akɛ Maŋtsɛ lɛ, ekɛɛ: “Nakai nyɔɔŋ lɛ mli lɛ, mɛi enyɔ baakã saa kome nɔ; abaaŋɔ mɔ kome kɛya, shi abaashi mɔ kroko lɛ.” (Luka 17:34) Enɛ tsɔɔ akɛ abaahere mɛi komɛi ayiwala, ni abaakpãtã mɛi komɛi hu ahiɛ.

Kaselɔi lɛ bi lɛ akɛ: “Nuŋtsɔ, nɛgbɛ?” Yesu kɛɛ amɛ akɛ: “He ni gbonyo kã lɛ, jɛmɛ nɔŋŋ hu okropɔŋi baabua amɛhe naa yɛ.” (Luka 17:37) Ni tsɔɔ akɛ, mɛi komɛi baana nii kɛya shɔŋŋ tamɔ okropɔŋ. Kaselɔi lɛ baabua amɛhe naa kɛbɔle anɔkwa Kristo lɛ, ni ji gbɔmɔ Bi lɛ. Nakai beiaŋ lɛ, Yesu baatsɔɔ ekaselɔi lɛ anɔkwalei ni baahã ahere mɛi ni yɔɔ hemɔkɛyeli lɛ ayiwala.