Tsɔ Hiɛ Oto Gbɛjianɔ​—Okɛ Hiɛshikamɔ Atsu Nii

Esa akɛ bi ni laaje lɛ he nɔkwɛmɔnɔ ni Yesu gba etsɛko lɛ ahã toohelɔi, woloŋmalɔi, kɛ Farisifoi ni boɔ lɛ toi lɛ ana akɛ Nyɔŋmɔ miisumɔ ni ekɛ efɔŋfeelɔi ni etsake amɛtsui lɛ ahe afa amɛ. (Luka 15:1-7, 11) Amrɔ nɛɛ Yesu kɛ ekaselɔi lɛ miiwie. Ekɛ nɔkwɛmɔnɔ kroko tsu nii, ni yɛ nɔkwɛmɔnɔ nɛɛ mli lɛ, nuu niiatsɛ ko ná ele akɛ eshĩa nɔkwɛlɔ lɛ yeee lɛ anɔkwa.

Yesu gba akɛ awie shĩa nɔkwɛlɔ lɛ he atsɔɔ enuŋtsɔ lɛ akɛ eekpãtã enuŋtsɔ lɛ nibii ahiɛ. No hewɔ lɛ, shĩa nɔkwɛlɔ lɛ nuŋtsɔ lɛ kɛɛ ebaahã ekpa nitsumɔ lɛ. Ni shĩa nɔkwɛlɔ lɛ kɛ ehe wie ekɛɛ: “Mɛni mafee, akɛni minuŋtsɔ miihe shĩa nɔkwɛmɔ nitsumɔ lɛ yɛ midɛŋ nɛɛ? Mihe waaa bɔ ni manyɛ shi matsa, ni eefee mi hiɛgbele akɛ maba nii.” Bɔ ni afee ni enyɛ etsu shihilɛ lɛ he nii lɛ, emu sane naa akɛ: “Mile nɔ ni mafee, koni kɛ́ ahe shĩa nɔkwɛmɔ nitsumɔ lɛ yɛ midɛŋ lɛ, mɛi ahere mi yɛ amɛshĩai.” Kɛkɛ ni etsɛ mɛi ni hiɛ enuŋtsɔ lɛ nyɔji lɛ, ni ebi amɛteŋ mɔ fɛɛ mɔ akɛ: “Nyɔmɔ enyiɛ ohiɛ minuŋtsɔ lɛ?”​—Luka 16:3-5.

Klɛŋklɛŋ mɔ lɛ hã hetoo akɛ: “Oliv mu ni falɛ shɛɔ susumɔnii oha.” Aaafee mu galɔŋi 580. Eeenyɛ efee akɛ mɔ ni hiɛ nyɔmɔ lɛ yɛ oliv ŋmɔ agbo loo ehɔɔ mu. Shĩa nɔkwɛlɔ lɛ kɛɛ lɛ akɛ: “Hemɔ ogbeekpamɔ wolo lɛ, ta shi ni oŋma nyɔŋmai enumɔ [galɔŋi 290] mramra.”​—Luka 16:6.

Shĩa nɔkwɛlɔ lɛ bi mɔ kroko akɛ: “Bo hu, nyɔmɔ enyiɛ ohiɛ?” Ehã hetoo akɛ: “Ŋmaa ni falɛ shɛɔ susumɔnii agboi oha.” Shĩa nɔkwɛlɔ lɛ kɛɛ mɔ ni hiɛ nyɔmɔ lɛ akɛ: “Hemɔ ogbeekpamɔ wolo lɛ ni oŋma nyɔŋmai kpaanyɔ.” Egbɔ nyɔmɔ lɛ nɔ oha mlijaa nyɔŋmai enyɔ.​—Luka 16:7.

Akɛni shĩa nɔkwɛlɔ lɛ miikwɛ enuŋtsɔ lɛ nibii lɛ anɔ lolo hewɔ lɛ, ebaanyɛ etse nyɔji ni mɛi hiɛ enuŋtsɔ lɛ nɔ, ejaakɛ eyɛ nakai hegbɛ lɛ. Nyɔji nɛɛ ni shĩa nɔkwɛlɔ lɛ tseɔ nɔ lɛ baahã mɛi ni hiɛ nyɔji lɛ abatsɔmɔ enanemɛi, ni mɛi nɛɛ baanyɛ afee lɛ ejurɔ kɛ́ enitsumɔ lɛ ŋmɛɛ lɛ.

Nuŋtsɔ lɛ na le nɔ ni shĩa nɔkwɛlɔ lɛ efee lɛ. Eyɛ mli akɛ nɔ ni eshĩa nɔkwɛlɔ lɛ efee lɛ baahã ebɔ nyɔmɔ moŋ, shi ehiɛ sɔ nɔ ni shĩa nɔkwɛlɔ lɛ fee lɛ ni ejie eyi ejaakɛ “eyɛ mli akɛ shĩa nɔkwɛlɔ lɛ efeee nɔ ni ja moŋ,” shi “ekɛ hiɛshikamɔ ni sa tsu nii.” Yesu kɛshi sɛɛ akɛ: “Shihilɛ gbɛjianɔtoo nɛɛ bii lɛ kɛ hiɛshikamɔ ni sa tsuɔ nii yɛ bɔ ni amɛkɛ amɛ diɛŋtsɛ amɛyinɔbii lɛ yeɔ hãa lɛ mli fe la bii lɛ.”​—Luka 16:8.

Nɔ ni Yesu wie nɛɛ etsɔɔɔ akɛ eejie gbɛ ni shĩa nɔkwɛlɔ lɛ tsɔ etsu sane lɛ he nii lɛ yi loo akɛ eewo juu-kɛ-fɔ̃ he hewalɛ. Belɛ, mɛni etsɔɔ mɔ? Ewo ekaselɔi lɛ ŋaa akɛ: “Nyɛkɛ ninámɔ ni ejaaa lɛ atsua nii kɛfea nanemɛi nyɛhãa nyɛhe koni kɛ́ etã lɛ, nanemɛi nɛɛ ahere nyɛ kɛya naanɔ shihilɛhei lɛ.” (Luka 16:9) Wɔbaanyɛ wɔkase nɔ ko yɛ enɛ mli yɛ bɔ ni esa akɛ wɔkwɛ nii kɛya shɔŋŋ kɛ bɔ ni esa akɛ wɔkɛ hiɛshikamɔ atsu nii lɛ he. Esa akɛ Nyɔŋmɔ tsuji ni ji “la bii lɛ” kɛ amɛheloonaa nibii atsu nii kɛ hiɛshikamɔ, koni ehã amɛná naanɔ wala wɔsɛɛ.

Yehowa Nyɔŋmɔ kɛ e-Bi lɛ pɛ baanyɛ ahere mɔ ko kɛya ŋwɛi Maŋtsɛyeli lɛ mli loo amɛhã ehi shikpɔŋ ni Maŋtsɛyeli lɛ baahã etsɔ paradeiso lɛ nɔ. Esa akɛ wɔkɛ wɔheloonaa nibii aye abua Maŋtsɛyeli lɛ nitsumɔ lɛ koni no ahã wɔtsɔmɔ amɛnanemɛi. Kɛkɛ lɛ, no lɛ kɛ́ shika tsuru, jwiɛtɛi, kɛ heloonaa nibii lɛ tã lɛ, wɔná nɔmimaa akɛ wɔbaaná naanɔ wala wɔsɛɛ.

Yesu wie hu akɛ, mɛi ni yeɔ anɔkwa yɛ bɔ ni amɛkɛ amɛninámɔ loo amɛheloonaa nibii tsuɔ nii amɛhãa lɛ mli lɛ baaye anɔkwa hu yɛ nibii ni he hiaa fe nomɛi lɛ amli. Yesu kɛɛ akɛ: “No hewɔ lɛ, kɛ́ nyɛhãko ana akɛ anɔkwafoi ji nyɛ yɛ ninámɔ ni ejaaa lɛ gbɛfaŋ lɛ, namɔ baatu nɔ ni ji anɔkwa ninámɔ lɛ [tamɔ Maŋtsɛyeli lɛ he nibii lɛ nɛkɛ] ewo nyɛdɛŋ?”​—Luka 16:11.

Yesu miitsɔɔ ekaselɔi lɛ nɔ ni akpaa gbɛ ni amɛfee bɔ ni afee ni ahere amɛ “kɛya naanɔ shihilɛhei lɛ.” Mɔ ko nyɛŋ ekɛ anɔkwayeli asɔmɔ Nyɔŋmɔ ni nakai beiaŋ nɔŋŋ lɛ, eji ninámɔ ni ejaaa lɛ, ni ji heloonaa nibii, nyɔŋ. Yesu mu sane lɛ naa akɛ: “Tsulɔ ko nyɛŋ atsɔ nyɔŋ ehã nuŋtsɔmɛi enyɔ, ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.”​—Luka 16:9, 13.