Nyɔŋ Ko Bo Nyɔŋmɔ Toi

Yosef ji Yakob bihii bibii lɛ ateŋ mɔ kome. Yakob sumɔɔ esane fe ebii krokomɛi lɛ fɛɛ. Be ni enyɛmimɛi hii ni ye lɛ onukpa lɛ na nakai lɛ, ani ole bɔ ni amɛnu he amɛhã? Amɛye ehe awuŋa ni amɛnyɛ lɛ. Be ko lɛ, Yosef la lamɔi komɛi ni yɔɔ naakpɛɛ, ni egba enyɛmimɛi hii lɛ. Lamɔi lɛ hã amɛna akɛ, gbi ko lɛ, amɛbaakula shi yɛ ehiɛ. No hewɔ lɛ, amɛnyɛ lɛ waa fe tsutsu lɛ po!

Gbi ko be ni Yosef nyɛmimɛi lɛ kwɛɔ gwantɛŋi yɛ maŋ ko ni atsɛɔ lɛ Shekem lɛ masɛi lɛ, Yakob tsu Yosef ni eyakwɛ kɛji amɛyɛ jogbaŋŋ. Be ni Yosef baa yɛ shɔŋŋ lɛ, enyɛmimɛi lɛ na lɛ, ni amɛwie akɛ: ‘Naa! lamɔiatsɛ lɛ baa lɛ. Nyɛbaa ni wɔgbea lɛ!’ No hewɔ lɛ, amɛmɔ lɛ ni amɛshɛ lɛ amɛwo bu ko ni mli kwɔ mli. Shi enyɛmimɛi lɛ ateŋ mɔ kome ni atsɛɔ lɛ Yuda lɛ wie akɛ: ‘Nyɛkahãa wɔgbea lɛ! Nyɛhãa wɔhɔ̃a lɛ akɛ nyɔŋ.’ No hewɔ lɛ, amɛhɔ̃ɔ Yosef amɛhã Midianbii komɛi ni miiya Ejipt. Amɛhɔ̃ɔ lɛ amɛhe jwiɛtɛi kukuji 20.

No sɛɛ lɛ, Yosef nyɛmimɛi lɛ kɛ etade lɛ wo abotia lá mli, ni amɛjie amɛkɛyatsɔɔ amɛpapa. Kɛkɛ ni amɛbi lɛ akɛ: ‘Ani jeee obi lɛ atade lɛ nɛ?’ Nɔ ni amɛfee lɛ hã Yakob yasusu akɛ kooloo awuiyelɔ ko egbe Yosef. Sane lɛ dɔ lɛ waa, ni efó aahu.

Be ni akɛ Yosef tee Ejipt lɛ, ahɔ̃ɔ lɛ akɛ nyɔŋ ahã nuu ko ni abuɔ lɛ waa ni atsɛɔ lɛ Potifar. Shi Yehowa kwaaa Yosef. Potifar na akɛ Yosef bɔɔ mɔdɛŋ waa yɛ nitsumɔ ni ahã lɛ lɛ mli, ni ebaanyɛ ehe lɛ eye. No hewɔ lɛ, eyeee be ko ni akɛ nibii fɛɛ ni Potifar yɔɔ lɛ wo Yosef dɛŋ akɛ ekwɛ nɔ.

Potifar ŋa lɛ na akɛ Yosef he yɛ fɛo ni ehe wa. No hewɔ lɛ, daa gbi lɛ, ekɛɔ Yosef akɛ eba ni ekɛ lɛ abawɔ. Shi, ani ole nɔ ni Yosef fee? Ekpɛlɛɛɛ nɔ. Ekɛɛ Potifar ŋa lɛ akɛ: ‘Dabi! Nɔ ni otaoɔ ni mafee lɛ ehiii. Minuŋtsɔ lɛ heɔ mi eyeɔ, ni eŋa ji bo. Kɛ́ mikɛ bo wɔ lɛ, mifee esha yɛ Nyɔŋmɔ hiɛ!’

Gbi ko lɛ, Potifar ŋa lɛ kpɛ eyiŋ akɛ ebaanyɛ Yosef nɔ ni ekɛ lɛ awɔ. No hewɔ lɛ, emɔ Yosef atade lɛ mli waa ni egbala lɛ akɛ ekɛ lɛ abawɔ, shi Yosef jo foi. Be ni Potifar ba shĩa lɛ, eŋa lɛ kɛɛ lɛ akɛ kulɛ, Yosef miitao ekɛ lɛ awɔ. Potifar he amale nɛɛ eye. Emli fu waa, ni ehã awo Yosef tsuŋ. Shi Yehowa kwaaa Yosef be ni awo lɛ tsuŋ lɛ po.