Nyɔŋmɔ Bɔ Ŋwɛi Kɛ Shikpɔŋ

Yehowa Nyɔŋmɔ ji Mɔ ni bɔ wɔ. Lɛ ebɔ nibii fɛɛ. Nibii ni ebɔ lɛ ekomɛi yɛ ni wɔnaa, shi ekomɛi hu yɛ ni wɔnaaa. Ebɔ ŋwɛibɔfoi babaoo dani ebɔ nibii ni wɔkɛ wɔhiŋmɛi naa lɛ. Ani ole mɛi ni ŋwɛibɔfoi ji? Amɛji Yehowa tsuji, ni amɛsu tamɔ lɛ nɔŋŋ. Wɔnyɛŋ wɔna amɛ, tamɔ bɔ ni wɔnyɛŋ wɔna Nyɔŋmɔ lɛ nɔŋŋ. Klɛŋklɛŋ ŋwɛibɔfo ni Yehowa bɔ lɛ ye ebua lɛ. Eye ebua lɛ be ni ebɔɔ ŋulamii lɛ, shibɔlemɔ ŋulamii lɛ, kɛ nibii krokomɛi fɛɛ. Yehowa ehã wɔ shibɔlemɔ ŋulami fɛfɛo kome ni wɔhi nɔ. No ji shikpɔŋ lɛ.

Yehowa saa shikpɔŋ lɛ nɔ fɛfɛo koni gbɔmɛi kɛ kooloi ahi nɔ. Ehã hulu lɛ kpɛ shikpɔŋ lɛ nɔ, ni ebɔ gɔji, ŋshɔ, kɛ fai.

No sɛɛ lɛ, ole nɔ ni ba? Yehowa kɛɛ: ‘Mafee jwɛi kɛ tsei.’ Aduawai, fɔfɔii, kɛ nibii tamɔ ameo, shitɔ, sabolai, kɛ amɛhenɔi lɛ bɔi baa. Kɛkɛ ni Yehowa bɔ kooloi lɛ fɛɛ​—kooloi ni flikiɔ yɛ ŋwɛi, ŋshɔŋloi, kooloi ni kɛ amɛniji kɛ amɛnaji fɛɛ nyiɛɔ, kɛ ekrokomɛi lɛ fɛɛ. Ebɔ kooloi bibii tamɔ wuɔi, kɛ kooloi agboi tamɔ shwuɔ. Mɛɛ kooloo osumɔɔ waa?

No sɛɛ lɛ, Yehowa kɛɛ klɛŋklɛŋ ŋwɛibɔfo lɛ akɛ: “Hã wɔfee gbɔmɔ.” Esoro gbɔmɛi yɛ kooloi ahe. Gbɔmɛi nyɛɔ amɛkɛ amɛniji kɛ amɛjwɛŋmɔ feɔ nibii srɔtoisrɔtoi. Amɛnyɛɔ amɛwieɔ, amɛŋmɔɔ, ni amɛsɔleɔ. Nyɔŋmɔ bɔ gbɔmɛi koni amɛkwɛ shikpɔŋ lɛ kɛ kooloi lɛ anɔ. Ani ole klɛŋklɛŋ gbɔmɔ ni Yehowa bɔ lɛ? Hã wɔkwɛ.