Bɔ Ni Wɔbaafee Wɔsɔle Jogbaŋŋ Ni Yehowa Aná He Miishɛɛ

1. Mɛni Yehowa miisumɔ ni mɛi fɛɛ ni jáa lɛ lɛ afee? (Kwɛmɔ mfoniri lɛ hu.)

NAMƆ ŋɔɔ wɔbaanyɛ wɔya kɛ́ wɔmiitao mɔ ko ashɛje wɔmii loo wɔmiitao gbɛtsɔɔmɔ? Hetoo lɛ yɛ faŋŋ. Wɔbaanyɛ wɔya Yehowa ŋɔɔ yɛ sɔlemɔ mli, ni ewoɔ wɔ hewalɛ ni wɔfee nakai. Yehowa miisumɔ ni wɔsɔle wɔhã lɛ ‘daa ni wɔkakpa.’ (1 Tes. 5:17) Wɔbaanyɛ wɔya ehiɛ yɛ sɔlemɔ mli be fɛɛ be, ni wɔbi lɛ ni eye ebua wɔ yɛ shihilɛ fɛɛ shihilɛ mli. (Abɛi 3:5, 6) Yehowa mli hi, no hewɔ lɛ, ekɛɛ wɔsɔle wɔhã lɛ shii abɔ fɛɛ ni wɔsumɔɔ.

2. Mɛni he wɔbaasusu yɛ nikasemɔ nɛɛ mli?

² Wɔhiɛ sɔɔ hegbɛ kpele ni Yehowa ehã wɔ akɛ wɔsɔle wɔhã lɛ lɛ waa. Shi akɛni wɔyɛ nibii pii feemɔ hewɔ lɛ, bei komɛi lɛ, ebaanyɛ ewa kɛhã wɔ akɛ wɔbaaná dekã ni wɔkɛsɔle. Agbɛnɛ hu, ekolɛ wɔmiina akɛ esa akɛ wɔsɔle jogbaŋŋ fe bɔ ni wɔfeɔ bianɛ lɛ. Miishɛɛ sane ji, saji pii yɛ Biblia lɛ mli ni baanyɛ aye abua wɔ ni wɔtsu naagbai nɛɛ ahe nii. Yɛ nikasemɔ nɛɛ mli lɛ, wɔbaana akɛ Yesu to be ni ekɛsɔleɔ, ni wɔbaana bɔ ni wɔbaafee wɔkase lɛ. Agbɛnɛ hu, wɔbaasusu nibii enumɔ ni he hiaa waa ni wɔbaanyɛ wɔwie he yɛ wɔsɔlemɔi amli koni wɔsɔlemɔi lɛ afee nɔ ni sa jogbaŋŋ lɛ ahe.

YESU TO BE NI EKƐSƆLEƆ

3. Mɛni Yesu le yɛ sɔlemɔ he?

³ Yesu le akɛ, Yehowa shwɛɛɛ wɔsɔlemɔi ahe kwraa. Be ni eyɔɔ ŋwɛi lɛ, ena bɔ ni e-Tsɛ lɛ hã etsuji anɔkwafoi asɔlemɔi ahetoo. Akɛ nɔkwɛmɔnɔ lɛ, be ni e-Tsɛ lɛ hã Hana, David, Elia, kɛ mɛi krokomɛi asɔlemɔi hetoo lɛ, no mli lɛ eyɛ jɛmɛ. (1 Sam. 1:10, 11, 20; 1 Maŋ. 19:4-6; Lala 32:5) Enɛ hewɔ Yesu tsɔɔ ekaselɔi lɛ akɛ amɛfɔ sɔlemɔ ni amɛhe amɛye akɛ Yehowa baabo amɛ toi lɛ.​—Mat. 7:7-11.

4. Mɛɛ nɔkwɛmɔnɔ Yesu fee yɛ sɔlemɔ he?

⁴ Yesu diɛŋtsɛ sɔle ehã Yehowa ni ekɛ no fee nɔkwɛmɔnɔ ehã ekaselɔi lɛ. Esɔle shii abɔ be ni etsuɔ esɔɔmɔ nitsumɔ lɛ. Shi akɛni bei pii lɛ ebɛ dekã kwraa ni mɛi babaoo baa eŋɔɔ hewɔ lɛ, ehe bahia ni eto be ni ekɛsɔle. (Mar. 6:31, 45, 46) Be ko lɛ, ete shi leebi maŋkpa koni ená be ni ekome ekɛ Yehowa agba sane. (Mar. 1:35) Be ko be ni eyaakpɛ yiŋ ko ni he hiaa waa lɛ, esɔle nyɔɔŋ muu fɛɛ. (Luka 6:12, 13) Agbɛnɛ hu, gbi gbɛkɛ ni enɔ jetsɛremɔ lɛ abaagbe lɛ lɛ, esɔle shii abɔ nakai nyɔɔŋ lɛ mli koni enyɛ etsu yiŋtoi ahewɔ ni eba shikpɔŋ lɛ nɔ lɛ ateŋ nɔ ni wa fe fɛɛ lɛ he nii.​—Mat. 26:39, 42, 44.

5. Mɛɛ gbɛ nɔ wɔbaanyɛ wɔkase Yesu?

⁵ Nɔ ni Yesu fee lɛ hãa wɔnaa akɛ, kɛ́ wɔdekã faaa po lɛ, esa akɛ wɔto be ni wɔkɛsɔle. Tamɔ bɔ ni Yesu fee lɛ, wɔbaanyɛ wɔte shi leebi mra ni wɔsɔle loo wɔsɔle gbɛkɛ mli be ni jeŋ ejɔ fioo. Kɛ́ wɔfee nakai lɛ, ebaahã Yehowa ana akɛ wɔhiɛ sɔɔ hegbɛ ni wɔná akɛ wɔbaasɔle wɔhã lɛ lɛ. Nyɛmi yoo ko ni atsɛɔ lɛ Lynne lɛ kaiɔ akɛ, klɛŋklɛŋ be ni ahã ele akɛ ebaanyɛ esɔle lɛ, eta etsuiŋ waa. Ewie akɛ: “Be ni mikase akɛ manyɛ mikɛ Yehowa awie be fɛɛ be lɛ, no hã mina Yehowa akɛ mi-Naanyo kpaakpa, ni mishwe waa akɛ masɔle jogbaŋŋ mahã lɛ.” Ŋwanejee ko bɛ he akɛ, nakai nɔŋŋ wɔteŋ mɛi babaoo nuɔ he. No hewɔ lɛ, nyɛhãa wɔkwɛa nibii enumɔ ni he hiaa waa ni wɔbaanyɛ wɔwie he yɛ wɔsɔlemɔi amli.

NIBII ENUMƆ NI HE HIAA WAA NI WƆBAANYƐ WƆWIE HE YƐ WƆSƆLEMƆI AMLI

6. Yɛ nɔ ni awie yɛ Kpojiemɔ 4:10, 11 lɛ naa lɛ, mɛni sa Yehowa?

⁶ Jiemɔ Yehowa yi. Yɛ ninaa ko ni Yehowa jie kpo etsɔɔ bɔfo Yohane lɛ mli lɛ, ena onukpai 24 yɛ ŋwɛi ni amɛmiijá Yehowa. Amɛjie Yehowa yi, ni amɛwie akɛ lɛ ji mɔ ni sa akɛ akɛ “anunyam lɛ kɛ woo lɛ kɛ hewalɛ lɛ” ahã. (Kanemɔ Kpojiemɔ 4:10, 11.) Ŋwɛibɔfoi anɔkwafoi lɛ hu yɛ yiŋtoi pii ahewɔ ni esa akɛ amɛjie Yehowa yi, ni amɛkɛ woo ahã lɛ. Amɛkɛ lɛ ni yɔɔ ŋwɛi, ni no hewɔ lɛ amɛle lɛ jogbaŋŋ. Nibii ni efeɔ lɛ hãa amɛnaa sui ni eyɔɔ. No hewɔ lɛ, kɛ́ amɛna ni eefee nɔ ko lɛ, etsirɛɔ amɛ ni amɛjieɔ eyi.​—Hiob 38:4-7.

7. Mɛni ji nibii komɛi ni wɔbaanyɛ wɔjie Yehowa yi yɛ he?

⁷ Kɛ́ wɔmiisɔle lɛ, esa akɛ wɔ hu wɔjie Yehowa yi ni wɔkɛɛ lɛ nɔ ni wɔsumɔɔ waa ni wɔnáa he miishɛɛ waa yɛ ehe. Kɛ́ ookane Biblia lɛ, kwɛmɔ akɛ mɛɛ sui Yehowa ejie lɛ kpo yɛ sane lɛ ni okaneɔ lɛ mli ni onyaa he waa. (Hiob 37:23; Rom. 11:33) No sɛɛ lɛ, sɔlemɔ ni okɛɛ Yehowa nɔ hewɔ ni onáa sui nɛɛ ahe miishɛɛ waa lɛ. Agbɛnɛ hu, wɔbaanyɛ wɔjie Yehowa yi yɛ bɔ ni eyeɔ ebuaa wɔ kɛ wɔnyɛmimɛi Kristofoi lɛ hewɔ, ejaakɛ ekwɛɔ wɔ fɛɛ, ni ebuɔ wɔhe be fɛɛ be.​—1 Sam. 1:27; 2:1, 2.

8. Mɛni ji nibii komɛi ni wɔbaanyɛ wɔda Yehowa shi yɛ he? (1 Tesalonikabii 5:18)

⁸ Daa Yehowa shi. Nibii pii yɛ ni wɔbaanyɛ wɔda Yehowa shi yɛ he kɛ́ wɔmiisɔle. (Kanemɔ 1 Tesalonikabii 5:18.) Wɔbaanyɛ wɔda lɛ shi yɛ nibii kpakpai fɛɛ ni wɔyɔɔ lɛ ahe, ejaakɛ lɛ eŋɔɔ nibii kpakpai fɛɛ jɛɔ. (Yak. 1:17) Akɛ nɔkwɛmɔnɔ lɛ, wɔbaanyɛ wɔda lɛ shi yɛ shikpɔŋ fɛfɛo ni ehã wɔ kɛ nibii ni yɔɔ naakpɛɛ ni ebɔ lɛ ahe. Agbɛnɛ hu, wɔbaanyɛ wɔda lɛ shi akɛ wɔyɛ wala mli, ni wɔbaanyɛ wɔda lɛ shi yɛ wɔweku lɛ, wɔnanemɛi, kɛ hiɛnɔkamɔ ni ehã wɔná lɛ he. Wɔbaanyɛ wɔda lɛ shi hu akɛ ehã wɔbatsɔmɔ enanemɛi.

9. Mɛni hewɔ esa akɛ wɔsusu nibii fɛɛ ni Yehowa feɔ ehãa wɔ lɛ ahe?

⁹ Ekolɛ ehe baahia ni wɔje gbɛ wɔsusu nibii ni Yehowa feɔ ehãa wɔ lɛ ahe dani wɔjwɛŋmɔ baaya eko nɔ ni wɔda lɛ shi yɛ he. Ŋmɛnɛ lɛ, mɛi pii leee shidaa. Be fɛɛ be lɛ, amɛjwɛŋmɔ yɛ nibii ni amɛmiisumɔ ni afee ahã amɛ lɛ anɔ moŋ fe nibii ni amɛyɔɔ momo ni esa akɛ amɛda shi yɛ he lɛ anɔ. Kɛ́ wɔhã su nɛɛ ná wɔnɔ hewalɛ lɛ, be fɛɛ be ni wɔbaasɔle lɛ, nii sɔŋŋ wɔbaabi. Bɔ ni afee ni ekaba lɛ nakai lɛ, esa akɛ wɔsusu nibii srɔtoisrɔtoi pii ni Yehowa feɔ ehãa wɔ lɛ ahe ni wɔda lɛ shi yɛ he.​—Luka 6:45.

10. Mɛɛ gbɛ nɔ bɔ ni nyɛmi yoo ko daa Yehowa shi daa lɛ ye ebua lɛ ni enyɛ edamɔ shihilɛ ko ni mli wa ni ekɛkpe lɛ naa? (Kwɛmɔ mfoniri lɛ hu.)

¹⁰ Kɛ́ be fɛɛ be lɛ wɔdaa Yehowa shi lɛ, nakai su lɛ baaye abua wɔ kɛ́ wɔyaje shihilɛi ni mli wawai amli. Nyɛmi yoo ko ni atsɛɔ lɛ Kyung-sook, ni awie ehe yɛ January 15, 2015 Buu-Mɔɔ lɛ mli lɛ, ná enɛ mli niiashikpamɔ. No mli lɛ, ená flufla mli kansa ni naa wa. Ewie akɛ: “Be ni akɛɛ mi akɛ hela nɛɛ emɔ mi lɛ, mifee basaa waa. Minu he akɛ nɔ fɛɛ nɔ eŋmɛɛ mi, ni mitsui fã waa.” Mɛni ye ebua lɛ ni enyɛ edamɔ shihilɛ nɛɛ naa? Ewie akɛ daa gbɛkɛ kɛ́ eyaawɔ lɛ, eyaa amɛtsũ lɛ yiteŋ ni esɔleɔ waa yɛ nibii enumɔ ni ehiɛ esɔ waa yɛ nakai gbi lɛ mli lɛ ahe. Enɛ ni efeɔ lɛ hã etsui nyɔ emli ekoŋŋ, ni no tsirɛ lɛ ni efee nibii ni baahã Yehowa ana akɛ esumɔɔ lɛ. Kyung-sook bayɔse akɛ, Yehowa wajeɔ etsuji anɔkwafoi kɛ́ amɛkɛ shihilɛi ni mli wawai kpe, ni akɛ, jɔɔmɔi ni wɔnáa yɛ shihilɛ mli lɛ fa fe naagbai ni wɔkɛkpeɔ lɛ. Wɔ hu kɛ́ wɔkɛ shihilɛ ko ni mli wa miikpe po lɛ, nibii pii yɛ ni wɔbaanyɛ wɔda Yehowa shi yɛ he, tamɔ Kyung-sook fee lɛ. Kɛ́ wɔdaa Yehowa shi be fɛɛ be lɛ, no baaye abua wɔ ni wɔfi shi ni wɔkahao fe nine.

11. Be ni Yesu tee ŋwɛi lɛ, mɛni hewɔ ehe bahia ni ekaselɔi lɛ aná ekãa?

¹¹ Bi Yehowa ni ehã oná ekãa kɛtsu shiɛmɔ nitsumɔ lɛ. Dani Yesu baaya ŋwɛi lɛ, ekai ekaselɔi lɛ nitsumɔ ni ekɛwo amɛdɛŋ lɛ, akɛ amɛye ehe odase “yɛ Yerusalem, kɛ Yudea kɛ Samaria fɛɛ, kɛ agbɛnɛ hu, kɛyashi shikpɔŋ lɛ nɔ hei ni jekɛ waa lɛ.” (Bɔf. 1:8; Luka 24:46-48) Be ni etee ŋwɛi lɛ sɛɛ etsɛɛɛ lɛ, Yudafoi lɛ ahiɛnyiɛlɔi lɛ mɔ bɔfo Petro kɛ bɔfo Yohane ni amɛkɛ amɛ tee Sanhedrin lɛ hiɛ ni amɛfã amɛ akɛ amɛkpa shiɛmɔ, ni amɛwo amɛhe gbeyei po. (Bɔf. 4:18, 21) Te Petro kɛ Yohane fee amɛnii amɛhã tɛŋŋ?

12. Tamɔ bɔ ni wɔnaa yɛ Bɔfoi 4:29, 31 lɛ, mɛni kaselɔi lɛ fee?

¹² Petro kɛ Yohane kɛɛ Yudafoi lɛ ajamɔŋ hiɛnyiɛlɔi lɛ akɛ: “Kɛ́ eja yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛ diɛŋtsɛ nyɛkojoa. Shi wɔ lɛ, wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” (Bɔf. 4:19, 20) Be ni aŋmɛɛ Petro kɛ Yohane he lɛ, kaselɔi lɛ fee ekome ni amɛsɔle amɛhã Yehowa koni eye ebua amɛ ni amɛfee esuɔmɔnaa nii. Amɛkɛɛ Yehowa akɛ: “Ohã onyɔji lɛ aya nɔ awie owiemɔ lɛ kɛ ekãa babaoo.” Yehowa hã sɔlemɔ nɛɛ ni amɛjɛ amɛtsuiŋ amɛsɔle lɛ hetoo.​—Kanemɔ Bɔfoi 4:29, 31.

13. Mɛni wɔbaanyɛ wɔkase yɛ Jin-hyuk sane lɛ mli?

¹³ Kɛ́ amralofoi lɛ kɛɛ wɔkpa shiɛmɔ shi wɔkpaaa lɛ, no baatsɔɔ akɛ wɔmiikase Yesu kaselɔi lɛ. Nyɛmi nuu ko ni atsɛɔ lɛ Jin-hyuk lɛ fee nakai. Awo lɛ tsuŋ ejaakɛ ekɛ ehe wooo asraafoi anitsumɔ lɛ mli. Be ni eyɔɔ tsuŋwoohe lɛ, akɛ nitsumɔ wo edɛŋ akɛ ekwɛ mɛi komɛi ni awo amɛ tsuŋ ni ahãaa amɛkɛ mɔ ko mɔ ko ashãra lɛ. Shi ahã ele akɛ, ekɛ amɛ akawie nɔ ko nɔ ko he akɛ ja nibii ni he hiaa amɛ lɛ pɛ, ni ekɛ amɛ akawie Biblia lɛ hu he. Jin-hyuk sɔle ni Yehowa ahã efee ekãa ni edro lɛ hiɛshikamɔ hu koni enyɛ eshiɛ ehã mɛi lɛ be fɛɛ be ni hegbɛ ko baagbele. (Bɔf. 5:29) Ewie akɛ: “Yehowa bo misɔlemɔi lɛ toi ni edro mi ekãa kɛ hiɛshikamɔ ni minyɛ mikɛ amɛteŋ mɛi pii bɔi Biblia lɛ kasemɔ yɛ amɛtsuŋwoohei lɛ ashinai lɛ anaa nɔŋŋ, ni minitii enumɔ pɛ wɔyeɔ. Kɛ́ eshɛ gbɛkɛ lɛ, miŋmalaa woji ni kɛ́ je tsɛre lɛ mikɛbaahã amɛ.” Tamɔ Jin-hyuk fee lɛ, wɔ hu wɔbaanyɛ wɔsɔle ni Yehowa ahã wɔ ekãa kɛ hiɛshikamɔ. Agbɛnɛ hu, esa akɛ wɔná hemɔkɛyeli akɛ Yehowa baaye ebua wɔ ni wɔnyɛ wɔtsu shiɛmɔ nitsumɔ lɛ jogbaŋŋ.

14. Kɛ́ wɔkɛ naagbai miikpe lɛ, mɛni baaye abua wɔ ni wɔnyɛ wɔdamɔ naa? (Lala 37:3, 5)

¹⁴ Kpa Yehowa fai ni eye ebua bo ni onyɛ odamɔ naagbai anaa. Wɔteŋ mɛi pii yɛ ni wɔbɛ hewalɛ loo wɔhao, loo mɔ ko ni wɔsumɔɔ esane waa lɛ egbo, loo wɔkɛ naagba ko ni mli wa miikpe yɛ wɔweku lɛ mli, loo aawa wɔ yi, loo wɔkɛ naagba kroko ni tamɔ nakai miikpe. Nibii komɛi tamɔ tsɛŋemɔ helai ni baa yɛ heihei kɛ tai ehã ewa waa akɛ wɔbaadamɔ naagbai ni tamɔ nɛkɛ lɛ anaa. Kɛ́ okɛ naagbai nɛɛ eko miikpe lɛ, sɔlemɔ waa ohã Yehowa ni ogba lɛ nɔ fɛɛ nɔ. Okɛ lɛ agba onaagba lɛ he sane tamɔ bɔ ni okɛ onaanyo kpaakpa ko baagba he sane lɛ, ni ohe oye waa akɛ Yehowa ‘baatsu nibii ahe nii ehã bo.’​—Kanemɔ Lala 37:3, 5.

15. Mɛɛ gbɛ nɔ sɔlemɔ baanyɛ aye abua wɔ ni ‘wɔfi shi yɛ amanehulu mli’? Gbaa niiashikpamɔ ko ni tsɔɔ nakai.

¹⁵ Kɛ́ wɔhiɛ sɔlemɔ mli daa lɛ, no baaye abua wɔ ni ‘wɔfi shi yɛ amanehulu mli.’ (Rom. 12:12) Yehowa le nɔ ni etsuji tsɔɔ mli ni “eboɔ amɛbolɔmɔ kɛhã yelikɛbuamɔ lɛ toi.” (Lala 145:18, 19) Nyɛmi yoo ko ni eye afii 29 ni atsɛɔ lɛ Kristie ni eji daa gbɛgbalɔ lɛ na akɛ enɛ ji anɔkwale. Helai komɛi ni naa wala bɔi enaa gbamɔ. Enɛ hewɔ lɛ ehao waa, ni ebafee tamɔ nɔ ni eehe ená jwɛŋmɔŋ naagba po. Sɛɛ mli lɛ, ahã ele akɛ emami miiye hela ko ni ehiii tsamɔ ni baagbe lɛ. Kristie wie akɛ: “Misɔle waa mihã Yehowa koni ehã mi hewalɛ daa gbi ni mikɛdamɔ shihilɛ nɛɛ naa. Mimia mihiɛ waa akɛ mifolɔŋ nibii ni mifeɔ kɛjáa Yehowa lɛ amli. No hewɔ lɛ, miyaa asafoŋ kpeei daa ni mikaseɔ nii daa.” Ewie kɛfata he akɛ: “Sɔlemɔ ye ebua mi waa ni minyɛ mifi shi yɛ shihilɛ ni mli wa nɛɛ mli. Mina akɛ Yehowa kɛ mi yɛ, ni enɛ shɛje mimii waa ni ewo mi hewalɛ. Eyɛ mli akɛ mihelai lɛ asɛɛ efooo amrɔ nɔŋŋ moŋ, shi Yehowa bo misɔlemɔi lɛ toi ni eye ebua mi ni mikaye mitsui ni mikahao fe nine hu.” Be fɛɛ be lɛ, nyɛhãa wɔkaia akɛ, “Yehowa le bɔ ni efeɔ ejieɔ mɛi ni jáa Nyɔŋmɔ lɛ kɛjeɔ shihilɛ ni mli wa mli.”​—2 Pet. 2:9.

16. Mɛni hewɔ esa akɛ wɔhã Yehowa aye abua wɔ koni wɔkabote kaa mli?

¹⁶ Kpa Yehowa fai ni eye ebua bo ni okagbee kaa mli. Akɛni wɔyeee emuu hewɔ lɛ, daa nɛɛ ehe miihia ni wɔmia wɔhiɛ waa ni wɔkafee nibii ni Yehowa sumɔɔɔ. Satan hu miifee nɔ fɛɛ nɔ ni ebaanyɛ koni enɛ feemɔ awa ahã wɔ. Gbɛ kome ni etsɔɔ nɔ eduɔ susumɔi gbohii ewoɔ wɔjwɛŋmɔ mli ji, kɛtsɔ hiɛtserɛjiemɔ ni esaaa nɔ. Hiɛtserɛjiemɔi ni tamɔ nɛkɛ lɛ hãa wɔnáa susumɔi gbohii, ni no baanyɛ awo wɔhe muji yɛ Yehowa hiɛ ni ehã wɔfee eshai ni yɔɔ hiɛdɔɔ.​—Mar. 7:21-23; Yak. 1:14, 15.

17. Kɛ́ wɔsɔle ni Yehowa aye abua wɔ ni wɔkabote kaa mli lɛ, mɛni esa akɛ wɔ diɛŋtsɛ hu wɔfee? (Kwɛmɔ mfoniri lɛ hu.)

¹⁷ Ja Yehowa eye ebuɔ wɔ dani wɔbaanyɛ wɔjo kaa naa foi. Be ni Yesu tsɔɔ ekaselɔi lɛ bɔ ni asɔleɔ lɛ, nɔ kome ni etsĩ tã ji, ni amɛbi ni Yehowa kɛ amɛ ‘akaya kaa mli, shi moŋ ejie amɛ kɛje mɔ fɔŋ lɛ dɛŋ.’ (Mat. 6:13) Yehowa miisumɔ ni eye ebua wɔ, shi ja wɔbi lɛ dã. Agbɛnɛ hu, kɛ́ wɔbi ni Yehowa aye abua wɔ lɛ, esa akɛ wɔtsi wɔhe kɛje nɔ fɛɛ nɔ ni baanyɛ ekɛ wɔ aya kaa mli lɛ he. Esaaa akɛ wɔkaneɔ loo wɔboɔ nibii ni baanyɛ ahã susumɔi gbohii ni yɔɔ Satan je lɛ mli lɛ abote wɔjwɛŋmɔ mli lɛ toi. (Lala 97:10) Moŋ lɛ, esa akɛ wɔkane Biblia lɛ ni wɔkase koni no ahã nibii kpakpai ayi wɔjwɛŋmɔ mli obɔ. Agbɛnɛ hu, esa akɛ wɔya asafoŋ kpeei daa ni wɔya shiɛmɔ be fɛɛ be, ejaakɛ no baabu wɔjwɛŋmɔ he. Yehowa ewo shi akɛ kɛ́ wɔfee nibii nɛɛ, ehãŋ aka wɔ fe bɔ ni wɔbaanyɛ naa wɔdamɔ.​—1 Kor. 10:12, 13.

18. Mɛni esa akɛ wɔteŋ mɔ fɛɛ mɔ afee yɛ sɔlemɔ he?

¹⁸ Esa akɛ wɔteŋ mɔ fɛɛ mɔ asɔle waa ni Yehowa aye abua lɛ ni eye lɛ anɔkwa yɛ naagbee gbii ni mli shihilɛ wa nɛɛ amli. No hewɔ lɛ, jee gbɛ oto be daa gbi koni ojɛ otsuiŋ osɔle. Yehowa miisumɔ ni ‘wɔfɔse wɔtsuiiaŋ wɔshwie ehiɛ.’ (Lala 62:8) Jiemɔ Yehowa yi ni oda lɛ shi yɛ nibii fɛɛ ni efeɔ ehãa bo lɛ ahe. Bi lɛ ni eye ebua bo ni oná ekãa kɛshiɛ, ni okpa lɛ fai ni eye ebua bo koni onyɛ odamɔ naagbai ni okɛkpeɔ lɛ anaa ni okagbee kaa mli hu. Sɔlemɔ daa ohã Yehowa, ni kaahã nɔ ko nɔ ko loo mɔ ko mɔ ko tsĩ onaa. Shi kɛ́ wɔsɔle lɛ, mɛɛ gbɛ nɔ Yehowa hãa wɔsɔlemɔi lɛ hetoo? Wɔbaasusu sanebimɔ ni he hiaa nɛɛ he yɛ nikasemɔ ni nyiɛ sɛɛ lɛ mli.