Mɛi Pii Baaje Naagbee Lɛ Mli​—Bo Hu Obaanyɛ Oje Mli

Biblia lɛ hãa wɔleɔ akɛ abaakpãtã mɛi ahiɛ yɛ naagbee lɛ mli. Ekɛɔ akɛ: “Amanehulu kpeteŋkpele ni anako enɔ dã kɛjɛ je lɛ shishijee aahu kɛbashi amrɔ nɛɛ . . . baaba. Anɔkwa, kɛ́ afooo nakai gbii lɛ anɔ kuku lɛ, ahereŋ heloo ko heloo ko yiwala.” (Mateo 24:21, 22) Nyɔŋmɔ ewo wɔ shi akɛ, mɛi babaoo baaje mli. Biblia lɛ kɛɔ akɛ: “Je lɛ . . . miiho kɛmiiya, shi mɔ ni feɔ Nyɔŋmɔ suɔmɔnaa nii lɛ baahi shi kɛya naanɔ.”​—1 Yohane 2:17.

Kɛ́ ootao ni oje je ni miiho aya nɛɛ mli ni ‘ohi shi kɛya naanɔ’ lɛ, mɛni esa akɛ ofee? Ani esa akɛ obɔi nibii babaoo anaabuamɔ kɛto osɛɛ nane? Dabi. Biblia lɛ woɔ wɔ hewalɛ waa ní wɔtiu nibii ni he hiaa fe nomɛi moŋ asɛɛ. Ekɛɔ akɛ: “Akɛni abaasere nɛkɛ nibii nɛɛ fɛɛ yɛ nɛkɛ gbɛ nɔ hewɔ lɛ, nyɛsusua nɔ gbɔmɛi ni esa akɛ nyɛtsɔmɔ yɛ jeŋbai krɔŋkrɔŋi kɛ nifeemɔi ni tsɔɔ Nyɔŋmɔjamɔ su lɛ amli lɛ he, be mli ni nyɛmɛɔ ni nyɛhãa Yehowa gbi lɛ baa lɛ hiɔ nyɛjwɛŋmɔ mli jogbaŋŋ lɛ.” (2 Petro 3:10-12) Sane ni awieɔ he lɛ tsɔɔ akɛ, “nibii nɛɛ fɛɛ” ni abaasere lɛ ekomɛi ji, nɔyelii ni yɔɔ je ni efite nɛɛ mli kɛ mɛi fɛɛ ni fiɔ nɔyelii nɛɛ asɛɛ moŋ fe Nyɔŋmɔ lɛ. Eyɛ faŋŋ akɛ, kɛ́ wɔbua heloonaa nibii anaa wɔto lɛ, no nyɛŋ ahere wɔyiwala kɛje hiɛkpatamɔ ni tamɔ nɛkɛ lɛ mli.

Belɛ, kɛ́ wɔbaaje mli lɛ, esa akɛ wɔsɔmɔ Yehowa Nyɔŋmɔ ni wɔkase jeŋba kɛ nifeemɔi ni saa ehiɛ. (Zefania 2:3) Esaaa akɛ wɔnyiɛɔ susumɔi ni mɛi babaoo ni yɔɔ ŋmɛnɛ lɛ hiɛ lɛ sɛɛ, ní wɔku wɔhiɛ wɔshwie nibii ni tsɔɔ faŋŋ akɛ wɔyɛ be ni sa kadimɔ waa nɛɛ mli lɛ anɔ, shi moŋ esa akɛ ‘wɔhã Yehowa gbi lɛ baa lɛ ahi wɔjwɛŋmɔ mli jogbaŋŋ.’ Yehowa Odasefoi baanyɛ ajɛ Biblia lɛ mli atsɔɔ bo bɔ ni obaafee oje gbi ni baa nɛɛ mli.