Amɛfɔ Binuu

Abraham kɛ Sara hi shi akɛ wu kɛ ŋa afii babaoo. Shĩa ni no mli lɛ amɛyɔɔ mli yɛ Ur lɛ hã amɛhe jɔ amɛ waa. Shi amɛfã kɛjɛ jɛmɛ ni amɛyahi mama tsũi amli. Fɛɛ sɛɛ lɛ, Sara mli fuuu. Ekɛ ehiɛ fɔ̃ Yehowa nɔ, ejaakɛ ele akɛ Yehowa le nɔ ni hi hã amɛ.

No mli lɛ, Sara miitao bi waa. No hewɔ lɛ, ekɛɛ Abraham akɛ: ‘Kɛ́ mitsulɔ Hagar fɔ lɛ, manyɛ mikɛ ebi lɛ afee mibi.’ Sɛɛ mli lɛ, Hagar fɔ binuu. Atsɛɔ lɛ Ishmael.

Afii pii asɛɛ, be ni Abraham eye afii 99 ni Sara eye afii 89 lɛ, mɛi etɛ komɛi basara amɛ. Abraham kɛɛ amɛ akɛ amɛbajɔɔ amɛhe yɛ tso ko shishi, ni ehã amɛ niyenii. Ani ole mɛi ni basara amɛ lɛ? Amɛji ŋwɛibɔfoi! Amɛkɛɛ Abraham akɛ: ‘Wɔsɛɛ afi be nɛɛ, okɛ oŋa lɛ baafɔ binuu.’ No mli lɛ, Sara yɛ tsũ lɛ mli eebo amɛ toi. Be ni enu enɛ lɛ, eŋmɔ yɛ emli, ni ewie yɛ eyitsoŋ akɛ: ‘Bɔ ni migbɔ nɛɛ, ani manyɛ mafɔ?’

Afi kome sɛɛ lɛ, Sara fɔ binuu, tamɔ bɔ ni Yehowa bɔfo lɛ wo lɛ shi lɛ pɛpɛɛpɛ. Abraham wo lɛ Isak, ni eshishi ji “Ŋmɔlɔ.”

Be ni Isak ye aaafee afii enumɔ lɛ, Sara na akɛ Ishmael miiŋmɔ Isak. Akɛni Sara miisumɔ ni ebu ebi lɛ he hewɔ lɛ, ekɛɛ Abraham akɛ eshwie Hagar kɛ Ishmael. Kulɛ, Abraham sumɔɔɔ ni efeɔ nakai. Shi Yehowa kɛɛ lɛ akɛ: ‘Bo Sara toi. Makwɛ Ishmael. Shi Isak nɔ matsɔ mahã mishiwoi lɛ aba mli.’