Ha Omii Ashɛ Nɔ ni Oyɔɔ lɛ He
1 Ŋmalɛi lɛ woɔ wɔ ŋaa ni wɔkɛ heloo gbɛfaŋ nibii ni he hiaa wɔshiabii lɛ aha amɛ, shi esaaa akɛ enɛ feɔ oti kome pɛ ni ma wɔhiɛ yɛ shihilɛ mli. Esa ákɛ akɛ mumɔŋ nibii aye klɛŋklɛŋ gbɛhe. (Mat. 6:33; 1 Tim. 5:8) Shihilɛ ni ŋmɛɔ pɛpɛɛpɛ ni aaaná yɛ ‘jaramɔ bei ni mli wa’ nɛɛ amli lɛ ji kaa. (2 Tim. 3:1) Mɛni baaye abua wɔ ni wɔfee nakai?
2 Halamɔ Biblia Jwɛŋmɔ Lɛ: Nyɔŋmɔ Wiemɔ lɛ bɔɔ wɔ kɔkɔ akɛ ninámɔ sɛɛdii baanyɛ ekɛ mumɔŋ hiɛkpatamɔ aba. (Jaj. 5:10; Mat. 13:22; 1 Tim. 6:9, 10) Ebaafee oshara kɛha wɔteŋ mɔ ko yɛ nɛkɛ jaramɔ be nɛɛ mli ákɛ, ekɛ ehe aaawo heloo gbɛfaŋ loo shika taomɔ nitsumɔ mli vii akɛ, no baaha wɔtsi mumɔŋ nitsumɔi—kpeeiyaa, nikasemɔ, kɛ sɔɔmɔ nitsumɔ lɛ—wɔwo gbɛhe ni ji enyɔ yɛ wɔshihilɛi amli. (Luka 21:34-36) Nɔ ni tamɔɔɔ enɛ lɛ, Biblia lɛ woɔ wɔ ŋaa akɛ: “Kɛ́ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he.”—1 Tim. 6:7, 8.
3 Enɛ etsɔɔɔ akɛ aabi ni Kristofoi ahi shi yɛ ohia shihilɛ ni amɛkɛba amɛ diɛŋtsɛ amɛnɔ lɛ mli. Shi eyeɔ ebuaa wɔ koni wɔyoo nɔ ni wɔ heloo gbɛfaŋ hiamɔ nii ji diɛŋtsɛ—niyenii, hehaanɔ, kɛ wɔɔhe ni sa yɛ he ni wɔyɔɔ lɛ. Kɛji akɛ wɔyɛ shihilɛ mli hiamɔ nii lɛ, esaaa akɛ wɔdiɔ shihilɛ ni nɔ kwɔ ni esɛɛtiumɔ bɛ naagbee lɛ sɛɛ. Kɛji akɛ wɔmiisusu nɔ ko ni wɔbaahé loo nitsumɔ kroko ni wɔbaatao wɔfata he lɛ he lɛ, wɔɔfee jogbaŋŋ akɛ wɔɔbi wɔhe akɛ, ‘Ani enɛ he miihia diɛŋtsɛ?’ Nakai feemɔ baaye abua wɔ koni wɔbo ŋaawoo ni jɛ mumɔŋ nɛɛ toi, akɛ: “Shika suɔmɔ akaba nyɛjeŋba mli, ni nyɛmii ashɛa nii ni nyɛyɔɔ lɛ he.”—Heb. 13:5.
4 Kɛ́ wɔkɛ wɔhiɛ fɔ̃ Yehowa nɔ lɛ, ebaajɔɔ wɔ. (Abɛi 3:5, 6) Eyɛ mli akɛ wɔtsuɔ nii waa koni wɔná wɔ daa gbi hiamɔ nii moŋ, shi wɔtswaaa wɔshihilɛ wɔbɔleee nakai nibii lɛ. Kɛji akɛ wɔyɛ bibioo jio, babaoo jio, wɔkɛ wɔhe fɔ̃ɔ Yehowa nɔ koni eha wɔ wɔhiamɔ nii. (Fil. 4:11-13) Enɛ hewɔ lɛ, wɔtsui nyɔɔ wɔmli jogbaŋŋ ni wɔnáa jɔɔmɔi krokomɛi babaoo hu.
5 Kasemɔ Mɛi Krokomɛi Ahemɔkɛyeli: Yoo fɔlɔ mɔ-kome mɔ ni miitsɔse ebiyoo yɛ anɔkwale gbɛ lɛ nɔ lɛ ha eshihilɛ tee nɔ efee mlɛo. Eyɛ mli akɛ emii shɛɔ ehe yɛ eshia lɛ mli moŋ, shi eshĩ jɛmɛ kɛyahi shia bibioo ko mli, ni sɛɛ mli lɛ eyahi pia kɛ asa tsũ ko mli. Enɛ ha enyɛ eba ŋmɛlɛtswaa ni ekɛtsuɔ heloo gbɛfaŋ nitsumɔ lɛ shi koni etu be babaoo ewo sɔɔmɔ nitsumɔ lɛ mli. Beni ebiyoo lɛ da ni ebote gbalashihilɛ mli sɛɛ lɛ, nyɛ lɛ kpa nitsumɔ beni ebe shɛko ni ekɛaafee nakai, eyɛ mli akɛ enɛ tsɔɔ akɛ shika ni ebaaná lɛ faaa. Amrɔ nɛɛ, wɔ nyɛmi yoo lɛ kɛ afii kpawo esɔmɔ akɛ daa gbɛgbalɔ, ni eshwaaa ehe kwraa yɛ heloo gbɛfaŋ nibii ni ekɛshã afɔle koni ekɛ Maŋtsɛyeli lɛ he nibii aye klɛŋklɛŋ gbɛhe yɛ eshihilɛ mli lɛ mli.
6 Onukpa ko kɛ eŋa tsu gbɛgbamɔ nitsumɔ lɛ afii pii beni amɛlɛɔ amɛbii etɛ lolo. Ákɛ weku lɛ, amɛkase bɔ ni amɛmii aaashɛ amɛhe yɛ amɛ hiamɔ nii ahe nitsumɔ pɛ mli fe ni amɛaatao nibii ni amɛsumɔɔ. Nyɛmi nuu lɛ wie akɛ: “Ehe bahia ni wɔhi shi yɛ gbɛ ni baa shi kwraa nɔ. Eyɛ mli akɛ wɔkɛ shihilɛi komɛi ni mli wa kpe moŋ, shi Yehowa kɛ nibii ni he hiaa wɔ lɛ ha wɔ be fɛɛ be. . . . Kɛ́ mina bɔ ni miweku lɛ kɛ mumɔŋ nibii yeɔ klɛŋklɛŋ gbɛhe nɛkɛ lɛ, minuɔ he akɛ nakai esa akɛ nɔ fɛɛ nɔ aba aha, ni minuɔ he akɛ minyɛ mitsu nɔ ko kɛ̃.” Eŋa kɛfata he akɛ: “Kɛji akɛ mina [miwu] ni ebɛ dekã kwraa yɛ mumɔŋ saji ahe nitsumɔ mli lɛ, minuɔ tsui ni nyɔɔ mɔ mli he waa.” Gbekɛbii lɛ hu yɛ miishɛɛ akɛ amɛfɔlɔi kpɛ amɛyiŋ akɛ amɛbaasɔmɔ Yehowa kɛ amɛbe fɛɛ.
7 Kɛha mɛi ni halaa Nyɔŋmɔ jamɔ hetuu-kɛhamɔ gbɛ ni tamɔ nɛkɛ fe heloo gbɛfaŋ nibii asɛɛdii lɛ, Biblia lɛ ewo jɔɔmɔi babaoo he shi kɛha amɛ bianɛ kɛ agbɛnɛ yɛ wala ni baaba lɛ mli.—1 Tim. 4:8.